.

.

وحشانا ياأم الخير

Friday, April 9, 2010


حاجه كده من التراث

طبعاً لسه فاكرك
فينك وفين أيامك
قرص خشب كبير متلمع متسمر متهذب بالفاره والمنشار
كل اللي كان يشوفك عندنا يقول تسلم ايدين الأسطى النجار
طول عمرك عايشة وسطنا في كل مطرح وجهاز عروسة ودار
ناكل عليكي ونكوي هدومنا ونذاكر دروسنا ونطلع من الشطار
وحشانا ياأم الخير ياطبلية الأكل

طبعاً لسه فاكرك
فينك وفين أيامك
أوقات قاعدين حواليكي واخدين راحتنا ومرحرحين
وأوقات قاعدين حواليكي الكتاف في الكتاف متزنقين
لا حد بينا يضايق ولا حد ينفخ كنا بلمتنا مبسوطين
نشمر الدراعين ونسمي بسم الله ونمد الإيدين
وحشانا ياأم الخير ياطبلية الأكل

طبعاً لسه فاكرك
فينك وفين أيامك
ايام العز ولمتنا عليكي كل يوم وكل ساعة أكل
أختي واخويا وامي وابويا وخلان وأعمام وأهل
ومحمر يتحط ومشمر يترص ومن كل صنف وشكل
ده الخير كان كتير وربنا كان مبارك في شرب وأكل
وحشانا ياأم الخير ياطبلية الأكل

طبعاً لسه فاكرك
فينك وفين أيامك
كان كل واحد بره بيته يرجع جري ملهوف مشتاق
يلقى مرصوص عليكي إيشي صواني وطواجن واطباق
ولو صفصفت حتى على حتة جبنة وكسرة خبز أورقاق
الكل يقوم شبعان ومرضي ساكن في شارع أو في زقاق
وحشانا ياأم الخير ياطبلية الأكل

طبعاً لسه فاكرك
فينك وفين أيامك
خيرك اللي كان من ربنا، كان مش بس لنا
ده كان لجيرانا وجيران جيران اللي جنبنا
أطباقنا يوم عندهم وأطباقهم يوم عندنا
وده كان حال بيوت مصر وحال كل حينا
وحشانا ياأم الخير ياطبلية الأكل

طبعاً لسة فاكرك
وحزين على أيامك
أيام كل حاجه كان فيها بركه دلوقتي حل مكانها الفقر واتحقق
وشمل العيلة الحلو راح إتشتت ما بين التيك أواي واتفرق
والناس الطيبة لما راحت زِعل وحِزن الخشب فيكي واتشقق
وكل مسمار فيكي شاخ وانحنى ضهره ولا ينفع تاني يدقدق
ألف رحمة ونور عليكي ياطبلية الأكل
حسن أرابيسك