.

.

ارسم الدور للنهاية

Monday, July 11, 2011




ارسم الدور للنهاية
وانت قصادي بتبتسم
عيشني في دور البطولة في حياتك
أوحتى جوه لوحة بتترسم
وان الفرح زيه زي الجرح
لازم ما بينا يتقسم
إرسم الدور للنهاية
وانا بعمل نفسي عبيطة
واني مش فاهمة حاجه
واني ساذجة وبسيطة
وان رد فعلي زي بحر ميت
ملوش موج..وميته مش غويطه
إرسم الدور للنهاية
ومد الكدب خطوتين
خطوة بتغمي القلب
وخطوة بتعمي العين
مد الكدب وما تجرحش
قلب لساه ضعيف
مايستحملش
خليه يفرح كمان يومين
وماتستعجلش
دي النهاية جاية..جاية
وبكرة الدور يجي عليا
فما تقلقش
إرسم الدور للنهاية
واطلع على مسرح أحلامي
وزيف ليا الحلم
إخلطلي العسل بالسم
وصول في كدبك وجول
ورُص في كلام معسول
حرك إيديك وسبل عنيك
واتحرك في مشهد درامي
من اليمين للشمال
ومن الشمال لليمين
وأقف وإنحني قدامي
وإحلف ألف يمين
أنك معايا هاتكون كريم
وإني من دون كل الحريم
توهب لي أضعاف ألف ليلة وليلة
وإني لما أحتاج ليك
تضمني في حضنك
من غير مكر وحيلة
إرسم الدور للنهاية
وانت معاك صك الكدب
على وشه مصرح ليك بالكدب
وعلى ضهره إنك إنسان مبتعرفش تحب
لابس فوق وشك ألف وش
تنزل بيهم سوق القلوب وتغش
واخد الحب لعبتك وتجارتك
تتباهى وتبين فيه شطارتك
لكن ماتشتريش
زي أي بياع سهل عليه يبيع
والبيع في هواك غية
وكل شئ يؤتمن بين إيديك يضيع
ومالوش عندك دية
وترمي دية... وتنسى دية
وتنسى إنك
مشيت
وحفيت
وجيت
ورميت همومك في نهرى
ووقت الشدة شلت عنك
وحملت فوق ضهري
ويوم الأسر فديتك ودفعت فيك مهري
ومديت إيديك وغَمست لقُمتك من شهدي
وحليت وشربت عسلك من شفايف نهدي
وعملت قلبي فرشتك وبيتك
وحبيتك
وراضيتك
وصدقتك
زي كتير ضحايا
راحو بين رحايا
وعودك وكذبك
زي كتير ضحايا
ماتو بقربك
وتحت رجلك
جوه لوحة بتترسم
وانت بدم بارد
واقف وبتبتسم

حسن أرابيسك

22 دورك في الفضفضة:

shemo_ joker said...

السلام عليكم...


تسلمممم ايد حضرتك بجددددد حلووووووة اووووووووى


http://shababek-shemo.blogspot.com/2011/07/blog-post.html

دا بوست جديد فى مونتى عاوزة اعرف رايى حضرتك...

دومت مبدع
فى رعاية الله
shemo

راجى said...

جميلة ياباشمهندس

Sheroo said...

حسن
جميلة اوى اوى بجد رائعة بكافة المقاييس
حسيت كل كلمة فيها و صدقتها
بجد تسلم عليها
والله مش عارفة اقولك ايه غير تسلم عليها

شمس النهار said...

صح

وانت بدم بارد
واقف تبتسم

نهاية موفقة لقصيدة

فعلا ختامه مسك

شمس النهار said...

صح

وانت بدم بارد
واقف تبتسم

نهاية موفقة لقصيدة

فعلا ختامه مسك

ذو النون المصري said...

اؤيد قول شمس النهار
و انت بدم بارد واقف تبتسم
موقف جميل جدا كنهايه للقصيده

Ramy said...

http://search.4shared.com/q/1/%D8%B1%D9%88%D8%A7%D9%8A%D8%A9%20%D8%A7%D9%84%D8%A8%D8%B4%D9%85%D9%88%D8%B1%D9%89

دة لينك تقدر تنزل من عليه

رواية البشمورى


الموسيقى رائعة على فكرة

ماشية مع لون المدونة و الكلمات

لا شكر على واجب

انا لسه مقرتهاش على فكره

(:

هانى زينهم said...

كل سنة وانت طيب يا أستاذ وربنا يعيد عليك الايام كلها بخير انت وكل الناس اللى بتحبهم .

ذو النون المصري said...

كل سنة و انت بخير
رمضان كريم

عصـــــــــــام الــــديــن said...

رمضان كريم يابوعلى
اشتاقك كثيرا
واشتاق ابداعاتك
اتطلع للقاكم اخبرك بااستقرارى فى القاهره وعملى بها فهى تحتاج الينا اكثر من بلاد الغربه حبى وتقديرى

engy said...

عودا حميدا
بوطبعا تسلم ايديك وبجد تحفه
بس لازالت الحياة على نصل السكين هى المفضلة عندى اللى بقراها لغايه دلوقتى

سهــى زكــى said...

وحياة دى النعمة وحياة دى النعمة انت واحشانى موووت ، وانت غالى عندى جدا جدا يا سونا باشا ، وزيارتك لمدونتى بتبقى هدية ونيشان لى اصلا ، والله انا اللى بيمنعنى عن زيارة مدونتك الغالية وتحيتك الدائمة هو تقصيرى فى دخول النت اصلا ، وحياة النبى يا شيخ متزعلش حلفتك بقى خلاص بقى ، الله ، احنا فى ايام مفترجة ،كل سنة وانت منور الفضاء بابداعك ، ويا سيدى مش عايزين نعرف انت مين ، براحتك ، اذا كان ده مريحك ، وعلى فكرة هو مريح ، اهم حاجة انك تفضل موجود ومنور كدا بلوحاتك العبقرية وقصائدك المدهشة واللى بصراحة بحب اللوحات اكتر منها ، مفنياش من زعل ، صباحك فك ومساءك ورد وكل سنة وانت طيب يا اطيب رجل طيب

يا مراكبي said...

:-)

عدد 2 بوست مُتباينين جدا

الأول .. البطل مش طايق حياتُه كُلها بسبب غياب حبيبته .. أصل في الحب يابوعلي الواحد بيشوف حبيبته في كل حاجة وبيبقى عايزها قدامُه طول الوقت .. أنا فاهم الشعور ده قوي

البوست التاني هي بقى اللي مش طايقاه .. طبعا مش هُمّا هُمّا نفس أبطال البوست اللي فات .. بس واضح إنها مكسورة منه قوي .. وده برضه شعور أنا فاهمُه

الأهم من التعليقين دول .. هو إنك بدأت تحترف الكتابة بالعامية .. وده بجد شيء جديد .. أحييك

ســـــــهــــــــــر said...

و لو تنزف قلوبنا الحب
تسيل الاهه من جوه
تجيب الحزن بالقوه
و كان ساكن ف جدرانه
و ينطق صوته احزانه
و تتساوى ساعات كونه
بساعات موته
و ساعات موته
يكون ارحم
و مين اظلم
من اللى بينبش الاحزان
و جرح القلب يوم ما ينام
و لا جراحه بتداوى
و تتساوى
كده ايامه
لا عيد يفرح
و لا مع نسمه يوم يسرح
ولا بتزوره احلامه
و ادامه
الامل يهرب
بلا اسباب
يقوم و يرد قلبه الباب
---------------
جميل النص و استخدامك للعاميه لكن الاجمل و الملفت هو الكلام على لسان المرأه

مميز كالعاده

حسن ارابيسك said...

أشكر الجميع كل أصدقاء مدونة أرابيسك على تعليقاتهم ووقتهم في قراءة محاولات بسيطة مني في التدوين
كما أنني أحببت أن أرد على تعليقاتكم قبل سفري لسيوة وقضاء الاسبوع الاخير من رمضان على أرضها وبين ناسها
فكل عام وأنتم بخير وأشوف وشكم على خير
تحياتي


shemo_ joker
أشكرك على زيارتك الجميلة وعلى اتاحة الفرصة لي لقراءة ماتدونين
تحياتي



مهندس راجي
أنت دائما هكذا تجبر الخواطر بلكة أو إثنتين
تحياتي


Sheroo
يكفيني الحقيقة أن إحساسها وصل إليك وفي هذا سعادة لي
تحياتي


شمس النهار
أشكرك على إطراءك وإعجابك بختامها المسك
تحياتي


ذو النون المصري
أشكرك على تأييدك لشمس النهار وإتفاقكما يسعدني
تحياتي


عصام الدين
الأديب والطير المهاجر حمدا على سلامتك وربنا يوفقك وان شاء الله يكون لنا لقاء وهذا شرف لي
تحياتي


Engy
أشكرك يارقيقة بورسعيد وانه ليسعدني احتفاظ ذاكرتك ببعض كتاباتي اشكرك من قلبي
تحياتي


سهى ذكي
الروائية والكاتبة الرائعة
أشكرك على زيارتك ولكن اكرر ما قلته لكي في مدونتك أنني لم أقصد على الاطلاق انقطاعك عن مدونتي ولكن عاتبتك بشكل مباشر على تعليقاتنا لديكي وعدم نشرها احيانا او عدم الرد بوجهة نظرك
من الاخر انتي انسانة جميلة لاغبار على ذلك تحياتي لكي ولنهنوه
تحياتي


يامراكبي
أذيك ياباشمهندس
أشكرك على وقتك وتحليلك الذي يضفي دائما نكهة خاصة لتعليقاتك على تدويناتي
تحياتي



سهر
أذيك ياسهر
ايه الشغل الجميل ده ، شغل معمول بحرفية ومعانيه جميلة كما أشكرك على إطراءك
تحياتي

tota said...

مش عارفة بجد اوصف احساسى بيها حسيت كل كلمة كانها بتقول حجات جوايا وكانها بتتكلم عنى جميلة بجد تسلم اديك
واحب اقول لحضرتك انك بارع جدا فى كتاباتك بجد وتنظيم المدونة كمان شئ رائع بالتوفيق دايما بازن الله

سمراء said...

دي بتبقي فترة بتقبل فيها الكدب وبتعمل عبيطة
يمكن يكون احتياج
ويمكن يكون خوف
ويمكن يكون لذة في الالم
لكن بعد فترة بتفقد احتياجها
او تتخلص من خوفها
او تكره الالم
ووقتها بيحس هو بالاحتياج او الخوف او الالم
لكن بعد فوات الاوان
اشكرك
سمراء

هانى زينهم said...

عم حسن :
كل سنة وأنت طيب يا عمنا وربنا يعيد عليك الأيام بخير انت و أسرتك الكريمة وإن شاء الله تكون فى أتم صحة وخير . معلش مقصر معاك والله بس إنت عارف ظروف الوفاة اللى عندنا . ربنا يديم المعروف ويطمنا عليك دايما

وينكى said...

كل سنة وانت طيب يا ارابيسك
ماكتبتش بقالك كتير
اكتر من شهر غياب اكيد فيه حاجه غلط
اتمنى تكون بخير وتكون رجعت بالسلامة

تحياتي ومودتي

MKSARAT - SAYED SAAD said...

حسن
انت قدرت تخلي الواحد يحس بالحزن وهو على وشه ابتسامة
بجد دمت مبدع
تحياتي، وكل عام وانتم بخير

تحياتي

hana said...

ما أروعه حديث قلمك على لسان الأنثى

يحمل بين طياته الكثير من مشاعر الحزن

الممزوجة بنفحات الالم من قلب ينزف

دمعاُ ملون بطعم الحقيقة الحارقه

نص راائع الحديث

ونبض قلم كما عهدته دوماً يعلم كيف هو
الطريق للقلوب

سلمت أستاذي وسلم حس القلم

ومذاقه المختلف وسلمت رشيتك التي أعشق تفاصيلها

دمت بروعتــك




وكل سنة وكل يوم فيها أحلى من اللي قبله

هنــا

حسن ارابيسك said...

Tota
أشكرك جداً على الكلام الحلو ده وعلى إعجابك بهذا الشكل في الكتابة وفي تنسيق المدونة ويمكن ده لأنك متذوقة جيدة للجمال ويارب دايما أشوفك هنا كل مع كل تدوينة جديدة
تحياتي


سمراء
صديقتي العزيزة وفيلسوفة العشق والحياة
أضم صوتي لصوتك بالطبع حول التغير الذي يمكن أن يحدث بع ذلك
أشكرك ياسمراء على متابعتك وتحليلك القيم والجميل
تحياتي


هاني زينهم
الأخ والصديق الخلوق
ولايهمك يكفي سؤالك وعدم انقطاعك عن المدونة وأكرر اعجابي بتدويناتك الأخيرة وأدعو الله أن يصبركم على هذا الإبتلاء ويرحم موتاكم وموتانا وموتى المسلمين جميعاً ونتمنى أن نسمع عنك كل خير دائماً
تحياتي



وينكي
جميلة وشقية المدونات
أشكرك على سؤالك والحمد لله انك ماشاء الله اليومين دول نشيطة في التدوين وتدويناتك الأخيرة فعلا بطعم وينكي الذي اعتدناه دائما، ومتحرمش من سؤالك ربنا يخليكي ليا
تحياتي



مكسرات سيد
صديق التدوين الودود
دائماً وأبداً لك كل الشكر على هذا الود الذي لاينقطع وعلى وقتك في قراءة وتحليل كل تدوينة تنشر هنا، ربنا يديم المعروف بينا
تحياتي



هنا
رقيقة الحس والمشاعر وصاحبة الذوق والعناية الفائقة في قراءتها لكل ما أكتب وكل ما يسكن روح الكلمات عندي لذلك لكي عندي من المكانةوذوقك ومجاملاتك الرقيقة باحساسها العالي لقلمي ومدونتي المتواضعة التي تستمد جمالها من جمال ورقة وود وتشجيع مدونين مثلك أعتز بهم كثيرا واللهي وأدعو الله أن لايحرمني منكي ولا منهم
تحياتي