.

.

قوس الكمان

Thursday, June 24, 2010












سحبت الكمان من مكان
كنت فيه قافل عليه
وانا كنت حالف من زمان
إني مش هاقرب إليه
وكنت خايف لإني عارف
هاييجي يوم وأحن ليه
وقبل ما امسك الكمان
قعدت افكر كمان وكمان
أعزف أيه..؟ أعزف أيه..؟
أه هاعزف حته فالس
حته تمام مش أي هلس
حته فالس يرقص معاها قلبي
وينشرح ليها صدري
وقبل ما أقول ياهادي
نط القوس عالأوتار وسحب سحبه
سمعت للأوتار صرخة ووجع وأنين
وكأنه جان وكان
محبوس في قمقم من سنين
قوس الكمان
حرام أنا مش ناقص بشويش عليا
هاتبقى انت والأيام كمان عليا
لا ياعم ارجع مكانك
وخليني في حالي
وخليك في حالك
لكن مفيش فايدة
قوس الكمان
واخدها مزايدة
سحب القوس عالوتر من فوق لتحت
نزلني من سابع سما لسابع أرض تحت
وكأنه أزميل حزن وبينحت في القلب نحت
ولسة هالملم في نفسي
وأخليني في يومي
وابعد عن أمسي
سحب القوس عالوتر من تحت لفوق
سحب روحي معاه لسدرة الأحباب فوق
والقلب مرزوع عالأرض بيعصره الشوق
قوس الكمان
طالع نازل عالوتر
زي السكين الباردة
يصرخ يئن منه الوتر
وصرخته في القلب فايته
قوس الكمان خلااااص بكفاية
دي السحبة منك بوجع وحكاية
لكن برضه مفيش فايدة
قوس الكمان واخدها معاندة
وكأنه في إفتتاحية عايدة
رعش القوس عالوتر
رعشة تفلق الحجر
ورعش القوس عالوتر
رعشة تحنن المطر
قوس الكمان شغال
واخدني من حال لحال
قوس الكمان يدور ويُنكش في المقامات الحزينة
من كردي لبياتي لصبا ومن حارة لشارع لمدينة
يدخل من مقام يطلع لمقام
وكأنه صوفي
وبيتنقل من ضريح لمقام
قوس الكمان
لابيهدا ولابيتعب ولابيرحم
يسحب من تحت لفوق
ومن فوق لتحت
وكأنه جوه القلب
واخد مقاولة
فحت وردم
وردم وفحت
قوس الكمان أنا في عرضك
اختم بقا أنا من الوجع تعبت ومليت
واهي دقني اهي لو طلعتك
تاني من الصندوق أو يوم للكمان حنيت
وبعد معاندة
وبعد مناهدة
قوس الكمان سمع الكلام وختم
مش عارف ختم ولا شتم
المهم اتهد حيله
وجنب الكمان إتمدد وراح في النوم
ورحت أنام أنا في سريري
لقيتني راح من عيني النوم
الله يجازيك ياقوس الكمان
قلبت عليا المواجع كمان وكمان

حسن أرابيسك