.

.

رسالة من شهيد

Wednesday, February 16, 2011



تحية لكل شهداء ثورة25 يناير
رسالة من شهيد
قومي يامة ماتبكيش وسمعيني أعلى زغروته
إبنك نال الشهادة ومات أجمل موته

فاكرة يامة
لما قلتيلي بقلبك
وشفايفك وعنيكي
إن ده ندر عليكي
إني لما اتخرج واخد الشهادة
هاتفرقي وسط الحارة شربات بزيادة
وتفرحي بيا وتتباهي بيا وسط أهلي وناسي
وتقولي ابني حبيبي وفى بوعده ليا ورفع راسي
قومي يامة ماتبكيش و سمعيني أعلى زغروته
إبنك نال الشهادة ومات أجمل موته

النهارده يامة
وأنا في قلبك
في قلب ميدانك
وسط كتير من ثوارك
كاشفين صدورنا للنار
واصلين الليل بنهار
لضمين حواليكي سبحة حباتها من شباب مصر الجميل
شباب بيحبك وبيموت فيكي وليكي وده أجمل دليل
قومي ياما ماتبكيش و سمعيني أعلى زغروته
إبنك نال الشهادة ومات أجمل موته


النهاردة يامة
أنا جايلك غير أي يوم
جايلك متشال على كتاف
شباب جرئ مش بيخاف
أوعاكي يامة تقولي إبني ضاع
وإن ده أخر لقا بنا وبعده وداع
ولا دمع الحزن ينزل يجري من عينك لما تشوفيني على حالي كده
خلي دمع الفرح يجري يسبق يقول مفيش مشهد اجمل من كده
قومي يامة ماتبكيش و سمعيني أحلى زغروته
إبنك نال الشهادة ومات أجمل موته

10 دورك في الفضفضة:

سمراء said...

شوف يا مصري
في الارض 3 علاقات
اناوربنا
انا وانا
وانا واي حد تاني
ربنا خلقنا على الارض علشان يكون فيه علاقة بيني وبين اي حد تاني
وعلشان العلاقة دي تتم لازم تكون فيه علاقة بيني وبين نفسي
فعلا زغروته على موت كل واحد عمل حاجة علشان اي حد تاني من غير ميعرف اسمة او لونة او عنوانه او دينة او نوعة
زغروته علشان الشهيد عرف نفسة وحقق اللي عايزة منه ربنا ونجح واخد الشهادة

سمراء المصرية

kochia said...

الله يرحمهم جميعا
ويكون كل مصري قد المسؤولية
ونرجع تاني لاصلنا واخلاقنا الحقيقية اللي طمستها الايام

تحياتي

Israa' A. Youssef said...

مفيش كلام يتقال بعد كده..
أكتر من رائعة..

تحياتي..

shemo_ joker said...

السلام عليكم....


بجد تسلم ايدك يا ارابيسك
ودا فعلا الى مفروضة يعملوه اهل الشهدا يا بختهم ياررررررب ربنا ينولنا الشهادة زيهم

دومت بخير
فى رعاية الله
shemo

Medus said...

ادعوكم للانضمام لجروب(انا قبطي..انا مصري) والذي يؤمن بتمصير مصر ويدعو لانسلاخ مصر من الفكر القومي العروبي لصالح الفكر القومي المصريوهذا هو اللينك

http://www.facebook.com/search.php?q=%D8%A7%D9%86%D8%A7+%D9%82%D8%A8%D8%B7%D9%8A&type=all&init=srp#!/group.php?gid=95263135874

hana said...

إزيك حسن واحشني

تحية حب وإعتزاز الى شهداء مصـــر اللي هتفضل أرض مصر وسماها بترسم إسمهم على سماءالحريــــه

كلمات تبكــي القلوب إستعدنا معها كل الأحداث

وحشتني بجد يا فنان
ودي وتقديري وإحترامي لقلمكـ المميز

ذو النون المصري said...

مندهش جدا من جراة الشباب في الميدان كانهم في معركة شرف
بل هي فعلا معركة شرف و استرداد كرامة
بيذكروني بالشباب اللي عبر قناة السويس عام 73
هذا المشهد الذي احب ان اراه بكثرة كمشهد وحيد يثير وطنيتي
اصبح الي جواره مشاهد اخري كثيره كلها من ميدان التحرير و مناطق اخري من مصر
لشباب مات و شباب اصيب و شباب ثار و نهض من تحت الرماد كي يلقي اعظم تحية و يلهم العالم كله بثورة من اعز الثورات الانسانية و ارقاها و اخفها دما
لقد جعل الشباب الثورة تتمصر كما جعل كل شيء يتمصر في مصر
و هذه نقطة عظيمة القدر لانها ثورة مصرية التكوين و ا لفكر و الادارة و التنفيذ لم تتاثر بشيء و لم يؤثر فيها شيء
تحياتي لكل الشباب و تحيا مصر

ن said...

سلام من الله عليكم جميعا
مبروك الثورة ومباركة عليكم بإذن الله فانتم أهل لها وهذه هى سمات المصريين عبر كل العصور منذ فجر التاريخ وحتى الان
تحياتى لك يا ابو على يا فنان
ارسلت لك طلب اضافة على صفحة الفيس بوك منذ وقت طويل
مع خالص تحياتى

فشكووول said...

السلام عليكم حسن بك
تحياتى
طبعا انت كسول فى التدوين وانا بقيت اكتر منك كسل
من زمان وانا ما جيتش هنا
عارف يا حسن بك
لولا شهادة الشهداء والدم الذى دفعناه فى ميدان التحرير وفى الاسكندريه والسويس اعتقد ان الثوره لم تكن لتنح ابدا
منذ ان سمعت اول انباء عن شهداء فى السويس التى قدمت اول الشهداء وقلت خلاص ما فيهاش رجعه
رحم الله الشهداء واسكنهم فسيح جناته فقد دفعوا لنا الدم ثمنا للحريه
تحياتى

حسن ارابيسك said...

تحية لكل أصدقائي المدونين على روحهم العالية ورحم الله شهداء مصر والمسلمين جميعاً
تحياتي