.

.

واحد بيفضفض

Tuesday, June 5, 2007

نوعين من الأكل ما أحبهمش
أكل الأونطة *** وأكل حقوق الناس

إتنين صعب اشرب منهم
لا اشرب مقلب*** ولا اشرب من البحر

وسيلتين من المواصلات ما أحبش اركبهم
بساط الريح *** وحصان طروادة

عمليتين في الحساب و الضرب معملهمش
ضرب واحد في واحد عشان عيب** وضرب السجادة بالمنفضدة لما تقول يا بس .

بالنسبة للنظافة نوعين من المسح أكرههم
مسح الجوخ *** ومسح يزحلق

وضعين ما أقدرش أنام عليهم
فلوس واخدها من حد*** وأمل كداب

نوعين من الحبوب ما ينفعش أزرعهم
حــب الشبــاب *** وحــب ولا طالش

همهمتين بيمسخوا الكلام
هم يا جمــل *** وهم برجــر


إتنين من السواقين ما أحبش سواقتهم
واحد سايق الهبل على الشيطنه *** وواحد سايق فيها

ورغم إني مثقف حاجتين ماأحبهمش في الأدب
أدب القرود *** وادب زايد عن حده


ميزتين أحبهم في الآ آنا
analyze أناناس*** و

سكتين أحب أمشي منهم
سكة السلامة ** وسكة ابو زيد عشان كلها مسالك

بنات بحبهم ودايماً مصاحبهم
بنات أفكاري *** وبنات ما تختشيش

نوعين من الستات أحبهم وأموت فيهم
سته على سته *** وسته ونص إلا خمسة

نوعين من العيون أحبهم بجد
عين الصيرة في مصر القديمة**وعين الشمس ما تحماشي

ونوعين من العيون لا أحبهم ولا أطيقهم
عين في الجنة **وعين في النار

نوعين من الشعر ما أحبهمش
شعرة معاوية** وشعرة ساعة تروح وساعة تيجي

نوعين من الدهب أحبهم قوي قوي
دهب في سيناء** ودهب طارق علام

نوعين من الأهل مش موجودبن الأيام دي
أهل المغنى*** وأهل السماح

حاجتين ما أحبش اتشعلق فيهم
الحبال الدايبة*** والمواسير البايشة

حاجتين ما أحبش أدخلهم في بعض
التهريج في الجد *** وفردتين الشراب في بعض

صنفين من الكراسي مش موجودين في بيتنا
كرسي السلطة ** وكرسي الإعتراف

إتنين من الطيور بخاف عليهم من انفلونزا الطيور
الطير المسافر ** والطير المهاجر

أُمهات لهم مني كل تقدير واحترام
اُم علي في الحلويات ** وأم الخلول من فواكه البحر

نوعين من الوشوش برتاح لهم
وش القهوة ** ووش القفص

حاجتين بحبهم في الجد
هالله هالله عالجد ** والجد هالله هالله عليه

37 دورك في الفضفضة:

shera said...

adini geet aho, mal2etsh wala 7afla wala me7amar wala meshamar. bas la2eet kalam gameel gedan. well done.

حسن ارابيسك said...

متشكر على تشريفك وإنك أول من قص الشريط وكنتي منوره جميع وسائل الإعلام وإنتي بتقصي الشريط الأحمر بأناملك الرقيقة
لكن صدقيني وجودك في حد ذاته كان هو المشمر والمحمر وكل الحاجات الحلوة
لكن إنتي مشيتي على طول واضح إنك كنتي مستعجلة بدليل عدم تعقيبك على أي موضوع وهعموماً شكراً على جبران الخاطر في كلامك الرقيق

Ahmed Shokeir said...

اتنين اتنين

وبوست اوف ذي داي

توتة توتة said...

الله الله على الجد

كرانيش said...

انا مش هعلق عالبوست

انا هعلق عالاسم
انا بموووووووت فى حد اسمه صلاح السعدنى

وبموووووت فى شخصيه حسن ارابيسك وكل الشخصيات المماثله

وفقت فى اختيار الاسم

MiraMar said...

لو أحب النوووووور
أكيد هيكون نور اوضتي
والله ينور عليك
:)
تحياتي

قاسم أفندي said...

مدونة جميلة
لم استطع الا ان أقرأ كل ما كتبت من اول ام كلثوم والشاي والسجارتين والدراسة مرورا بموزاييك و صلاح جاهين و الشاي بحليب لحد الحاجتين دول
بس مستني اقرأ اشعارك بقي
تحياتي
ملحوظة بس صغيرة ياريت تلغي اختبار النظر اللي تحت ده عشان الناس اللي نظرها شيش بيش زي حالاتي بيسقطو فيه عادة

قاسم أفندي said...

http://www.nizar.net/poetry/balqees.htm
أي خدمة أنت تؤمر يا باشا
مقولتليش انت فين بالظبط؟
ومش ناوي تلغي لي اختبار النظر ده عشان خاطري؟

حسن ارابيسك said...

يا جماعه أنا شاكر ليكم كلكم على تشريفكم مدونتي المتواضعة وهي بالطبع من غير تدويناتكم ليس لها طعم
فتحياتي لكل من
Shera
Ahmed shokeir
توته توته
كرانيش
ميرامار
قاسم أفندي
صدقوني إنتم فعلاً منورين المدونة
وأتمنى نقدكم الجاد على بقية البوستات
وأنا لم أدخر جهداً في زيارة مدوناتكم الرائعة وقد كنت أتنقل بينهم كالنحلة عندما تتنقل من زهرة إلى أُخرى

توتة توتة said...

حسن ميرسي جدا
و معاك حق اسمي حلو اوي
و انا اللي اتشرفت بيك دايما
انا عندي مشكلة في التعليقات انا فاشلة جدا

منة الله said...

حسن
ادعوك للمشاركة في استطلاع راي

عن اكثر عشرة مدونات تاثيرا في قرائها

عل مدونتك واحدة منهم

اليك الرابط

http://www.6ef.blogspot.com/

حراس الحقيقة said...

السلام عليكم
المدونه رائعه بجد ما شاء الله
والرسومات اللى فيها حلوه جدا صحيح انا فاشله فى الرسم بس بحب الرسومات والابداعات عمتا
على كل وفقت
شكرا

Sampateek said...

:)
ظريفة جدا
فرصة سعيدة


تحياتي

Sampateek said...

اشكرك على منحي رابط مدونة الشاعر
فعلا تستحق الزيارة

تحياتي

Carol said...

لو كانت كل الفضفضة كده
يبقي فضفض على رحتك يا عم :)

حراس الحقيقة said...

سألت سؤال فى المدونه عندى ويهمنى جدا اعرف رأى المدونين و ازاى هيجوبوه
عسى ان تعم الافاده
.
.
.
الدعوه عامه

masreya 3asreya said...

Ya hasan ya arabesc ana geit ashoof eih hekaytak wel dawsha elli enta 3amelhali 3al blog beta3i... bas el mawdoo3 yestahel:)

Ta7eyati we e7teramati lebda3atek el fadfadeya!

أنـــا حـــــــــرة said...

جامد

و اخر جملة فى الجون

حسن ارابيسك said...

Ya masreya ya 3asreya enty nowrty el blog one million watt
web3dean la dawsha wla 7aga el mawdoo3 wemafeh
ان ستي الله يرحمها قالت
الرِجْل تدب مترح ماتحب
وقالت كمان
مِن حبنا حبناه وصار متاعنا متاعه
ومِن كِرهنا كِرهناه ويحرم علينا اجتماعه
وبعدين معلقتيش على موضوع الكاريكاتير وتشابه الفكرة عندي وعندك في اللوحتين
ومرة تانية شكراً لتشريفك
بجد المدونة نورت بيكي
ويارب دايما تزرونا من وقت للتاني ومتغبيش كده فترة كبيرة في مدونتك

حسن ارابيسك said...

أنا حرة
سعدت جداً لزيارتك
وإستجابتك السريعة واضح إنك صاحبة واجب
وبعدين إنتي فكرتيني
بموضوع
blue bird
ده على فكرة طراز من سيارات نيسان كانت مشهورة في أواخر الثمانينات
وعلى العموم أنا سعيد إن تعقيبي جه قريب منك ولمس وتر حساس
بس فين التعقيب
المهم نورتي وشرفتي والمدونة محتاجه تشوفك تاني وتالت وعاشر

يا مراكبي said...

أنا فعلا سعدت بزيارتك الكريمة اللي خلتني أتعرف على المدونة الظريفة دي

ويسعدني متابعتها بعد كده بس ياريت تفضفض كمان وكمان .. خلينا نفضفض معاك

ياريت تحكيلنا كمان وكمان عن منيب ومنير وجاهين .. وسلم لي على فضفضة

حسن ارابيسك said...

يامراكبي
أخيراً ياباشمهندس مراكبي
مركبك رسى على شاطئ مدونتي
وده من حسن حظ مدونتي
واتمنى تكون قهوة الست فضفضة تكون عجبتك

و بالنسبة لمنير
أول عقد له مع أول البوم أمانه يابحر
كان مع شركة سونار - إسلام مقرها كان في جاردن سيتي -
عام 1977وكان العقد عبارة عن مدة إحتكار 7 سنين أعطوا لمنير عربية سيات كانت وقتها طالعه جديد وحكايه في ذلك الوقت
و راتب شهري مائه وخمسون جنيه
طبعاً بعد كده منير حس زيه زي اي مطرب بعد أول عقد إنه إضحك عليه

على فكرة مدونة أخونا محمد ياسر
في حب منير
أنا بكتب له فيها في التعليق
مقتطفات عن منير اذا حبيت تطلع عليها
لان كل فترة هاكتب في مدونته معلومة صغيرة في مشوار منير بالذات في بداياته

ومرة تانية نورت المدونة

يا مراكبي said...

ده شرف ليا أنا .. ودي معلومات قيمة جدا .. أنا كنت برة مصر لحد سنة 1982وأول ماعرفت شركة سونار كان بعد كده مع أول ألبوم لعلاء عبد الخالق وحميد الشاعري

ماكنتش متصور إن الحكاية بدأت سنة 1977

كنت فاكر إن إنتاج شركات الكاسيت للمطربين الشباب بدأ في الثمانينيات

أتمنى إنك تقولنا معلومات أكتر كمان .. مع خالص تحياتي

س.أومرزوك said...

عزيزي المدون: ها نحن نفتتح بين أيديكم مجلة إسمها المُدوّن

سعيا منا في المساهمة في إقلاع ثقافي يهدف إلى تحقيق تنمية شاملة، وعلى جميع الأصعدة

المُدوّن
رؤية ثقافية تنقلك إلى آفاق لذة القراءة والمتعة والفائدة

فندعوك لتصفحها.. ونرحب بك صديقا وفيا ومراسلا مثابرا

فأهلا ومرحبا بك

--
مجلة المُدوّن
http://al-modawinmag.blogspot.com

محمد ياسر said...

حضرتك انا ايميلى
m_yasser_86@hotmail.com
و انا تحت امرك و يسعدنى تواصل حضرتك

تحياتى

حسن ارابيسك said...

الأخ امرزوك
سعدت بزيارتك
وقد قمت بزيارتك ولكن للأسف لم أستطع وقمت بمحاولات عديدة كلها باءت بالفشل أن أعقب على بوست - غريبة مراكش -
بسبب اختبار النظر
ياريت تشيل اختبار النظر لانه يسبب احيانا دائما مثل تلك المشاكل
وشكراً

MAKSOFA said...

الله.....
لخصت فلسفتك في الحياه بطريقه ساخره وجميله
شكرا علي زيارتك
وشكرا لأنك عرفتني بمدونه عماد

MiraMar said...

فين البوستات الجديده
عايزين ابداع
:)

اسكندراني اوي said...

الله ينور عييييييييييييييلك


بلوج 10/10
تحس انه داغ صاحبه متكلفه

حسن ارابيسك said...

اسكندراني

نورت المدونة
وجبت لينا معاك هوى اسكندرية وروايح اسكندرية الجميلة والمدونة فعلاً بقت كلها طراوه
يارب دايماً نشوفك باستمرار على خير

brastos said...

تدوينه طريفه جدا .. و خفيفة الروح .. تحياتي ليك

dodda said...

كله ماشى يا ابو على

الا عين فى الجنه وشعره معاويه
انا حتوسطلهم عشان تحبهم
الواحد لو يطول اى حاجه منه تبقى فى الجنه....
وشعره معاويه دى جميله اوعى تخسر الناس لان الجنه منغير ناس متنداس

والا ايه؟؟

حسن ارابيسك said...

brastos
متشكر لكل الذوق الجميل ده
تحياتي


dodda
اشكر فيكي تواصلك الجميل والمستمر ربنا يخليكي ليا يارب
تحياتي

The Queen said...

بصراحة تحفة
عبقرية في اختيار هذا الكم الهائل من الثنائيات
بالتوفيق

Najwa El Kholy said...

فضفضه جميله ودمك خفيف مع اني حسيت ان فيها سخريه فى حاجات وفيها صراحة برضه لحاجات تانية بسس عجبتني وجميله اوي الفضفضة دي

حسن ارابيسك said...

نجوى الخولي
بالفعل هي كده كما قلتي وأشكرك يانجوى بجد على كل قراءاتك لموضوعاتي بشغف وحب من يعشقون الكلمة
تحياتي

حسن ارابيسك said...

نجوى الخولي
بالفعل هي كده كما قلتي وأشكرك يانجوى بجد على كل قراءاتك لموضوعاتي بشغف وحب من يعشقون الكلمة
تحياتي