.

.

قوس الكمان

Thursday, June 24, 2010












سحبت الكمان من مكان
كنت فيه قافل عليه
وانا كنت حالف من زمان
إني مش هاقرب إليه
وكنت خايف لإني عارف
هاييجي يوم وأحن ليه
وقبل ما امسك الكمان
قعدت افكر كمان وكمان
أعزف أيه..؟ أعزف أيه..؟
أه هاعزف حته فالس
حته تمام مش أي هلس
حته فالس يرقص معاها قلبي
وينشرح ليها صدري
وقبل ما أقول ياهادي
نط القوس عالأوتار وسحب سحبه
سمعت للأوتار صرخة ووجع وأنين
وكأنه جان وكان
محبوس في قمقم من سنين
قوس الكمان
حرام أنا مش ناقص بشويش عليا
هاتبقى انت والأيام كمان عليا
لا ياعم ارجع مكانك
وخليني في حالي
وخليك في حالك
لكن مفيش فايدة
قوس الكمان
واخدها مزايدة
سحب القوس عالوتر من فوق لتحت
نزلني من سابع سما لسابع أرض تحت
وكأنه أزميل حزن وبينحت في القلب نحت
ولسة هالملم في نفسي
وأخليني في يومي
وابعد عن أمسي
سحب القوس عالوتر من تحت لفوق
سحب روحي معاه لسدرة الأحباب فوق
والقلب مرزوع عالأرض بيعصره الشوق
قوس الكمان
طالع نازل عالوتر
زي السكين الباردة
يصرخ يئن منه الوتر
وصرخته في القلب فايته
قوس الكمان خلااااص بكفاية
دي السحبة منك بوجع وحكاية
لكن برضه مفيش فايدة
قوس الكمان واخدها معاندة
وكأنه في إفتتاحية عايدة
رعش القوس عالوتر
رعشة تفلق الحجر
ورعش القوس عالوتر
رعشة تحنن المطر
قوس الكمان شغال
واخدني من حال لحال
قوس الكمان يدور ويُنكش في المقامات الحزينة
من كردي لبياتي لصبا ومن حارة لشارع لمدينة
يدخل من مقام يطلع لمقام
وكأنه صوفي
وبيتنقل من ضريح لمقام
قوس الكمان
لابيهدا ولابيتعب ولابيرحم
يسحب من تحت لفوق
ومن فوق لتحت
وكأنه جوه القلب
واخد مقاولة
فحت وردم
وردم وفحت
قوس الكمان أنا في عرضك
اختم بقا أنا من الوجع تعبت ومليت
واهي دقني اهي لو طلعتك
تاني من الصندوق أو يوم للكمان حنيت
وبعد معاندة
وبعد مناهدة
قوس الكمان سمع الكلام وختم
مش عارف ختم ولا شتم
المهم اتهد حيله
وجنب الكمان إتمدد وراح في النوم
ورحت أنام أنا في سريري
لقيتني راح من عيني النوم
الله يجازيك ياقوس الكمان
قلبت عليا المواجع كمان وكمان

حسن أرابيسك

34 دورك في الفضفضة:

أنا - الريس said...

بعد السلام والتحية
انت راجل مية ميه
مش هقولك افتكاسة
اصلي مندوب م الرياسة
جاي يمسيك بالتحية
والكمان اللي انت جبته
لحن شجن
قلبي انخلع
وضلعي خبط في الضلوع
شكله انعجن

تسلم علي الكلمات
وليكن الله في عوني وعونك

عصـــــــــــام الــــديــن said...

السلام عليكم يافنان
وحشتنا كتير ياعم حسن

عصـــــــــــام الــــديــن said...

استاذنا حسن ارابيسك

الحنين للكمان هل يعنى العوده للاحزان ؟
الحنين للماضى؟
وحشنا قلمك وكلامك وحشنا اننا نشوف بوست جديد على المدونه الرائعه

وكأنه أزميل حزن وبينحت في القلب نحت
ولسة هالملم في نفسي
وأخليني في يومي
وابعد عن أمسي
سحب القوس عالوتر من تحت لفوق

جميل يابوعلى
دام قلمك مبدع

سمراء said...

وليه شايل جواك الالم
دة دمل لازم يتفقع
ينظف الجرح ويتقفل
ولما تمسك قوس الكمان
هتسمع كمان وكمان
احلي كلام يبني ويكبر
وبكرة يبقي اجمل

عندي قصة حب انتهت كنت بفتحها كل شوية واخرج من جوايا الألم
كانت الناس بتقول لى بتعزبي نفسك وانت بتحكي
وكنت بقول لهم لا دة الم العلاج ومرارة الدوا

سمراء

افروديت said...

رأيي بصراحة..أنت محترف أنالماقريت كنت بقول هوجاب الاحساس البعيدالصعب ده من فين..!تحياتي ليك ع موهبتك الحقيقية..سلام

جنّي said...

السلام عليكم

كيف حالك يا فنان ..

كمانك كمان وكمان

مستمر في عزف لحن الشجى والحنين

شكرا يا كمان انك جعلت ارابيسك يفن ويكتب ازجال

تحيتي

hana said...

أحياناً تأخذنا الأوقات للعبث في أ شيائنا القديمة كانه حنين لما فقدنا او لما زلنا نفتقدراحلين بداخلها غير باحثين عن آه او دمع
لكن باحثين عنا حينما كنا في يوم شعرنا انا ما كنا بغير
فيصحو الألم وتسقط الدمعات
وكنا نحسبها جفت

فنانا الرقيق الحس مرهف الشعور
لأحرفك نغم وحس ساحر يخترق الشعــور
ليأخذنا حيث هي الكلماات

دمت مبدع القلم شفيف الحس نقي الشعور
تحيتي محملة بنفح الياسمين

العلم نور said...

عايزين الولايات المتحدة الإسلامية تقوم لازم نودود لبعضنا عشان تقوم ..

ودود يا ودود .. وَدوِد .. ودوادا .. وَد (بفتح الواو).. وِد .. (بكسر الواو)

لازم تتودوادو بها (اشتغلوا وسبحوا بها .. صبح وليل .. ليل وصبح .. داخله خارجه .. خارجه داخله) وانشروها.

هانى زينهم said...

عم حسن :
ما كانتش سحبة ع الكمان اللى تقلب علينا كل المشاعر الحلوةوالحزينة دى يا عمنا !!
حلو انك تلاقى مدخل لمشاعرك وتقدر تعبر عنه بالشكل الفنى الجميل ده . واختيارك للكمان بالذات من دون الالات الموسيقية لفتة جميلة غالبا مقصودة لانه الوحيد اللى العازف بيروح وبييجى فيه بالقوس على نفس الاوتار زى بالظبط ما الحزن بيروح وييجى على القلب ليل ونهار . ده غير حزنه الواضح فى صوته حتى لو حاول يفرح ما بيفرحش . عشان كدة سموه الالة الحزينة .
كل اناء بما فيه ينضح وعمر اللى قلبه حزين ما هيعرف ـ يطلع لحن سعيد حتى لو حاول واجتهد فى ده .

نط القوس عالأوتار وسحب سحبه
سمعت للأوتار صرخة ووجع وأنين
وكأنه جان وكان
محبوس في قمقم من سنين
قوس الكمان
حرام أنا مش ناقص بشويش عليا
هاتبقى انت والأيام كمان عليا

عجبنى الجزء ده اوى . كلمة نط فيها اندفاع مقصود كأن الكمان ما صدق مسكت قوسه عشان يعبر عن حزنه مش يعبر عنك انت . ولا ن مشاعره زى مشاعرك الحقيقية فانت كمان استسلمت ليه ورقصت على انغامه زى ما بيقولوا . كمان المفردات العامية الكتير اللى هى شبهنا خلت الكلام قريب من القلب ومن الودن اكتر من المفردات التانية . يفضل الشعر الحر اللى انت بتجيد استخدامه جدا هو افضل تعبير عم مشاعر حقيقية اوى بيشترك فيها غالبا كل الناس .
تسلم دماغك وايدك واحساسك يا عمنا واعتذر للاطالة بس بجد ده نص اللى الواحد حس بيه لما قرى المقطوعة الموسيقية الحزينة دى اصل اخوك حزنان قديم وانت عارف !! سلام يا فنان

hana said...

إزيك يا أمير الإحساس
والفن والرقــة

روح الحياة said...

السلام عليكم...
عندما تعزف اوتار الكمان تطلق عنان دموع واهات ساكنة سجينة داخل مشاعر تخنقها الايام بواقع اليم ..
حينما تكون الكلمات نابعة من القلب تصل دائما وتمس القلب وهكذا تكون انت دائما ... تحياتى

حواء said...

ازيك يا حسن ... قوس الكمان موضوع جميل جداً واختيارك للكمان بالذات اختيار ذكى لأنه الالة الوحيدة اللى فيها حزن وشجن حتى لو القطعة الموسيقية فيها فرح .. والفالس رقصة رقصة حزينة .. متهيأ لى قوس الكمان ده قلبك ومشاعرك وزكرياتك الحزينة ورغم حزنها لكنها رومانسية جدا- مش عارفة ليه فكرتنى بالزمن الجميل - عجبنى اوى وانت بتزايده خليك فى حالك وخلينى فى حالى لكن مفيش فايدة ... الشجن لما بيملانا مفيش حاجة بتوقفه احنا اللى بنبقى عايزين الشجن ده هو احنا ايه من غير زكريات حتى لو فيها الم .. تحياتى لقوس الكمان

hana said...

بونسواااار
إزيك يافنان

هاني مهران said...

مدونة جميلة


وموضوع كويس




تقبل مرورى

Anonymous said...

انت ازاي كده
قلمك جميل اوي :)

مبسوطه انني مريت هنا

Anonymous said...

عاجباني اوي تشبيهاتك ..
واحساسك بالألم اللي فيه قوس الكمان من كتر البعد والركنه والعزف .. وكأنك اختزلت فيه صورة انسان موجوووع جواه كتير نفسه يصرخ بيه من اعماقه ..

بجد حاسه بإبداع رهيب ..
انا مش فاكره انا جيت هنا قبل كده ولا لأ ..
بس اللي انا فاكراه ان انا مش بقول لأي حد جملة "انت ازاي كده" !
انا كنت متعجبه لانني بقالي كتير مقرتش حاجه بالمستوي ده ..
ساعات من كتر مالحاجه دي عجباك اوي تبقي مش عارف تقول عليها تعليق .. حبيت بس اوضحلك ده عشان تبقي فاهم صح ..
رغم انني مكنتش حابه اعمل التعليق ده لانني كنت حاجه اختزل كل اللي جوايا في الجمله اللي انت فهمتنها غلط لانها بالنسبالي رغم بساطتها الا انها عميقه .. :)

وعلي فكره
انا مريت علي تدوينات قديمه ليك
كان من ضمنها علي ما اتذكر
كان في بوست بيتكلم علي الحاجات الجميله اللي في حياتنا لما بتضيع مننا ..

وكان في بوست من التراث .. البوست ده رهيييييب .. عجبني اوي وصفك للطبليه وتشبيهاتك ..

بس محبتش اقولك
لاني مش داخله اعدد واقول انا قريت ايه ومقرتش ايه ..

عموما

دي مش هتكون اخر زياره ليا ..

تحياتي :)

Anonymous said...

نسيت اقولك كمان ان الموسيقي لايقه علي روح المدونه اوي :)

essameldin said...

الصديق العزيز حسن ارابيسك

اشكرك جدا
واود ان اخبرك انى مازلت اتنفس

عصام الدين


اتطلع لزيارتك فى مدونتى الجديده

Unknown said...

حلو بس فى اختلاط فى اللهجة

hana said...

إزيك يافنان

وحشتنا
مش بترد ع التعليقات ليه :d

عين فى الجنة said...

ابو على الفنان
قوس الكمان مثل الريشة بين صوابعك
ترسم بيه وتلون وتسعد صحابك وحبايبك
جميلة يا باشمهندس

حسن ارابيسك said...

MR.PRESIDENT
اشكرك على النص الموازي الذي يحمل وبلا شك موهبة تتجلى امامي
تحياتي

عصام الدين
الف مبروك على مدونتك الجديدة والحمدلله انك مازلت بيننا
تحياتي


سمراء
مش عارف كلمتين حسيت فيهم بلغة تعليقك برائحة البنج وغرف العمليات والتعقيم وخلافه وكأنه يلزمنا غرفة عمليات بالفعل
تحياتي

أفروديت
ده تعاطف كبير منك وتشجيع للمدونة
تحياتي


جني
صديقي العزيز
بالنيابة عن الكمان ابعث لك كل الشكر والتقدير
تحياتي


هنا
رقيقة المدونات
دائماً تشتاق المدونة لكي ولروحك ولكلماتك الرائعة
وصحيح الأشياءالقديمة مهما كانت تحمل من ذاكرة حتى ولو مفرحة فانها تسبب اللم ولذلك ينصح الاطباء النفسانيين بعدم العبث بالأشياء القديمة التى نحتفظ بها في خزائننا وتحمل لنا ذكرى
ماتحرمش منك يارب
تحياتي

ام اخلود
الدعوة التي تقومين بها لها بالتأكيد شأن كبير ويارب نرى صداها قريباً
تحياتي


هاني زينهم
القاص الجميل تسلم من كل حزن
وتفاعلك مع القصيد ليس بغريب على قارئ مثلك تقرا جوارحه قبل عينيه ودائماً لقراءتك شئ خاص ومميز وتفاعلي يعطيني بلا شك دعم وثقة وتشجيع على كل جديد
تحياتي


روح الحياة
تعليقك ناعم ورقيق ويلمس القلب نورتي المدونة ويارب على طول
تحياتي


حواء
بوسي كات الناعمة
دائماً وأبداً اشكرك على امانتك في القراءة واحساسك بكل حرف وربطك الدائم والذكي بين الموضوع وكاتبه خصوصاً عندما تقرأين لي وهذا لتواصلك الدائم وقربك من مدونتي فأصبحتي قريبة من قريحتي لذلك اشكرك من كل قلبي
تحياتي



بحب الحكومة
كل الشكر والتقدير على تعبك والمدونة بلا شك نورت
تحياتي



Hager ZaǮbal
واللهي سعيد بتواصلك هنا وتشريفك ولقد وعيت بلا شك جملتك الرائعة والتي اختزلتي فيها معاني كثيرة لكني واللهي لم أفهم غلط ولكن ماقصدته هو النقد الفني من كاتبة جميلة مثلك تعي معنى الحرف قبل الكلمة وليس ماقصدته قراءة المدونة لذلك اشكرك على إفاضتك التي تضيف الكثير لمدونتي
تحياتي


العيسوي الصغير
اشكر تشريفك وكنتاتمنى ان تخبرني عن هذا الاختلاط في اللغة
تحياتي


باشمهندس راجي
اشكرك على بيتين الشعر
وده مش غريب علي ذوقك مع كل الناس
تحياتي

MKSARAT - SAYED SAAD said...

حسن الصديق الفنان
بعد التحية
يهجر كمانه ويجهلة تحت الاسر فترة طويله ثم يحن اليه فجأه ربما شوقة لها ما دفعة ليعزف موسيقته الشعبية التي تزكرة بجنونها وانطلاقها صبيانيتة في في تسرعة للعزف جعلت الكمان يسغيث منع وبعد ما كان ينوي عزف مقطوعته المجنونه وجد نفسة يعزف شجن وحنين لها وبقي حالة بيتنقل من مقام لمقام كأنه صوفي بيتنقل من ضريح لمقام

جميل ما خطة قلمك
كون بخير
سيد سعد

حواء said...

حسن
ازيك يا فنان يا جميل .. اتعودت دايما مع تعليقاتك لازم تدوينة جديدة فين هى بقى ؟؟ ماتتأخرش كتير

☼♫♪ عمــاد الدين يــوسف ☼♫♪ said...

استاذي العزيز ارابيسك
وحشتني جدا جدا جدا ووحشتني مدونتك قوي .. وانقطاعي غصب عني والله ، امتحانات ، وشغل ، وبيت ، وطفله زنانه جدا (: ... بس والله وحشتني المدونه جدا وان شاء الله مش هتتكرر تاني بإذن الله
قصيدتك النهارده راااائعه ، ولأني من عشاق الكمان شوفت في الحدوته تآلف حميم لا يشعره إلا الشاعرون بشعور حب الكمان .. دمت متألق كبير في عليائك

تحياتي

hana said...

بونجــــور
حسن
إزيك يارقيق الإحساس

عاوزين تدوينه جديدة

بتوحشنا كلماتك يا فنان

engy said...

بجد ماشاء الله
الكلمات وصلت الاحساس بمنتهى الروعه

حسن ارابيسك said...

سيد مكسرات
اشكرك من قلبي على تواصلك الأدبي الجميل الذي لايكل ولايمل من متابعة تدويناتي المتواضعة ولتعليقك وقع جميل هنا
تحياتي

أم الخلود
مرحبا بكي في كل وقت ولكن اين الشعار انا اذهب حيث الرابط ولاتقع عيناي على لوجو
تحياتي



حنان
ربنا يخليكي يارب ومايحرمش المدونة من طلتك وان شاء الله خلال ايام التدوينة الجديدة
تحياتي


عماد الدين
الصحفي الهُمام والمقدام وصاحب الرباعيات اللي زي طلقات البارود
اشكرك وكفايه اننا اطمنا عليك
تحياتي


هنا
لن تستوعب كلماتي لشكرك وسؤالك الدائم عني وعن تدوينات جديدة لي ان شاء الله قريباً
تحياتي



engy
بنت بورسعيد الجميلة اشكرك على ذوقك وتواصلك
تحياتي

فشكووول said...

يا حسن بك . اعتذر عن اللخبطه اللى عملتها عندك عشان الكمبيوتر عندى ما كانش بيقبل التعليق فاقوم باعادة الكلك وما يقبلش وهكذا والآخر لقيته حاطط التعليقات وما بقتش عارف اعمل ايه وحاولت ادلت التعليقات الزياده بس زهقت فاعذرنى كان خطأ غير مقصود

Mostafa Abdelmoneam Badr said...

يااااااااااه يا بختك يا حسن
عند كمان
مجنون كمان
بيحس بيك
ويقوم معاك
ومعاك ينام
بيحس زيك بالعنا
واكتر كمان
وكمان مايعرفش الهنا
زيك يا مان
تسمح بنفسى أعرفك
أنا من زمان
عايز كمان
بيحس ويهيج يفرسك
ومالوش أمان
أنا بحسدك
مش حقد لأ
لأ قول جنان
أنا بعشقك
من مرة زرتك؟
فيها إيه
ما أنا من زمان
عايز كمان

وحشتنى والله
أول تعليق ليا فى مدونة حضرتك
وتانى تدوينة أقراها
عجبتنى الأولى قبل ما أعلق بصيت ع التانية
أنا بادور عليك من بدرى

شكرا لجمالك الراقى

تقبل تحياتى

hosnysoliman said...

اخى العزيز حسن/
اولا وقبل كل شىء كل عام وانت بخير بمناسبة شهر رمضان الكريم..اعاده الله علينا وعليك وعلى كل الناس الحلوين بالخير والسعادة.
يا ه ه ه ه ه ه ه..يا ابو على كم زحت عن قلبى حمل ثقيل..ردك الجميل اراحنى كثيرا..تعرف..لو انك لم ترد..لم اكون اتصور اننى يمكننى التواصل بنفس راضية معها..لكن الحمد جاء الرد مع نسمات شهر رمضان الكريم..ردك الحقيقة اظهر لى الرؤية التى تناولت بها قصتك..ذلك كما تعلم القصة والروايه ماهو الا رؤية فى خاطر الكاتب تتمثل له..والحبكة القصصية هى التى تفرض عليه فى كثير من الاحيان كيفية الصياغة.وكما سبق وقلت لك فى تعليقى انى لست خبير فن القصة..ولكن استند تعليقى الى قدر من رؤيا سينمائية..حيث ادعى ان الى باع فيها..لكثرة ما شاهدت من افلام..وقراءتى الكثيرة للنقد السينمائى.
اضف الى هذا وذاك الاختلاف فى وجهات النظر الفنية فى معالجة بعض المواقف من شخص الى اخر.
اعود واشكرك مرة اخرى بل مرات..على باب التواصل الذى فتح بينناكنت خشيت ان يعيقة عن الانفراج شىء قد يبقى فى النفوس.
مرة اخرى كل عام وانت بخير

حسن ارابيسك said...

عمنا فشكول
مع إصراري
فنانا القدير حسني سليمان
كلل التقدير لكم جميعاً على تواصلكم الجميل
تحياتي

د. إيمان يوسف said...

متوحد أنت مع الوتر
ومتوحدون نحن مع صوت الأنين...
مع صوت الكمان الجزين
مع درب القلب والحنين

تقديري أ/ حسن

حسن ارابيسك said...

د. إيمان يوسف
أشكرك من قلبي على تفاعلك وعلى قراءاتك لتديونات قديمة لي أحمد الله انها نالت اعجابك
تحياتي