.

.

لطشة هوى

Monday, July 26, 2010














تعبت قلت كفاية استريح شويتين

حطيت باليت الالوان

على طاولة بين جدارين

وحطيت فرشة الرسم

في برطمان جنب فرشتين

قعدت على الكنبة بين المسندين

وعلى جنب مديت وفردت الدراعين

ورجعت ضمتهم تاني عالجانبين

وكأني طير بعد مشقة سفر

بيحط فوق عشه وبيلم الجناحين

بصيت على لوحة الرسم

الملامح نفس الملامح

والجسم نفس الجسم

سألت نفسي

بس ليه وشها طلع معايا حزين

فين ابتسامتها ..!مش عارف راحت فين..؟

ريحت ضهري وسندت راسي لورا

وورايا شباك شيشه مقفول

ووراه هوى بيصول ويجول

مديت ايدي فتحت الدرفتين

لطشنى شوية هوى

زي البلسم والدوا

أخدت شهيييييق

وطلعت زفيييييير

كأنه كان محبوس

بين جدران وأسير

وولعت غليوني

وغمضت عيوني

وفجأة

شميت ريحتها

سمعت صوتها

فتحت عيني

ماصدقتش

شفتها بتخرج من اللوحة

سندت بإيديها

ومدت رجليها

نزلت من على حامل اللوحة

معقول

ده انا لسة رسمها بإيديا

معقول

تنزل فيها الروح وتتجسد قدام عنيا

انعقد لساني

قربت مني

وقفت قدامي

اتكلمت

سلمت

أذيك ياحسن

معقول..!

معقول اشوفك تاتي ..!

معقول نتقابل تاني..!

مالك ..مضايق عشان شفتني .؟

أبدا واللهي بس مش مصدق عنيا

ياااه سنين ماشفناش فيها بعض

عارف كام سنة دلوقتي.؟

عددهم بالسنة وبالشهر وباليوم

بساعات الشوق والليالي وقلة النوم

وحشتيني فيهم كتير.. كتييييـر قوي

أسألي عني العليم المعين القوي

كنت بتعمل ايه ياحسن لما كنت بوحشك.؟

أمد إيدي في قلبي أطلع صورتك

ابص فيها أكحل عيني منك

وارجع اشيلها تاني

وايه تاني..؟

كنت اصحى قبل الطير والعيون

وأجري اروحلك

اسوق عربيتي بلهفة وجنون

وروحي المشتاقة

تسبقني وتروحلك

أخدلك معايا أجمل ورد

أقرالك الصمدية وكام وِرد

واقعد معاكي طول النهار

وليه مقعدش

و انتي الونيس والسكن والدار

وأيه تاني..؟

كنت أشوفك في كل لوحة رسمتهالك متعلقة عالحيط

وأقولك وحشتيني

كنت أتأمل كل حاجة ليكي لسة في مطرحها جوه البيت

سبتيها ليه وسبتيني

وأجري اطلع حاجاتك ومحتاجاتك من دولابك

أشمها أبوسها أحضنها وأكلمك وأقولك طال غيابك

ياااه ده انتِ وحشاني قوي

وانتَ كمان واحشني قوي

ياااه الجملة بترن في وداني زي زمان

كنتي بتقوليهالي في كل وقت وف كل مكان

لساكي بتقوليها بنفس طريقتك وحنيتك

ماتغيرش فيها إحساسك ماتغيرش فيها نبرتك

انتَ كمان ياحسن لساك زي ما انتَ

لوحاتك وفرشاتك

موسيقتك وخلوتك

وكنكة قهوتك

غليونك ودخانك

وبراد الشاي الدافي الأخضر

بس تعرف

ملامح الحزن فيك بقت اكتر

مالك كده مهموم والحزن معاك بيدوم.؟

مش عارف مخنوق وزايد معايا همي

عارفه

زمان لما كنت اكون كده كانت تحس بيا أمي

الله يرحمها تحط راسي على صدرها

تقولي فضفض ياحسن فضفض واحكي واشكي

اوعاك تكتم حزن يا ابني ولو عاوز تبكي ابكي

كنت ابكي وابكي وابكي

لحد ملاقي الغمة راحت

والنفس هديت ارتاحت

قالتلي شفت من بعيد انا حسيت بيك

وعشان كده النهارده انا جيت ليك

قربت مني أكتر

حطت ايديها على كتفي

وقعدت على حجري

وخدت راسي على صدرها

ضمتها بايدها في حضنها

وحطت خدها على راسي

وقالتلي

انا حبيبتك واهلك وناسك

وانت حبيبي وأهلي وناسي

ابكي ياحسن ابكي

اتسرسب من عيني دمعتين

نزلوا يجروا عالخدين

دمعتين نزلوا سوى

لطشني تاني شوية هوى

فقت .. فتحت عيني

لقيتها راحت من قدام عيني

رجعت جوه اللوحة قدامي

بس الحزن راح من ملامحها

وابتسامتها الحلوة رجعت تاني

مديت ايديا قفلت الدرفتين

ومسحت بايديا الدمعتين

ااااااااااه .... وبعدين معاك ياعم حسن..وبعدين فيك

هو انت كل ماترسملك لوحة لحد بتحبه وعزيزعليك

تحزن شوية

وتنزل دمعتين

حسن أرابيسك

33 دورك في الفضفضة:

حسن ارابيسك said...

لطشة هوى
هي إمتداد لحالة واحدة لتدوينات أخرى كتبتها من قبل
من تواصل معي من قبل سيكتشف ذلك بالتأكيد
أشكر كل من يتواصلون معي ولايبخلون ببعض من وقتهم لتلك المدونة التي تستمد جمالها واكتمالها بنقدهم وتعليقاتهم
تحياتي
حسن أرابيسك

حواء said...

ياه يا حسن لطشة هوى حزينة اوى انا كمان بكيت منها ومن زكرياتك بس تعرف برافو عليك بتقدر تشوف الملامح الغايبة بقالها سنين بقلبك طبعا وده معناه ان الزكريات دى كإنها لسة حياة عايشة جواك وماغابتش يعنى لسة حقيقة ناقصها بس جسد لكن الروح موجودة ... عجبنى اوى تعبيرك الجامد اوى ان كل ماتوحشك تمد ايدك فى قلبك تطلع صورتها تكحل بها عينك واكيد بتستمد منهم حياتك وقوتك المتدارية فى حزنك وزكرياتك .. واب شباك زكرياتك شوية يا حسن عشان الهم مايبانش عليك .. يابختك بتعرف ترسموبتقدر ترسم اللى بتحبهم ودى نعمة كفاية اوى انها معاك

افروديت said...

لطشة هوي... مش عارفه ليه ربط بينها وبين الموسيقي اللي في الباك جراوند جايز لأنهم قريبين اوي من بعض نفس الرقة والحزن واحد ... بجدرهيبة وروعة ومش أي حد اللي يقول الكلام الحلو ده.. تسلم يا شاعر الروعة والأحساس وده قليل بجد عليك

عصـــــــــــام الــــديــن said...

الاخ العزيز الفنان حسن ارابيسك

يااااااااااه يابوعلى
دى الحلقه التانيه من حاول تفتكرنى
نفس الوجوه والمشاعر والاحاسيس
نفس خط الدراما
فى الاولى وصفت لنا الحسين والحوارى واخدتنا شارع شارع لعند مادخلت المرسم ووجدتها وحضنتها وفى النهايه زرتها وقريت لها الفاتحه

الليله يابو على استحضرتها بفكرك وكان لطشة الهوى دى اعادت الى قلبك الحياه
الرائع حسن ارابيسك كلماتك معبره جدا جدا
واحاسيسك رائعه مثلى لن يجيد وصفها
اقترح مزج القصتين فى بوتقة روايه واحده
دمت لنا مبدع
واشكرك جدا على تعليقاتك الجميله لدى
تحياتى اخى العزيز

جنّي said...

السلام عليكم

ازيك يا عم حسن ..لعلك بخير لأ بخيرين ..قرأتها مرتين وفرحت بدل المرة مرتين .. احلامك زادت اليومين دول شويتين منذ حاول تفتكرني .. ولكن ان كانت احلاامك ستلد لنا هذه الابداعات فاهلا بها وبدل الحلم حلمين ..

بس منين جاتلك لطشة الهوى واحنا بنتنشق على شوية هوى في عز الصيف الملتهب .. لعله التكييف

فشكووول said...

السلام عليكم حسن بك
ايه يا حسن
الموضوع انت عملته مرتين
مره بالفرشه
ومره بالكلمه
والفرشه هى هى الكلمه
نفس اللون ونفس الطعم

بس اللوحه ما شفنهاش
والكلمه كانت حلوه حبتين
والقلب زايد احساسه مرتين
مره بالحب للحب
ومره بالحب للدنيا
ومره من عندى زياده للحبايب

تقولش صلاح جاهين رجع تانى
لأ ما رجعش بس الموضوع ارزاق
يعنى الكلام ايه اقل من اللى كان بيقوله صلاح جاهين
بس يا عم حسن زى ما قلت الدنيا ارزاق
تحياتى على هذه القصيده اللذيذه

فشكووول said...

تحياتى حسن بك
شوف يا سيدى
انا قلت اما افتح اشوف الدنيا فيها ايه
لقيتك كاتب لى تعليق انى بقول كلام ابراهيم عيسى

طبعا يا حسن بك انت لك وجهة نظر مع ابراهيم عيسى ودا حقك طبعا
لكن بقى يا سيدى انا بحب ابراهيم عيسى
بس مش معنى كدا ان انا بقول اللى بيقوله ابراهيم عيسى

اصل الحكايه ايه .. اقول لك الحكايه ايه

انا اول ما عملت مدونة فشكول كنت زى العبيط مش عارف اكتب فيها ايه وقعدت الخبط حوالى شهرين تلاته ومش عارف كام شهر كدا

واول بوست حقيقى كتبته كان يوم 29 سبتمبر 2008 وكان بعنوان حوار مع مصطفى كامل .,. وتقريبا يا عمنا انا اول واحد فتح الموضوع ده واول واحد انتقد الكلمه دى وبصراحه ما بحبهاش خالص
يعنى لو رحت عندى وفتحت شهر سبتمبر 2008 حتلافى الموضوع دا موجود
هو صحيح انا موافق مع ابراهيم عيسى على نفس كلامه

بس انا اللى قلت الكلام ده قبل كدا وقبل ابراهيم عيسى وقبل اى حد

انا ان شاء الله راجع قريب للتدوين عشان كل المدونين حبايبى وحشونى

لكن اثناء الاجازه وانا باشحن مخى وحاطط الشاحن فى الكبس بتاع الكهرباء لقيت فى سكتى كتاب اسمه الدوله المملوكيه ولقيت فى الكتاب حاجات تشيب لها الولدان
يعنى اكتشفت ان محمد على مش هو مؤسس مصر الحديثه
دا كان قبله واحد اسمه الظاهر بيبرس عمل فى مصر حاجات ما كانتش فرنسا ولا انجلترا ولا اى بلد فى العالم عملتها وكانت مصر اكبر قوه عظمى فى ايامه وقد ظلمه التاريخ كثيرا لما لمن يذكر مآثر الظاهر بيبرس وتقدر تقول انى اكتشفته من جديد

يعنى مصر يا عمنا اعظم وامجد بلد
فى العالم .. بس احنا ما نستاهلهاش ومن كتر حبى فيها باكرها ومش طايقها وكمان مش موافق على حكاية اننا ننفخ فى نفسنا قوى كدا ودا بقى على رأى ابراهيم عيسى

كنت انت اول واحد ازوره بعد الاجازه لكن انا مضطر ارجع للاجازه كمان كدا حوالى اسبوعين يعنى اشوفكم بخير فى رمضان

كل عام وانت بخير

hana said...

آآآه لو تعرف أد إيه الإحساس جوا كلامك
بيلمس القلب وبينزل الدموع وبيعيشنا وياه جواه لدرجة التوحد

دي مش لطشة هوى
دي بركان إحساس
دنيا تانيــة مبيوصلش فيها غير القلوب الدافية الرقيقة وبس
اللي قلمك دايماً بيعرف يعزفها

كل ما توحشك تطلع صورتها المحفورة جوا قلبك
تضمها بروحك بعنيك بإحساسك
هي كدة القلوب الدافية بتبئا فيها دايماً صورة الحبيب موشومــة
أروع صورة هي اللي بتتحفر في القلب بجــد

تعبيرات قلمك في منتهى الدفا يا فنان

إعجابي وتقديري وإحترامــي لقلمك مبدع الحس والروح
كن بخير دوماً

☼♫♪ عمــاد الدين يــوسف ☼♫♪ said...

استاذي الجميل ارابيسك
اصعب حاجه علينا احنا كبشر فراق الأحبه ، وخصوصا الفراق اللي يستحيل معاه التواصل ولو من بعيد كالموت . على أد ما الموت ساعات كتير بيكون رحمة لإنسان بيتعذب من مرض معين ، على أد ما هو أكيد هلاك بالنسبة للي بيفارق حبيب ليه ، لان فراق الموت بينقطع معاه اي نوع من التواصل المادي ، علشان كده بدعي ربنا يصبر كل انسان على فقيده ويلهمه الصبر والسلوان
تحياتي للأستاذ المبدع

حواء said...

حسن ارابيسك فنان مليان احساس .. وقلبه مليان مواويل وبكا وأهات .. عيونه مكحلة بلون الليل .. ولون بشرته بتحكى حكاية شعب مصرى اصيل .. بيحب الخير لبلاده .. وحلمه هو حلم الكون؟؟!!

engy said...

لو كل لطشه هوى ترجعلنا الاحبه
يبقى النعيم

اقصوصه said...

من زمان ما دخلت مدونتك

وحشتني هذه الصفحه

خاطرتك جميله واسلوبك عفوي

تقبل مروري

hana said...

إزيكـ يا رقيق الإحساس

يا مراكبي said...

أمد إيدي في قلبي أطلع صورتك
ابص فيها أكحل عيني منك
وارجع اشيلها تاني


أولا .. مبروك إنك بتكتب شعر بالعامية في 2 بوست ورا بعض

ثانيا .. أنا أحب أقولك إني دايما أمنية حياتي إني كل ما تزيد عليا الهموم أو يغلبني الحنين .. بأتمنى إني ألاقي حضن يحوطني .. أحط رآسي جواه وأغمض عيني وأناااااام


حضن يحتويني بجد ويحس بيا بجد
أخرج من جوايا كل الهموم والأحزان

بس للأسف .. تلاقيه فين الحضن ده؟

Sheroo said...

أول مرة أشوف المدونة
وأول مرة أقراها وبجد تستاهل على البوست ده إنحناءة إحترام
هستنى المزيد يا سيد حسن

hosnysoliman said...

سلام حسن باشا بيجماليون..احساس جميل رقيق معبر عن مكنون الصدور..ملؤه لفة وشوق وحنين صادق.
الاخ العزيز حسن انا مدون قديم..حنيت وقلت ارجع تانى لمكان جميل عشت فيه سنين مع صحبة جميله..الا ان الدنيا اخذتنى بعد حين..وه انا اعود رغبة فى استرجاع ما فات من صحبة واصدقاء ..الا انى اكتشفت ان ما اخذنى اخذ الاخرين..والان اعود بحثا عن صحبة واصدقاء..ومن حسن حظى وفى تجوالى وبحثى صادفتنى مدونتك الرقيقه..امل ان اكون احد المصحابين لك على مدونتك.

ولك منى الشكر الجزيل

فشكووول said...

الحق يا ارابيسك شيل اللينكات اللى عندك عشان انا لولا انى مش راضى اتعدى على مدونة حضرتك كنت شيلتها انا

كل عام وانت بخير
اعاد الله عليك رمضان بالخير واليمن والبركات وعلى كل المسلمين وكل المصريين

hana said...

إزيك يا فنان

كل سنــة وإنت طيب

رمضان كــريــم

Mostafa Abdelmoneam Badr said...

أنا مش هاعلق ع التدوينة
علشان أنا لسة مبتدئ
فى عالم حسن آرابيسك الرائع
أول حاجة شدتنى عندك
دورك فى الفضفضة
راقية قوى يا عم حسن
فيها كرم وضيافة وكرم ضيافة
بس رغم كدة أنا لسة كاشش أفضفض قوى
أصل كلامك بيجيب ودموعك بتجيب دموع
وقعدتك ما يتشبعش منها
حتى ضيوفك جمال والله
مع إنى باشوفهم عندى وفى مدونات تانية
بس هنا بيكونوا أجمل وأرقى
أنا فرحانإنى لاقيتك زى كدة ما فرحت أول مرة أروح شارع المعز من سيدنا الحسين
أنا عارف انك كدة فدرت مدى انبهارى وتقديرى.
كفاية كدة فضفضة علشان ماتقلش عليك.
انت جميل يا عم حسن

تقبل تحياتى

Mostafa Abdelmoneam Badr said...

شويتين,جدارين,فرشتين,المسندين
وفردت الذارعين
وبيلم الجناحين
كل الأحبة اتنين اتنين
شوية تحن لشوية
وجدار يحن لجدار
ودراع يرقص مع دراع
وجناحين ياخدهم الحنين لبعض
فيحضنوا الجمبين
صعبت على خيالى
أيوه خيالى بكى عليا فبل ما يبكينى
قال حرام الجفا ده كله
وراح لطم قلم على وش العقل خرسه
وقاله سيبه
يهلوس
يحلم
يتجنن
ماهو كدة برضه هايتجنن
سيبه ينسى نفسه دقيقه
قصدى دقيقتين

تقبل تحياتى

ذو النون المصري said...

اهلا حسن
انا عرفت انك محب للفن من خلال تعليقاتك عند الفنان حسني سليمان و سعيد جدا باشتراكنا في محبة الفن
كل عام انتم بخير بمناسبة رمضان الكريم

جنّي said...

السلام عليكم

كل سنة وانت طيب يا ابو علي

حواء said...

حسن ازيك رمضان كريم يارب تكون فى احسن حال انا مش ناسياك فى الكنافة والحمام المحشى ونصيبك موجود _ ووحوى يا وحوى

حواء said...

نسيت اقولك حلو النيولوك للبلوج دايما متجدد يا حسن بس ليه خليت التعليقات فى ويندوز لوحدها

Beram ElMasry said...

اخي الفنان والشاعر حسن ارابيسك
السلام عليكم ورحمة الله
رمضان كريم وكل عام وانت بخير واعاده الله عليك بالبركة ورضي عنك وارضاك وسدد في الخير خطاك
شكرا لمواساتك الرقيقة ولا اراك الله مكروه في عزيز لديك صداقتك لي تشد من اذري وتدفئ حياتي الجامدة بكرم اخلاقك
وكل عام وانت بخير

hosnysoliman said...

الاخ العزيز ابو على/كل عام وانت بخير..اشكرك لك تعلقيك الاخير بخصوص الفوتوشوب..صديقى العزيز..انا فى الحقيقة عندما تدربت على الفوتو شوب لم يكن برغبة فى الاحتراف ولكن الغرض معرفة كل ماهو جديد ويمكن الاستفاده منه..وفعلا قضيت سنوات احيانا مستعين ببعض الكتب وفى احيان اخرى قراءة الهلب..والحقيقة انى وجدت ان مجال احتراف الفوتوشوب والاعتماد عليه كأدة تعبير بديلا عن الرسم على اللوحة وبالفرشاه والالوان الحية..امر ينقصه الكثير..نفس الوضع عندما تقراء كتاب من على النت او ان يكون الكتاب بين يديك..الاله قد تعطى امكانيات اكثر ودقة اكبر..ولكن ارى انه كثيرا ما تفقد الاشياء روحها..ومع كل يمكننى القول انه حينما يضيع منى الالهام فى الرسم التقليدى..اذهب احيانا الى الفوتوشوب للتسلية لا اكثر ولا اقل..ومع كل هذا سوف احاول ان اجد الكتاب الذى قلت لى عنه بلا شك انه يمكن ان يكون مفيد للتعرف على ما لم اتمكن معرفته حتى الان.

عزيزى حسن/كل سنه وانت طيب ولا تحرمنى من زياراتك والتواصل الدائم.

حسن ارابيسك said...

تهنئتي القلبية
لكل المدونين الجُمال بمناسبة شهر رمضان
كل عام وانتم بخير

حواء
كانت جميلة قوي الجملة الأخيرة في تعليقك

وارب شباك زكرياتك شوية يا حسن عشان الهم مايبانش عليك
ثم أشكرك من كل قلبي على بيتين الشعر فانا لااستحق كل هذا الاطراء منك

تحياتي

افروديت
صحيح الباك جروند الموسيقية بتكون بعد تالت للعمل بتضيف له عمق تراجيدي، شكرا على إطراءك
تحياتي


انجي
قليلة كلماتك لكن تحمل الكثير من المعاني الثقيلة المعنى بكل ابعادها لجوهر العمل
تحياتي


اقصوصة
انتي كمان وحشتنيا قوي
ووجودك وقراءاتك لشغلي شرف لي
تحياتي


مراكبي
اذيك ياباشمهندس
لك دائشما وأبداً تعليقك المميز وبالطبع اسعدني وبشأن التهنئة مش اشكرك عليها لكن صديقي العزيز هل هي المرة الأولى التي تقرأ لي فيها العامية
تحياتي



عصام الدين
صديق التدوين الحميم
كم يسعدني تذكرك لكتاباتي السابقة وهذا الربط الواعي والجميل منك اشكرك من كل قلبي
تحياتي


جني
صديق التدوين الجميل
أعتز أيضا بذاكرتك القرائية لكتابات سابقة وشرف لي تذكرك لها وتذوقك
معلش استحمل شوية حر الصيف بلدنا ومالناش غيرها نعمل ايه اخنا احسن من ناس كتير
تحياتي


عمنا فشكوول
لو تعلم كم اسعدني تعليقك الرائع والمدهش
ثم الموضوع التاني ده انا ياعمنا فشكوول عارفين كويس جدا وعارفين قيمتك الأدبية والانسانية وبالفعل هو مجرد توارد خواطر
تحياتي


هنونة
الله يخليكي على الكلام الجميل اللي بتقوليه وإحساسك المتدفق بكل كلمة وهو مؤشر نجاح العمل بلا شك
تحياتي


عماد الدين
الصحفي المصري الأصيل
دائماً أستشعرك تصل لعمق كاتب العمل عندما يكتب وذلك ليس بغريب على كاتب مثلك له حس صحفي وشاعر واديب
تحياتي

-Cinderella
اشكر زيارتك الأولى لمدونتي
وأشكرك إطراءك الرقيق
تحياتي


الفنان التشكيلي الكبير/ حسني سليمان
أولاً الف حمد على سلامتك في عالم التدوين وبالتأكيد هو شرف لي أن أقرأ لك هنا نقد أو تعلق اي كان ونقدك بلا شك يثري اي تدوينة لي
ولا شكر على واجب بشأن موضوع الفوتو شوب ربنا يوفقك ان شاء الله
تحياتي


مع إصراري
واللهي كم أسعدني زيارتك وكم اسعدني شعرك وهو يسير بتوازي ادبي مع شعري وهو شرف لي بلا شك ولا شك ان لديك ماشاء الله موهبة نتمنى ان نرى لها المزيد
تحياتي


ذو النون المصري
يعلم الله مقدار سعادتي بناقد ومتذوق مثلك له قيمته العالية في عالم الفن التشكيلي فمن قراءاتي لك استمتعت بتحليل رائع للوحات كبار الفنانيين التشكيليين
تحياتي


Raul
Thank you so much for the nice comments & I'm glad you enjoyed them
Thanks for sharing & welcome in any time



بيرم المصري
شاعرنا الكبير
اشكرك على مشاركتك برغم ما تمر به أعلم من ذكريات يملؤها الشجن والحزن على رفيقة الدرب اسكنها الله فسيح جناته ..أمين
تحياتي

شكراً لكل من ساهم بتعليقه الجميل ليثرى من هذا العمل المتواضع
تحياتي لكم جميعا
وكل عام وانتم بخير

حسن أرابيسك

Hannoda said...

بيكت مع كلماتك اللي ماليانة صدق و احساس مش طبيعي

مش عارفة احكي معاك في تفاصيل الاحساس اللي جوة كلامك ولا عارفة احكي في تفاصيل احساسي بيه

يمكن عشان بقالي زمان مش بحكي
بس انا مش عارفة ايه اللي سحبني من سكوني و خلاني جيت.. باين جيت ادور على كلام يلمس احساس بدور عليه
و لقيته بالضبببط في الوقت الصح
:))

بسجل اعجاااااب قوي جدا يا ارابيسك
من أجمل ما كتبت

ومن أجمل ما قرأت انا عن الشوق

حسن ارابيسك said...

هنودا
ياااااااااه
بقالك كتير خطوتك مادبتش على عتبة باب المدونة
وأنا عارف إن حالة التدوينة دي لو قرأتها واحدة زي هنوده بتعمل فيها ايه من كتر اللي شاهدته وقرأته لديك من حالة الحزن التي تظلل دائماً مدونتك
هنودا
كل سنة وانت طيبة
رمضان كريم

someone in life said...

قولي يا أبو علي
لوواحد راجل همام مركز و سلطة و مال
ياخد عربيته قبل الطيور ما تصحي و قبل الشمس ما تفرد شعرها الدهب و في عز برد الشتا و يطير علي بيتها بقلب كله شوق و حنان

ده اسمه اية؟
و الدنيا بتفرقنا ليه ؟

Najwa El Kholy said...

قالتلي شفت من بعيد انا حسيت بيك
وعشان كده النهارده انا جيت ليك
قربت مني أكتر
حطت ايديها على كتفي
وقعدت على حجري
وخدت راسي على صدرها
ضمتها بايدها في حضنها
وحطت خدها على راسي
وقالتلي
انا حبيبتك واهلك وناسك
وانت حبيبي وأهلي وناسي
ابكي ياحسن ابكي
اتسرسب من عيني دمعتين
نزلوا يجروا عالخدين
دمعتين نزلوا سوى
لطشني تاني شوية هوى
فقت .. فتحت عيني
لقيتها راحت من قدام عيني
رجعت جوه اللوحة قدامي
بس الحزن راح من ملامحها
وابتسامتها الحلوة رجعت تاني

روعة الاحساس والمشاعر ولطشه الهوى جميله عارف انا حسيت بان لما الانسان يفقتد اعز انسان عنده فعلا بيبقى فيه تلاقي اروح ويا اما يظهر فى منام او فى لوحة زي اللي رسمتها او فى حلم من احلام اليقظه ويحس انه فعلا موجود معاه ولما بفتح عنيه يحس انه مبسوط وفرحان عشان اطمن عليه وعشان وحشه كتير .....انا ساعات لما بتوحشني امي الله يرحمها بشوفها وبحس بيها وبتكلمنى وبقوم فرحانه عشان حاسة بيه ....ربنا يسعدك يا حسن .....ويبارك فيك

حسن ارابيسك said...

أشكرك يانجوى من كل قلب على وقتك في قراءة تدويناتي المتواضعة

حسن ارابيسك said...

someone in life
صديقتي العزيزة
أنتي إنسانة جميلة الروح
تحياتي