.

.

Monday, March 28, 2011











بفضفض لهم
ولايزهقوا
ولايشتكوا
ولايتململوا
ولايتندموا
بفضفض لهم
لما يتكرمش في وشي فرحي
لما تتحجر فيا ملامحي
وتتشقق وتبلع جواها شفايف ضحكتي
بفضفض لهم
لما ينحني فيا عودي
ويحزن لحني في عودي
وتتمطع وتتقطع أوتار العشرة بينا والوصل يهجرغنوتي
بفضفض لهم
لما الغربة تتمايل وتغويني
والترحال يرافقني يخاويني
والغيمة تستعفى وتستقوى عليا تملى عيون سكتي
بفضفض لهم
لما تضيق عليا أرضها
ولايسعني طولها وعرضها
وتسجني بين جدرانها وتسلسل سنيني وخطوتي
بفضفض لهم
لما ينفض عني الرفاقة أول الليل
والقاني في وحشة وويل
بتلفت حواليا مش لاقي ونيس في صحبتي
بفضفض لهم
لما يقرب مني ناس
ويبعد عني ناس
وأسأل نفسي هي دي سنة الحياة ولا دي سنتي
بفضفض لهم
لما حبيبتي كتيرتوحشني
والشوق جوايا ينهشني
ألقاني بأدعي ربي يجمعنا من تاني ويقبل دعوتي
بفضفض لهم
لما يوحشني منها شفايفها
وطعمها اللي لسة باقي على شفايفي وشايفها
بلح زغلول أحمر شفايفه طارحه على شفتي
بفضفض لهم
لما يوحشني منها تنطق باسمي
وصوابعها تتسحب تفك زراير قميصي وتلمس جسمي
وتهمس لقلبي انت حبيبي وانت دنيتي
بفضفض لهم
لما بحن ليها تصب الحب فوق راسي وضهري
تغسلي عمري من هموم دهري
وتطيب علتي
بفضفض لهم
لما أتخنق ودمعي يتمرد ينزل ويعصاني
عشان كتير حلفني ووصاني
أعتقه يسيل على خدودي ويبل مخدتي
بفضفض لهم
لما يغيب عني أحباب
ويتقفل عليا باب ورا باب
بقفل وترباس أنا واللي ماتتسمى وحدتي
بفضفض لهم
ولا يزهقوا
ولا يشتكوا
ولا يتململوا
ولايتندموا
بفضفض لهم
... اللاب توب... وفنجان قهوتي

حسن أرابيسك

22 دورك في الفضفضة:

راجى said...

ربنا يخليهم لك :)))))
ازيك يا باشمهندس يا فنان
ليك وحشة والله

حواء said...

والله وحشتنى فضفضاتك يا حسن .... بس كويس ان فى حد بتقدر تفضفض له حتى لو كان لاب توب وفنجان قهوة تقول ايه بقى للى حتى مش لاقى حد يسمعه حتى لو كان القلم والورقة مش عايزين يسمعوا مش عايزين يكتبوا ويفضفضوا مع ان الكلام كتير لكن الحروف تايهة ... عجبنى تعبيرك اوى " هى دى سنة الحياة وللا سنتى " قوية جدا .... بس عايزة اقول لك حاجة انا كمان لا بزهق ولا بشتكى وبتململ ولا بتندم بس فضفض انت ومالكش دعوة حتلاقينى انا شاء الله زى اللاب توب وفنجان القهوة ... دامت فضفضاتك ودمت شاعر ورسام وفنان جميل يارب دايما بخير ... تحياتى

تامر نبيل موسى said...

الفضفضة شىء جميل

وبيريح الانسان كتير عندما يشغلة امر ما

تسلم على البوست المميز

مع خالص تحياتى

Israa' A. Youssef said...

الله عليك.. :))

عصـــــــــــام الــــديــن said...

السلام عليكم يابو على يافنان ياجميل
يارب تكون بخير
وحشتنى اركان مدونتك ووحشتنى كلماتك المعبره ... كلماتك المولوده من رحم الثوره .. المعطره بريحة الشهداء
حلوه مصر يابو على .... بجد كان وحشانى ... بلدنا المتغربه فى سجون الحرميه من 30 سنه رجعت تانى لولادها ... اخدتنى الدنيا بعيد عنها واقصرت فى حقها ... لكن خلاص ماعدشى هتغرب عنها تانى ... هزرع جذورى فى ترابها ..هرتوى من شهد الحانها ...هكتب اسمها على باب بيتنا ..هى عنواننا

تحياتى

MKSARAT - SAYED SAAD said...

الصديق العزيز حسن
اشكرك انك فاكرني وسألت عليا ربنا ما يحرمنى منك يا ابو على واتنمي المقال الجديد يعجبك انا نزلت الصورة والكلام هيكون قريب

نيجي بقي للفضفضة الجميلة بتاعتك حسيت وكأني بتمشي في شوارع مصر وبشوف ميت وش و وش بشوف فرحة ناس وهموم ناس تانيه بشوف ملامح متشوقه وملامح محرومة بشوف حب وهجر بجد مجموعة جميله من المشاعر والاحاسيس عبرت عنها بصدق وببساطة وده سر جمالها انها مصرية
بس خلي بالك اللاب توب وفنجان قهوتك ممكن يغيروا لأننا شاركناهم جمال احاسيسك يا بختنا
كون بخير
سيد سعد

hana said...

ومن غيرهم يحس بينــا لما تملي الدموع عنينا لما يضيع غالي علينا لما نحس قسوة الدنيا مفيش غيرهم بيسمعوا ويحنو مفيش غيرهم بيخدونا في حضنهم مفيش غيرهم فعلاً بيسموعنا ويحسونا ويفهمونا مفيش غيرهم بيدونا كل وقتهم وعمرهم ما عاتبونا ولا إشتكوا

جميل يا فنان بجد
جميل الحرف والإحساس
وحشتني كتباتــكـ الدافية
وإحساسها اللي صعب يتكرر غير هنا وبس
سلمت ونبض قلمك دوماً أستاذي وصديقي الغالــــي


ميرسي لسؤالكـ الرقيق عني على فكرة

هنــاا

مدينـة من النسـاء said...

ربما هي بعض سطور أو سطح منقوش ببضع حروف وفنجان قهوه
هم أعمق حتى من ذاكرة الإنسان
فالعمر يمضي وما مضى لن يأتي
لكنها بعض حروف تحمل كل الحكايا
ربما يطويها غلاف .. ربما يطويها حتى بعض ركام
لكنا ستبقى
ستحمل صوتاً عجزنا أن نحترف النطق به لنبقى .. وفضلنا السكوت
لكنها أقوى
لقد فعلت ما لم يستطع ان يحمله انسان

hana said...

بونجور
إزيك يا فناان

حسن ارابيسك said...

باشمهندس راجي
ربنا يخليك واشكرك على ذوقك

حسن ارابيسك said...

حواء
عندك حق بس الواحد ممكن يفضفض لنفسه حتى
تحياتي

حسن ارابيسك said...

تامر نبيل
صديق العزيز بالتأكيد الفضفضة جميلة وعلاج ووقاية من امراض كتيرة
تحياتي

حسن ارابيسك said...

ISRAA
متشكر جدا جدا

حسن ارابيسك said...

عصام الدين
صاحب الصفصافة الجميلة
كلامك موجع بجد ويمس القلب
وربنا يرجع كل الطيور المهاجرة وتستقر في بلادها عن قريب
تحياتي

حسن ارابيسك said...

سيد صاحب احلى مكسرات
دائما لكلامك وتعليقك نكهة وطعم مميز لايسعني الا أن اشكرك على مشاركتك الادبية في تعليقك الجميل
تحياتي

حسن ارابيسك said...

هنا
لكل انسان شيئ قريب منه يقدر يفضفض له
أسعدني تواجدك الجميل ومجاملتك الرقيقة التي لاتفارقك
تحياتي

حسن ارابيسك said...

مدينة من النساء
مدينتك الادبية تحمل دائماً شيئ من شخصيتك الادبية والشعرية المتدفقة بتعليقات توازي عمل ادبي رائع
تحياتي

hana said...

ليست مجاملة مني على الإطلاق إن حق القول هي تواضع منـــكـ أستاذي وصديقي الرائــع دوماً

norahaty said...

كما قال
الباشمهندس
راجى:أنت فنان

حسن ارابيسك said...

norahaty
أشكرك على مجاملتك الرقيقة

Carol said...

وانا كمان بفضفض لهم
لما يكتر الكلام جوايا
و الافكار تكون زحمة
لما فكرة تلمع مرة واحده
عجبني كلامك :)

حسن ارابيسك said...

Carol
صديقتي الجميلة اإحساس والمعنى والحرف
أشكرك واللهي من قلبي ومش عارف أقولك أيه على قراءة ما فاتك من تدوينات لي ولكني أعلم بالطبع أن هذا ديدنك في عالم الأدب
تحياتي