.

.

حزين عليكي يامصر

Monday, July 2, 2007


حزين عليكي يامصر وحزين على ولادك
وفين خيرك يامصر مابين إيدين أغرابك
حزين على بلدي وناسي وكل مصري بيأسي
قلبي فاكرهم مش ناسي حزين عليكي يامصر

يامُ الكرم والأصل واقف أنا عل بابك
خايف أموت يامصر ملقىَ مكان في ترابك
حزين على بلدي وناسي وكل مصري بيأسي
قلبي فاكرهم مش ناسي حزين عليكي يامصر


يا بلدي يامُ الغلابه أهلك صبحوا مساكين
ياكلوهم تعالب وديابه ومعاهم ساكنين
حزين على بلدي وناسي وكل مصري بيأسي
قلبي فاكرهم مش ناسي حزين عليكي يامصر


كتير كتير صانوكي في القرب وفي البعاد
وكتير كتير ظلموكي وداسوا على العباد
حزين على بلدي وناسي وكل مصري بيأسي
قلبي فاكرهم مش ناسي حزين عليكي يامصر

24 دورك في الفضفضة:

MiraMar said...

قشعريره تسري من الوجدان
وبركان غضب وأحزان
وغربه الاوطان
العين تنام والفكر سهران


قلبت المواجع
تحياتي جداجدا

حراس الحقيقة said...

كتير كتير صانوكى فى القرب وفى البعاد وكتير كتير كتير هيصنوها فى الماضى وفى الحاضر ومدى الحياة
قصيده رائعه بجد

حسن ارابيسك said...

ميرامار

حلو التعقيب أما يكون شعر مقابل شعر
تسلم إيديكي

حسن ارابيسك said...

حراس الحقيقة
الكلام ده كان زماااااااااان
بس واللهي كويس إن لسة في أمل
ولسة في خير وفي ناس بتحبها من قلبها
بالنيابة عن مصر شكراً على شعورك ده

بهلوله said...

سعيده
انا كنت معديه جنبك قلت اسلم وامشى

حسن ارابيسك said...

بهلولة
أنا بشكر الصدفة اللي جمعت مدونتي بيكي
وكان نفسي اقرأ لكي أي تعقيب حتى لو كان ضرب نار مفيش مشكلة
عموما أكيد هانشوفك تاني بس مش صدفة
نورتي البيت وأصحاب البيت

يا مراكبي said...

الله .. كلام بيوجع ويكوي الجروح .. ومابيعالجهاش برضة .. جروح غير قابلة للعلاج خلاص

حلو قوي قوي الرسم اللي فوق الكلام

تحياتي

MAKSOFA said...

والله وجعت قلبي أكتر ماهو موجوع علي مصر

حسن ارابيسك said...

مراكبي
وحشتنا ياباشمهندس
ومجيتك دي على راسي من فوق
وأعقب على تعقيبك
واقول في الفضفضة نص العلاج
عشان على الأقل لينا
هاتقولي طبعاً ما احنا جروحنا من جروحها
هاأقولك
على الأقل بنفضفض ويمكن فضفضتي على فضفضتك على غيرها وغيرها يمكن يطع منها في الأخر حاجه
وكل الأوضاع اللي إتغيرت في نظم كتير إبتدت بفضفضة
وهيلا هيلا هيلا هيلا
شد القلوع يامراكبي مفيش رجوع يامراكبي
وشكراً لحضورك المميز دائما

حسن ارابيسك said...

مكسووووفة
سبحان الله اسم مدونتك بعيد كل البعد عن شخصيتك
فالحقيقة قلمك يتميز بالكثير من الجراءة التي تعبر دائما عن المصارحة بكل وضوح ومن غير كسوف ومعدش الكسوف ينفع مع الناس دي
وبخصوص تعقيبك الصريح ده
حسيت إنك بتقوليلي
على رأي المثل يا أخويا
لاتعايرني ولا اعايرك
ده الهم طايلني وطايلك
شكراً لتشريفك الكريم

Tigress said...

مصر ارضى ومش هاسيبها
يمكن انا النهاردة متفرجة متأملة ... ولكن بكرة اكيد الوضع هيختلف....
بكرة انا او ولادى.. هنعمل حاجة.. حاجة ترجع المال المسروق.. والعرض المنهوب... والدين اللى اصبح متعلق لوحات فى الجوامع وميكروفون بيأذن....
لو بس المصرين يبطلوا يتفرجوا ويتمنوا وهما قافلين دراعتهم وقاعدين على الرصيف..
لو بس يقولوا لأ جامدة.. لو بس يبطلوا يخافوا ويبطلوا يكبروا دماغتهم...
لو بس نبطل نبقى مستسلمين لكربا فرعون علشان نبنى هرم محدش هيموت غيره فيه ....

حسن ارابيسك said...

tigress
كلام كبير قوى ويخوف
شكلك كده ثورجيه وبايعه اللى وراكي وقدامك وناوياها
بس ولا يهمك
في سنه معرفش كام كنا رجاله ووقفناوقفه رجاله
وف سنه معرفش كام برضه كنا رجاله ووقفنا وقفه رجاله
وان شاء الله في سنه .. هانكون رجاله ونقف برضه وقفه رجاله
معلش سامحينى مع احترامي الكامل لأنوثتك انا حاسبتك من الرجاله وهاتكوني في أول الصف
بنت بلد جدعه بصحيح
شكراً

ياسر سليم said...

مش انته لو حدك اللى حزين

فى معاك 70 مليون راس حزنانين

يعنى كلنا معاك

حسن ارابيسك said...

الأخ الكريم/ ياسر سليم
نورت المدونة
والحقيقة أنت زي مابيقولوا أخوانا في الشام كفيت ووفيت
الحقيقة في تعقيبك قلت معاك 70 مليون راس فعلاً هما بيحسونا عندهم في ذمتهم بالراس مش بيحسبونا بني أدمين
وشكراً لزيارتك الكريمة

Hannoda said...

كنت حزينة و أنا براها.. وأتفرج و أسمع و أتألم عليها

وأديني جيت أزورها و أطل عليها

إتوجعت عليها أكتر و أكتر

ربنا يحميها

حسن ارابيسك said...

hannoda
يعجبنى فيكي
إيمانك بالحاجه اللي بتحبيها
نورتى مصر ونورتي مدونة متواضعه اسمها فضفض

حـريــة الــفـكــر والابــداع said...

اشعارك جميلة زى فرشايتك

حسن ارابيسك said...

حرية الفكر والابداع

شكرا لاطراءك الجميل

وكلنا في مركب واحدة
المدونة نورت

walaa said...

جميله قوى يا حسن
انت كتبتها عندى فى المدونه وانا دلوقتى بتصفح مدونتك وجدتها اسمحلى ارد عليك
بس اوعى تتريق عليا وتقول ايه العك ده ممكن

والحزن ماسك فى قلوبنا قوى
والجرح دابح اوصالى
يا اللى انت كنت زهره فى السما منوره
اصبحت يا مصر دلوقتىورده دبلانه
والبستان اللى كان حرسك خانك
وقسمك يا مصر وباعك لأغرابك
والكل واقف فى مكانه مش راضى يتحرك علشانك
يامصرى قوم وكفياك نوم
مصر مدبوحه مجروحه وبتنده عليك
العدا خدوها من ايد اللى خنوك
قوم هز الارض برجليك وخدها من اللى باعوك وخنوك
قولها جاليك وجايب بكره فى ايديا
ومهما نقاسى يا مصر علشانك
عمرنا ما نقدر نوفيلك احسانك
يا مصرى قوم هات الربيع بأيدك
مصر بتصرخ وبتنده عليك

حسن ارابيسك said...

ولاء
اشكرك من كل قلبي على متابعة بوستات المدونة القديمة

وصدقيني اللي كتبتيه ده بصرف النظر عن أي مناهج أو قوانين شعرية أو قوالب معينة
صدقيني يكفينا ان ما دونتيه هنا انه طالع من القلبوزي ما بيقولوا من القلب للقلب رسول
وده لانه صادق طالع من احساسك الصادق وقلبك الموجوع
تحياتي لكي ياولاء

واحده من أصحاب القمر said...

في قديمك يا ارابيسك

احاول ان ابكي او اضحك فأعلم انك قادر علي ان تجلعني استجمع ضحكي الباكي في نظره مشرقه بين اخشابك المتشابكه
يا صديقي مثلك انا حزينه علي بلادي
وحزني فاض عني ليسلبني كلماتي وحريه الحروف بعيده المنال

دمت كما كنت مبدعا

حسن ارابيسك said...

أميرة
واللهي ده حالنا كلنا انتي وصفتيه في تعليقك المدهش ده
اشكرك على تواصلك المتدفق هنا
تحياتي
حسن أرابيسك

amrlord2012@yahoo.com said...

انا على فكرة شفت الكلمات دى جوجل بالصدفة دخلنى هنا لكن بجد الكلمات دى جميلة جدا جدا وملهاش حل وانا غنيتها بصوتى ويريت تسمعها يا استاذ حسن
وهتعجبك وتعجب كل الى هيسمعها بجد
ودا رابط تحميل مباشر للاغنية
http://rghost.net/42045999


حسن ارابيسك said...

الأستاذ/ عمرو
الحقيقة أحزنني أنني شاهدت التعليق متأخر جدأ جداً وحزنت عندما فهبت للفايل على الرابط ووجدته محذوف
تحياتي