.

.

طبــق فــول مدمس

Monday, July 16, 2007









طبق الفول المدمس مُنذ الصغر وأنا مُحب له ثم عاشق له ثم مُتيم به وكانت سعادتي لاتوصف حينما المح عربه فول في طريقي وكأنني على موعد مع فتاتي فاذهب لعربة الفول مُسرعاَ اشعر وأنا اقف أمامها بين كثير من العشاق من المغرمين والموعودين بطبق الفول اشُعر أنني أحتضنها وأنظر إلى قلبها بفرحة الصابرين بعد صبرهم وقلب عربة الفول هي قدرة الفول وكان إعجابي يفوق دهشتي حينما أنظر إلى البائع وهو مُمسك بمغرفة الفول ذات اليد الطويلة فأشعر أنني امام لاعب هوكي مُحترف يجيد اللعب بعصاه .. بمغرفته فيُدخلها في غَيَبَتِ قدرة الفول وهي تعرف كيف تشق طريقها جيداً داخل عتمة القدرة كما تعرف الأم وليدها وسط زحام البشر وهي معصوبة العينين ، فتخرج لنا برشاقة متناهية بما لذا وطاب وهي على يقين أن في إنتظارها دوائر صغيرة من الأطباق تنتظر دورها لإلتقاط حُبيبات الفول اللؤلؤي ومائه الساحر، ويكمل البائع الحركة الرابعة عشر من الجزء الثاني في إفتتاحية سيمفونيته الرائعه لملحمته الخالده وهو يُمطر طبق الفول بوابل من التحابيش الضرورية والمهمة وكأنه فيتر..طيار حربي يضرب ويقذف ويرمي بكل مالديه من صواريخ واسلحة وذخيرة في ساحة معركته وهي طبق الفول من ملح وكمون وفلفل ودقة وشطه حسب طلب الزبون وتتلاعب يده وأصابعه بقنينات الزيت وأنواعِه المختلفه في الهواء كما يتلاعب المايسترو بعصاه وهو يرفعها ليسقط منها زيتاً حاراً أو حلو أيضا ً حسب طلب الزبون، كل هذا اراقبه وأنا في حالة من الإعجاب حتى أدخل في حُلم يقظة واتخيل نفسي مكانه وأتحرك بنفس رشاقته يميناً ويساراً واتعامل مع كل أدواته بحنكة وخفه ، كل هذا من أجل طبق الفول أصبحت من أصحاب أحلام اليقظة.
أقف على عربة الفول وأطلب طبق الفول المعتاد بالزيت الحلو وأظبط بجانبه حزمة بصل أخضر وقرنين فلفل أخضر يشرحوا القلب وأعصر نصف الليمونة التي أنعم على بها بياع الفول وأسحب لي رغيفين عيش ابيض كبير يفتح النفس من على قفص عيش بجانب عربة الفول وأبدأ في إفتراسه كما لو كنت أسداً متوحشاً جائعاً صادَ له فريسة بعد ايام من الجوع وزقزقة البطن ، هم هم .. همممهمهم ياسلاااااام متعة مش عاوز اتكلم مع حد عاوز أكل الفول وبس
وبكده أكون إستمتعت بسمفونية فولية مدمسية مصرية ،
وبسبب هذا العشق مع الفول كنت إمارس لعبة بياع الفول هذة في مطبخ منزلنا وأحاول أن أسترجع حركات بائع الفول المهم وصل بي الحال إلى أن إحترفت عمايل الفول بطرق متنوعة وبطرق إستحدثتها ،المهم أتقنت اللعبة ودخلت في عملية الفول المدمس من الألف للياء يعني فكيت طلاسم عملية التدميس وأسرارها وياسلام على ريحته لما تفحفح وهو على نار هادئة اُشاهد غطاء قدرة الفول الصغيرة وهو ينتفض ويرتجف نتيجة ضغط البخار وكأنه يُعلن لي أننااصبحنا قاب قوسين او أدنى من إلتهام حبات الفول في طبق أو في ساندويتش.
المهم صادف وأنا في الخارج كان لي صديق سوداني يعشق الفول من يدي على الأخص وكانت زوجته الأوربية لاتأكل الفول المدمس المهم في إحدى المرات وأنا في زيارة له ليلاً..
قال لي ايه رايك يا ابو علي تتحفنا كده يازول بطبق فول من عمايلك وكان جوابي له طب ومراتك هانسيبها تتفرج علينا ؟ ..
قال لي عنها ما كلت إحنا ناكل وننبسط ونعيش مع طبق الفول
وعلى الفور دخلت مطبخهم وكأني ماصدقت ليس لتوفير حق العشاءأبداً وإنما لكي اُمارس هوايتي ، وكانت النتيجة طبق فول سرفيس كبير عملتله شوية ديكوريشن يعنى كان شو حكايه، المهم جلسنا انا وصديقى عثمان السوداني نأكل لا بل نفترس طبق الفول ومراته قاعدة قصادنا تتفرج علينا ، لكن سحر الفول إشتغل بدأت ريحته الجميلة تُعلن عن نفسها.. أاااه ها هي روائح الشرق القديم قطعت ألاف الأميال جاءت بسحرها وعِطرها لتغزو أندلُسيةً أخرى، والظاهر رائحة ونكهة الفول دخلت نخاشيش صاحبتنا مراته ، المهم صاحبتنا قربت علينا وإستأذنت في لقمة صٌغيرة للتجربة ليس إلا " تقولوا أيه على النفس " المهم حضرتها جربت لقمة.. ولقمة جرت لقمتين ولقمتين جروا أربعة وأربعه جروا عشره وعشرة جروا رغيف ورغيف جر رغيفين عرفت وقتها أنا وصديقي إن مراته رجليها جت في المعمة وبقت من المدمنين والموعودين وفعلاً مافيش مرة أزورهم فيها إلا وتقولي خسن بليز فووول والمصيبة إني لقيتها مرة عازمة صديقاتها وأنا موجود عندهم وكانت زوجة صديقي اخبرت صديقاتها بقصتها مع عِفريتًُ من الجن آتى لها بكل سحر الشرق في طبق فول مدمس وقالت لي خسن بليز اعمل لنا طبق فول وقتها أنا قلت في نفسي أ.......ا بقا هو أنا طباخ ابوكي لكن عشان خاطر عيونه هو وغلاوته عندي مش جوزها طبعاً لا ده الفول ،دخلت واتشمللت وعملت وجهزت وابدعت وبعد ما طفحوا الفول المدمس المُحدث كله ولحسوا الطبق لحس وعلى فكرة الأجانب معندهمش عيب في عملية اللحس دي سواء كان طبق أو كبايه يعني زي الصيني بعد غسيله ، ماخبيش عليكم فرحت قوي وقتها بالفول المدمس وبالجون اللي جبته فيهم وإتمنيت لو إن مصحلة الجوازات في بلدنا تسمح لي بوضع صورة فوتوغرافيا مقاس 5×8 لطبق الفول بجانب صورتي في جواز السفرأ المهم حسيت بأعتزازي بطبق الفول وإني مانسيتوش في الغربة هو والشاي الكشري وشراب العرقسوس ،وقتها حمدت ربي إن ما فيش حاجه خدتني منهم زي
American Coffee with Milk

و Chocolate Chip Cookies
ما خدوا ناس كتير

46 دورك في الفضفضة:

SaSo said...

تصدق انت جوعتنى جداااااااا
اقوم يلا اعملى طبق فول بقا

حسن ارابيسك said...

saso
نورتي مدونة فضفض
ودي صورتك وانتي صوغنونة
واضح انك كنتي جعانة فعلاً يادوب قرأتي طبق فول ويافكيك عموما بالهنا والشفا وما تنسيش تدشي فحلين بصل جنب طبق الفول
واشوفك تاني على خير

Tigress said...

3la fekra, ana ostazet tab2 fool beta3 youm el gom3a, belshata el 7amra wel basal we kol mayomken ala tatkhailo, 7aseb 7aseb:)
bas besra7a ana all week nescafe we kalam faregh, we fool friday and saturday bas:( 3ndak 7a2, el donia khadetna.. tigi ne3ml fool day?
nice story and lovely way of tellign it

كراكيب عادل said...

ليك حق تسمي نفسك حسن اربيسك

دي الاصالة يا ابو علي

انك تفضل تحن لكل حاجة

وتقنع بيها غيرك

انا الموضوع عندي في البوست دة اكبر من مجرد طبق فول

الي عايز تقولة وصل

بس البوست الجاي اكتبلنا الطريقة

:)

حسن ارابيسك said...

TIGER
وحشاني واللهي
وعلى فكرة الموضوع ابتدى معايا بفول لكن بعد كده بقيت غاوي أكلات وبعمل شغل عالي قوي فايف ستارز وليا أكلاتي الخاصة وتسمايتها وكل أصدقائي عارفيناها زي بيضز هوت خلي بالك مش بيتزا هت وليا مشروب مشهور أيضا بين أصدقائي انا مسميه مشروب حسن ، وليا اسراري الخاصة في أكلات وطرق عمايلها وأنا سعيد جداً بطبق الفول بتاع يوم الجمعه ده المهم قوليلي على العنوان عشان اجي وأدوق وأحكم بس أوعى تكوني بيتجيبي بصل أمريكاني مالوش ريحه و تأثير على العين
على فكرة السودانيين عندهم جمله جنسية مرتبطه بالفول عرفتها منهم
لما كنت قاعد مع مجموعه منهم وواحد وكنا في الشتا وواحد منهم قال ده جو فول وقتها فهمت خطأ لكن عرفت في حينها المعنى وكان يقصد انه محتاج واحده معاه في الجو البرد ده
وبالنسبه لاقتراحك ياريت فول داي مع كل اكسسوارته اللي تخدم عليه يعني قاعدين على الأرض على شلت وصينية نحاس كبيرة عليها طبق الفول بجانبنا جذع شجرة متعلق عليه لمبة جاز وراديو قديم من بتوع زمان وموسيقى شرقيه قديمة أو تركية قديمةواكسسوارات المكان كلها شرقي بلدي صدقيني الموود هايبقى عالي قوي
وبعدها تيجي الشيش ووصينية الشاي فيها براد الشاي والكبايات والنعناع الأخضر بعد كدة نبتدي الفضفضة ونفضفض نفضفض نفضفض نفض .ض....خخ...خخخخخ هايه تيجر اصحي انتي نمتي ولا ايه

حسن ارابيسك said...

كراكيب عادل
أخيراً ياراجل شرقت مضيفةأخوك حسن أرابيسك
عموماً شكراً لتعقيبك وأنا من خلال متابعتي لبوستاتك القيمة عارف إنك تقدر تحلل الموضوعات وتوصل للمضمون بسرعة ويارب دايماً كده مكركب الدنيا عندنا هنا في البلوج وتاكل معانا شويه فول عشان يبقى عيش وملح
وعلى رأي الحكيم رُبا أخاً لم تلده أمك اكل معك طبق فول وبالهنا والشفا
ونشوفك تاني وتالت وعاشر

حواء said...

ده ايه العشق الجامد اوى ده طيب ماتقولنا طريقة من الطرق دى اصل انا كمان بحبه وبحب الطعمية اوى بس وهى سخنة ... تحياتى

يا مراكبي said...

حلو قوي البوست المدمس ده يا أبوعلي

أنا شامم الريحة من أول ما دخلت المدونة ونفسي هفهفت أول ما لاقيت عنوان البوست

الفول ده فعلا عجيب ومحتاج دراسة أكاديمية بجد وجد .. تأثيره علينا كمصريين -وأحيانا الأجانب- عالي جدا وعمر ما الواحد يزهق منه أبدا مهما كان

مافيش شقة فول هدية بقى؟

حسن ارابيسك said...

مراكبي
عربية الفول كلها تحت أمرك ياباشمهندس
شقه شقتين فول بزيت حلو فول بزيت حار فول بالسمنة البلدي
شامم الريحه مش الناس اللي كلوا قلبنا وودانا بالمطبخ الفرنسي وروايح المطبخ الفرنسي

وهيلا هيلا هيلا
يامراكبي
شد القلوع يامراكبي

FATMA said...

انت بتكتب حلو اوي و تدوينتك واضح انها بتتقدم بسرعة

طريقتك في الكتابة عجباني اوي

حسن ارابيسك said...

توته
مايجيش بعديكي حاجه
أهُه بنحاول محاولات ناجحه محاولات فاشلة محاولات بتتعجز على بعضها يعني على قدنا
مشكورة لزيارتك

atef zromba said...

فضفضة بحق ... مخدومة برسومات معبر
الله عليك يابوعلى

atef zromba said...

نسيت أهنأك على إختيارك لأعمال فنان جميل حبيبي أ. محمد الطحان

حواء said...

انا دخلت مدوة عماد محفوظ لاقيت فيها كلمات عجبتنى اوى وجميلة فعلا بس دورت عللى غيرها مش لاقيت هو مش كتب حاجة غير دى بس ؟؟ اشكرك

حسن ارابيسك said...

bocycat
شكراأ لتواجدك معنا بس على فكرة أنا حاولت مراراً وتكراراً أعلق عندك ماقدرتش مش عارف ايه المشكلة عندك
وبالنسبه لمدونة نافذة عماد الراجل ده عند كتير

حسن ارابيسك said...

atef zromba
دش شرف ليا كبير حضرتك تكون منورنا هنا كدع فعلاً المدونة هاتعلى أسهُمها في بورصة المدونات كله بفضلكم ودعمكم وبالنسبة لأعمال الفنان الطحان هي فعلا أعماله من الأعمال التي أعتز بها فيها من تراث بلدنا وفلكلوره وفيها السهل الممتنع في التعبير بريشته وكون حضرتك تعرفه ده شئ يسعدنا جداً
مرحباً بيك مرة تانية ويارب نشوف تعليقاتك على طول حتى لو كان ضرب نار
مايهمكش

soha zaky said...

حسن .. مدونتك دخلت نافوخى وآثرت على عقلى الباطن زى ما فحل البصل المحترم بيعملها لما تحبك معايا فول وبصل ع الصبح فى الشغل واقعد متنحة باقى اليوم ، ومش فاهمة حاجة ، بجد مدونتك طعمها وريحتها وشكلها حلو اوى ، والمود عاجبنى والله ... تحياتى للأرابيسك اللى فى دماغك ...

حسن ارابيسك said...

استاذي العزيز عاطف
ياريت تلغي إختبار النظر أسف مربع التعليقات عندك عشان مش عارفين نعلق عندك بسببه
وشكراً

حسن ارابيسك said...

سهى زكي
أهلاً أهلاً لولا سلامك سبق كلامك..
وأنا أقول ياربي أيه ده من ساعة ما فتحت المدونة ولسه ماتدخلتش وواقف على الباب شميت رائحة بخور وشفت خيالات وحاسس في حاجه غريبه بتحصل في المدونة على طول حسيت وفهمت وعرفت إنك شرفتي وعشان كده مدخلتش على طول وقعدت أقول أشتاتاً اشتوت يالا إمشوا روحوا الخرابة وسيبوا البيوت
حابس حابس كابس كابس
اطلع ياعفريت
ان كنت قالع ولا لابس

لا بجد فرحان بزيارتك ليا دس يا ست سهى وبعدين ده انتي لسه معلقه طازة يارب دايماً كده طازه على طول في كل اعمالك الجميلة
نورتينا

Layla said...

تحيا جمهورية الفول المدمس....احلى حاجة في مصر عربيات الفول والقهاوي...غير كدة مفيش

Hannoda said...

ماشي يا أبو علي

ايه الخدع ده؟؟
تبدأ لنا البوست بوصف أثبتلي إنك كاتب و صاحب خيال ممتع.. فإندمجت

وبعدين قلبتلنا على كوميديا لذيذة... قلنا مافيش مانع
بس في الآخر تختمهم لي بدمعة .. ماشي أنا موافقة علشان خاطر أجمل جملة في البوست
*************
حسيت بأعتزازي قوي بطبق الفول وإني مانسيتوش في الغربة هو والشاي الكشري وشراب العرقسوس وقتها حمدت ربي إن ما فيش حاجه خدتني منهم زي

**************

عارف لما قريت اللي كتبته ده حسيت براحة
حسيت إني صح ومش غلط لما بيقولوا عني إني غاوية أعذب نفسي بمصر في غربتي

أنا صح لما كل يوم برسم ملامحها على الحيطان و وشوارع الغربة
وحتى على كفوفي عشان قطر مليانة صحرا وفضا و مش لاقية حاجة أرسم عليها

وواضح إن السودانيين مأثرين على مدونتك.. ده بإفتراض إن البنوتة العسل اللي فيالصورة ده سودانية

أصل الدم بيحن برضه يا زول

Carol said...

أولا شكرا على العزومة الشهية دي
:)
فتحت نفسي على الأكل
ثانيا شكرا على المدونة دي رائعة و محترمة و مختلفة لها طابع مصري أصيل تشم رائحة النوبة و النيل و الابتسامات البسيطة النابعة من القلب فيها
شكرا أيضا على رسوماتك و اللوحات التي تضعها لفنانين مختلفين
تحياتي لك

انا رايحة أدورلي على علبة فول عندنا :)

كرانيش said...

من هنا ومنموقعى هذا

احب ابعت سلام كبييييييييييير

لعم محمد بتاع الفول واشكره جزيل الشكر لانه عرفنى ازاى آكل فول مدمس

ومعلش يا مستر حسن

هبعت سلام اكبر من سلام عم محمد
للريس اللى اتاحلنا الفرصه الجميله دى
ان الفول يبقى فطار وغدا وعشا

الأستاذ جمال بيه said...

بسم الله
ووالنبى لو فيه فحلين بصل قدامك بصيهم

حسن ارابيسك said...
This comment has been removed by the author.
حسن ارابيسك said...

honnoda
ماشاء الله عليكي
أنا قلت التنوع ده احسن عشان ماتناموش مني وانتم في حالة قراءة للبوست فكان لابد من النقلات دي
وبعدين قلت قلت لنفس ياواد ياحسن ياارابيسك إتفلحس وأعمل زي بتوع السيما وإعمل إسقاط في حكايتك المدمسة دي وبكده أكون أول واحد يعمل إسقاط مدمس
بجد مبسوط بيكي قوي

حسن ارابيسك said...

carol
انتي من الناس اللي أنا بهتم بكتاباتها لان أعمال ك كلها فيه لمحة إبداع عن جد مش مجاملة عشان كده كنت مستني تعليقك بفارغ الصبر لكت الظاهر لما دخلتي المدونة ماكنتيش بتقراي كنتي بتشمي وبس ومستغرب شميتي كل حاجه
رائحه النيل والنوبه والإبتسامات والبساطة ومشمتيش ريحة البصل اللي مبهدله الدنيا دي
عموماً تسلميلي يا قمر

حسن ارابيسك said...

كرانيش
تصدقي زعلتيني
يعني بعد ده كله فول مدمس وبصل واللذي منه وتقوليلي
يامستر حسن
ايه دخلتي عليه المدونة ولاقيتيني باكل جاتوه وباتون سليه وبايجل
عموما ياكرانيش الله يسامحك
لحد النهارده ماقلتليش رايك في الشويه الإرتجالي اللي كنت كتبتهم عند
كرانيش كرانيش كرانيش
فاكراهم
شكلك بتنسي أي حاجه
لكن عشان خفة الدم اللي مابشوفهاش على حد تاني مسامحك

حسن ارابيسك said...

الاستاذ جمال البيه
ياعم فحلين بصل بس شوال بصل بس انت شرفنا على طول
وبلاش شغل محطة مصر ده نشوفك عالسريع ونسلم عليك عالسريع كده ماينفعش الكلام ده

soha zaky said...

يا عم حسن ترحيبك الزائد عن اللزوم كسفنى بجد ومش عارفة اعمل ايه وشى احمر اوى ونهنوه ارتبكت ومش عارفة تدخل ولا تخرج ، المهم احب اقولك انت أزاى عرفت موضوع البخور والحركات الخزعبلاتية دى عموما انا فعلا ببخرلك المدونة الجميلة .

حسن ارابيسك said...

Marvel
ايه ياعم السرعة اللي انت فيها دي
يادوبك حييت علم المدرسة وجرى نطيت من على السور
مش كنت تقعد يا ابن الحلال تاكلك معانا لقمة
معلش المهم تعوضها المره الجايه ونتونس بيك اكتر من كده

حسن ارابيسك said...

سهى زكي
لا شكر على واجب
ده اقل شئ لإنسانة فنانة
تمتلك مثل هذا الإحساس الحي فلديكي رُقي في الكلمة المعبرة والصادقة بجد فنانة تملكت أدواتها عن تعب وكفاح وجهاد مع النفس والكلمةوالبشر والأزمنة والأمكنة
فكانت التجربة صعبة وثقيلة وثُقل التجربة كان أكبر من سنوات عمرهاسنوات عجاف من كل الإحاسيس الممكنة لكي تستمر الحياة ولكن لكونك من آولي العزم لم تبركي كجملٍ إستسلم بعد تيه ومشقه وحمل ثقيل على صنمه فبرك واستسلم لرمال صحراء ساخنة ملتهبه
فتمخضت التجربة بعد هذا الطلق الصعب والعنيد
عن إنشودة وملحمة من صراع المشاعر والكلمات كان لها عُشاقها من المدونين وكان لي الحظ أن أقف بين هذا الحشد لإتعلم ولو حرفاً واحدا

MiraMar said...

هههههههههه
الله عليك ياأبو علي
تسلم ايديك
طبق فوووووووول انما ايه

حكايه
متتأخرش علينا تاني
:)
بنجوع يا أخي
:)

كرم مسلم said...

السلام عليكم

هى دى الاصالة (طبق فول مدمس) أبقى أحجز طبقين فول مدمسين طبق لي وطبق لى
أصل انا طماع شوية فى حكاية الفول المدمس
وياااااه لو كان من عربية فول من اللى بتقف على المحطات مش محلات

حسن ارابيسك said...

miramar
تسلمي وبالهنا والشفا
وبعدين أنا ما بتأخرش عليكم في الأكل ولا حاجه
إنتي اللي على طول تلعبي في الشارع وافضل أنهده عليكي ياميرمااار إطلعي عشان تأكلي تقوليلي هالعب شويه وبعدين هاطلع
وبعدين انتي عارفه انا مايهونش عليه يحد يجوع في بر مصر المحروسة

حسن ارابيسك said...

كرم مسلم

نورت المضيفة
وبعدين ماتشلش هم ولا يهمك طبق فول أو طبقين اللي إنت عاوزه شوف لو قلت عاوز نجيب لك قدرة الفول والعربية لحد عندك مفيش مانع
نورت مرة تانية مضيفة أخوك ارابيسك

بهلوله said...

يسعد مساك يا ابو على
كان نفسى اجيب معايا بصله وشويه زيت حار ونعمل احلى دماغ فول وخلى الطعميه على انا
متشكره جدا على سؤالك عنى وانا فى المستشفى

حسن ارابيسك said...

بهلوله
هل هلالك
ايوه كده اخرجي واتفسحي وغيري جو شويه عند مدونة ده وشويه عند مدونة دي انتي بتقولي فيها ده الفول ده فعلا أحلى دماغ طبيعية الفول ده هبه من السماء للمصريين الغلابه اللي معهمش غير حق شويع فول ورغيفين
ومع ذلك المقتدرين شاركوهم في شويه الفول دول وبقى الفول دلوقتي في مصر زى العربية البيتلز الالماني لما هتلر أمر بتصنيعها عشان محدودي الدخل في الشعب يقدروا هما كمان يركبوا عربيات وبعدين شوفي دلوقتي ايه اللي حصل بقت البيتلز سيارة المرفهين والمقتدرين فقط
عشان كده انا خايف على الفول قوي في اليومين الجايين دول

حواء said...

على فكرة هو التعليق بيجى لى عالاميل الاول وبعد كدة بنزله عالبلوج وتعليقك وصلنى .. شكرا لك

حدوته مصرية said...

اعتقد ان الاجانب مبياكلوش الفول ابدا و بيتعبروه علف للحيوانات فكويس ان حد كله عشان يعرف ان الفول حلو و البنى ادمين بياكلوه
هو فى احسن من الفول

المفروض بقى تفتح مطعم بالفول المتميز بتاعك و اهو الزباين بقت موجودة من قبل المحل

تحياتى

حسن ارابيسك said...

محمد ياسر
لا الاجانب بياكلوه بس عشان عشان ما تقضيش عليهم الفول لازم يكون منزوع القشر ومفروم شويه في الخلاط
وبالنسبه لفكر المطعم يالله ايدي على ايدك دن احنا نكسب دهب
انا فاكر كاريكاتر قديم جداً لمصطفى حسين كان عباره عن
اتنين ستات بلدي قاعدين على كنبه قصاد بعض ومنهم واحد رقبتها ودراعاتها مليانه دهب وبتقول لجارتها ايه
وحياتك انا من يوم ماجوزي فتح مطعم فول وإحنا مابناكلش غير فراخ

hana said...

ياااربي تصدء نفسي آكل فول حالاً دالوقت أوه لازم بجد أعمل سندوتش هههههههههههههههه
إيه دة بجد وصفك نغم
أن بئا باموووووت في طبق الفول بحبه بجد
يعني احب اكول سندوتش الفول دة وأستمتع
وكمان بحب أعملو وحاجات تانية كثير
بحس بمتعه كدة غريبة وأنا بأخترع حاجات فوق الحاجات هههههههههههه

بس بجد مبسوطة أوي أجنبية لحست الطبق وعشقته من الريحة
شكلها كانت واو بجــد يا فنااان
هههههههههه

أناإيه لمحت طبق الفول بره قولت أدخل أشوفك كاتب إيه عنه بحبه
بس كان لازم اكتب تعليق
إحسآآآس كلامك جميل

حسن ارابيسك said...

الريقة هنا
اشكرك من كل قلبي على متابعتك وتعبك في الوصول لتلك التدوينة هي فعلاً تدوينة رائحتها مفحفحة قوي في المدونة كلها
اشكرك
تحياتي

Najwa El Kholy said...

جوعتني يا حسن بس بيني وبينك عندك حق فى كل اللي قولته والاجمل منه انك فعلا بتستمتع بعمل طبق الفول وتدميسه يعني حاسه انك مهتم جدا انك تعرف تعمل الحاجة اللي بتحبها من الالف للياء وبعدين فكرتني لما كنت فى مصر كان فيه واحد بتاع الفول بيقف قدام عمارة فاتن الحمامة كنت كل يوم انزل بدري واكل من عنده وفعلا الطعم والواقفة والناس من كل الفئات بتاكل بس انا بقى كنت بصراحة بحب اخد طبقى فى الاخر عشان اتفرج عليه وهو بيقلب الخلطة ويحضر البصل والفلفل الاخضر الحار كانت الريحة كمان جميله يااااااااااااااااااه ايام حلوة جدا ......عموما سردك للقصة ممتع جدا حسيت اني شامه ريحة الفول وشايفاك وانت واقف بتعمله واستمتعت بحبك لطبق الفقراء (طبق الفول) مع انه غالي اوي دلوقتى تسلم ايدك وقلمك وفنك واحاساسك يا حسن وليه عزومة فول عندك لما نتقابل ان شاء الرحمن فى مصر ...لك منى كل التحية والتقدير

حسن ارابيسك said...

نجوى الخولي
صحيح بحب اعمل الحاجه اللي بحبها واشكرك على مجاملتك الرقيقة لما اكتبه وأدونه
تحياتي

حسن ارابيسك said...

نجوى الخولي
صحيح بحب اعمل الحاجه اللي بحبها واشكرك على مجاملتك الرقيقة لما اكتبه وأدونه
تحياتي