.

.

وأه ياقلبي أه

Saturday, September 10, 2011



وأه ياقلبي أه

فاكر أيوه فاكر

فاكر ومش ناسي
فاكر لما كنا صغار
نجري ونلعب
جنب الساقية
وجنب الدار
كان وقتها قليل جسمنا
لما نضحك
ميستحملش ضحكنا
يتهز ويميل زي الشواشي
لما يطبطب عليها الهوا جوه الغيطان
كان وقتها رهيف قلبنا
لما نفرح
يطير بينا فرحنا
زي طيارة ورق
طايرة في الهوا من غير خيطان
كانت بسيطة أحلامنا
لما نحلم
نرسم بإيدينا أحلامنا
شوية شخبطة على الورق
وعريس وعروسة على الحيطان

وبقينا نكبر ونكبر
وشجرة حبنا تكبر
والعشق صبح جوانا
نهر ميته بتجري وبتكتر
وبقينا ساقية تدور
تروي الأرض البور
وبقينا لبعض
سقف وضليلة
وبيت وعيلة
ومسند وحيطة وسور
وبقينا لبعض
فرشة وغطا
وحضن ودفا
وعِشرة ووفا
وجوز حمام
عايشين في سلام
لما الليل يحل علينا
على كتف بعض بنميل وبنام

وأه ياقلبي أه
لما الزمان سن سكينه وسُنته
وكشر عن أنيابه
وراحت من على وشه ضحكته
وغصب عنها وعني
مد إيده وخدها مني
كان ليه يسبني ليه
ما أخدني معاها ليه
وازاي أعيش تاني
وأنا بقيت وحداني
ولمين أعيش تاني
والدنيا ماتحلالي
أرض بور مهجورة
ونخلة محنية منحورة
وساقية واقفة معطوبة
ودار متفتته فيها كل طوبة
ولمبة مطفية ومعصوبة
وطير جناحاته مكسورة
وقلب أهاته مقهورة
دقاته صبحت أه
وأه ياقلبي أه
وميت مليون أه
لا توفي ولا تكفي .. حزني
على القمرة اللي كانت في السما
منورة و مرفوعة
صبحت اليوم تراب
وفي تراب الأرض مدفونة
حسن أرابيسك