.

.

ست الدار

Thursday, January 1, 2009

 قاعد جنب الشباك
مشتاق للحظة الوصول
اللي بحبها هناك
وشئ بيني وبينها موصول
وعلى الطريق
لمحت يافطه
مكتوب عليها إسمها
فرحت
قلت وقف هنا يااسطى
شلت شنطتي
ودفعت أجرتي
ونزلت ملهوف على أول الطريق
طريق مدق
والقلب دق
بعد غيبة و شوق وضيق
لافي بعادها ارتحت
ولافي غيرها سرحت
ومشيت على الطريق
وخطوتي تبوس الأرض
كأنها في صلاه وفرض
ومشيت على الطريق
يجري يسبقني حنيني
إتلفت هناك شمالي
وإتلفت هناك يميني
اتعجبت واحترت
وف مكاني اتسمرت
لاشايف غيطان شمال ويمين
ولاسواقي دوارة بتسقي طين
لاشايف شجر ولاشايف زرع
ولاشايف جذع شايل فرع
لاشايف وشوش مصحصحة
ولا شامم ريحة خبيز مفحفحة
ولاشايف بيوت من بعيد
تقولي رجعتك دي عيد
ولا برج حمام شب ولاح
ولاحتى طير في السما
شايف طير مكسور الجناح
على الأرض هناك إرتمى
وطير ميت في حالة عفن
على الأرض لسه مااندفن
كل اللي الي شايفه
شوك وصخر وزلط
سألت نفسي
أنا ماشي في طريقي صح
ولا دخلت سكة غلط
وكنت لسه هارجع تاني
لكني شفت شئ تاني
قلبي له اتوجع وانفطر
شفتها قاعده على حجر
جنب جدار مهدود
بياكل فيه الدود
أمي ست الدار
بس من غير دار
قربت منها..وقفت قدامها
وهي لسه قاعده على حالها
واقع على الأرض جنبها شالها
وتراب معفر طرحتها
والعين مسروقة فرحتها
أمي ست الدار
وشها في الأرض وضهرها محني
واقف أنا قدامها
لاحست بيا ولا طرف منها لمحني
والإيدين لاتنين
على الخدود
والحزن في العنين
والهم ممدود
والفكر سارح
من كبد جارح
ونسيت سلامي
قبل سؤالي
مالك ياأمي
وليه قاعده هنا
وايه اللي جرى
وايه اللي حاصل هنا
ست الدار
رفعت لفوق رأسها
وبصتلي
ومن الصدر طلعت زفرة
وقالتلي
تصدق ولا مش هاتصدق
وأنا قبلك ياولدي قلبي مش مصدق
تصدق
وكأنه مش إبني
وما نزلش من بطني
وما رضعش من صدري
ولا نام على كتفي
وكأنه ما كلش من إيديا
وارتاح واتمدد في عينيا
وكأن في وجعه دموعي مانزلت سيل
وكأني عشانه ماتعبتش وإتهد فيا الحيل
وكأني ماسهرتش
وكأني ماصبرتش
وكأني ما علمتوش
وكأني ما دفيتوش
وكأني ما ربيتوش
كبر الولد الصغير
كبر أخوك وأتغير
العود الأخضراني كبر ونشف وشد
ولاعاد يحن لمبارح ولايعمل حساب لحد
كبر ولبس العباية
وصار وجع الحكاية
صبح شيخ البلد
كأنه مفيش غيره اتولد
والكل بقا له عنده حاجه
وحاجه على حاجه
بقت الف حاجه
وصبحت البلد كلها محتاجه
والكل بات ليله يحلم بالستر والسعد
والكل يصحى نهاره على العشم والوعد
ومين يطول حاجه
من نخل في العالي شب ومد
واللي يحرك لسانه
يتقطع ويتقام عليه الحد
وبدل ما يسدد الدين
بقا يسب لينا الدين
وصبح مديون للكل
ماشي يدوس عالكل
الشين في البلد صال وجال
وميزان العدل في إيده مال
والطيبين هجوا وراحوا
والخير الوسيع ضاق براحه
وصبحت البلد خراب
أطلال على تراب
كبر الولد الصغير
كبر أخوك وأتغير
معقول ده يكون أخوك وإبن بطني
يخيب أملي فيه ويخلف ظني
ست الدار
سال من عنيها دمع
واتلم حواليها جمع
من ناس أهل البلد
قالت اشهدوا يابلد
بحق المطحونين والفقرا والغلابة
قلبي غضبان عليه ليوم القيامة
بحق الصلاه والصوم
أشوف فيه يوم










حسن أرابيسك

39 دورك في الفضفضة:

مدينـة من النسـاء said...

على أد ما وجعني كلامك
على أد ماحسيتها أوي
على أد ما ماتت ألف مره وكل يوم علشان يعيش
على أد ما صرخت ألف صرخه من غير دموع علشان فرحته تشوف النور
على أد ما عملت علشانه وعلشان همومه تزول
هو ولا لحظه افتكر
نسي كل يوم بين ايديها ودفا حضنها
وكأنه حد جديد ,, جاي من بعيد
لا في يوم لمسها ولا حس وجعها وفرحها
نسي دموعها اللي ارتوى بيها عمره
نسي انها غطته في بردة أدفا من حضن جلده
نسي ومفتكرش غير هيبته اللي فووووق في السما
نسي ان آآآهه منها بتتهز لها سابع أرض وسابع سما
ويوم ماتدعي عليه
بيرفض قلبها
تدعي وتقول روووووح يا وجع بطني والسنين
يرد قلبها
أدعي على ابني وأكره اللي يقول آمين

***


مش عارفه أقولك ايه
بس لو حسيت كلامي خرج مني ازاي
هاتعرف جوايا ايه

**

كل عام وانت بألف صحه وسعادة وخير

سمراء said...

حاسة اني شايفة مصر حلم سنين غربتي
موجوعة عشان امي ست الدار
بس ان كان ابها الصغير عصي
البكري راجع لها
يمسح دموعها
يبني الدار اللي اتهدم
ديما فيه امل
يارب يهدي العاصي
ويلم شمل اللي متغربين

سمراء

صفــــاء said...

.
يااااة يا حسن

تشبيهاتك رهيبه

لاشايف غيطان شمال ويمين
ولاسواقي دوارة بتسقي طين
لاشايف شجر ولاشايف زرع
ولاشايف جذع شايل فرع
لاشايف وشوش مصحصحة
ولا شامم ريحة خبيز مفحفحة
ولا برج حمام شب ولاح
ولاحتى طير في السما
لا تتخيل مدى الحنين للوصف والتشبيه فى القطعه دى
وكانى أراة وكأنى أشتم رأحه حطب نار الفرن

وكأني ماصبرتش
وكأني ما علمتوش
وكأني ما دفيتوش
وكأني ما ربيتوش

وصفك للجحود ونكران الجميل شديد القوة
والأثر ودقه التشبيهات الريفيه والكلمات التى لا نسمعها الان منذ أن ماتت جدتى

حسن أربيسك
جميل ما كتبت
.

سلوى said...

جميله أوى

ووصفك قوى وحقيقي

بجد وصفك خلاني كأني شايفه الصورة أدامي

هانى زينهم said...

عم حسن :
هافضفض اقول ايه بس بعد قوالتك دى يا راجل يا طيب !!
القصيدة دى لو مباشرة يعنى بتوصف ست الدار الست الطيبة اللى اتفجعت فى ابن بطنها اللى جاب درف بلدها وارضها فانت ابدعت فى الوصف ده وكلماتك كانت صور ملموسة ومتشافة وريحتها طالعة من الكلام واللى زود الاحساس وصفك لحالتك انت وانت رايح والقداسة اللى اضفيتها على خطوتك ورحلتك ورفعتنا معاك للسما وبعدين مفرداتك فى وصف الارض والطين هبدونا فى الارض وكلامها عن حالها وحال ابنها .
ولو القصيدة رمزية يعنى بتقصد بست الدار رمز وليكن مصر مثلا فما فيش ابداع اكتر من كدة فى الحال اللى بقت فيه المحروسة على ايد ولادها اللى وصلوا ببلادهم للحال اللى احنا فيه ده .
عموما المستويين الحقيقى والرمزى مشيوا على سلك رفيع اوى يا عمنا هم الاتنين من غير ما حد فيهم يزق التانى او يوقعه ودى شطارتك يا عم حسن .
كل سنة وانت طيب وربنا يجعلها سنة سعيدة عليك وعلى الاسرة الكريمة .

maha zein said...

ياااه
حسيت دعاها عليه بجد
وبرغم انهم بيقولوا ان دعة الام بتكون من ورا قلبها
بس دي حستها من قلبها بجد
ومش بعيد تدعي علي البطن اللى شالت الراعي الظالم ده
قصة رمزية ومعبرة جدا
جواها معاني كتير
يسلم قلمك يا حسن

ايه رأيك تشارك معانا في زيارة المصابين الفلسطينين
ايه رايك
هتكون يوم الاربع الجاي
التفاصيل هتلاقيها عندي في المدونة
يا ريت تقدر تيجي ونحاول نعمل اي حاجة في ايدينا

عين فى الجنة said...

كأنها تداعى الافكار فى حلم يقظة
جميلة يا فنان

Hannoda said...

لااااااا حرام

كتبت تعليق طويل وضاع

تعرف لما تفتح قلبك و تفضفض على الآخر و خصوصا بعد اما تقرى كلام داخل و عارف هو رايح فين جواك!
تخيل بقى انا كتبت قد ايه في التعليق اللي ضاع
بس لسة جواي أكتر

سطورك ده تستحق الاشادة اللي تستحقها بجد من ناحية الاسلوب السهل و النافذ جدا جدا.. و اللي قادر بسهولة مدهشة لرسم مشاهد كاملة و صور معبر كاني شفت من خلال الكلام فيلم كامل

اللي فات ده كله كوم و اللي بيعمله كلامك معاي انا بقى بالذات حاجة تانية

أقولك حاجة حاتجنني

انا أول ما قريت أول كام سطر
لما كان لسة اللي مفهوم انك بتحكي عن لقاء عاشقين بعد غياب
وكنت لسة ماقلتش ان اللقاء ده في قرية و بين أرض زراعية و ان حبيبته هي أمه المكسورة
ماعرفش ليه شفت الطريق و شفت الشارع الاسفلت بين غيطان واسعة من غير مباني ولا عمارات ولقيت خيالي بياخدني للريف
واتجنيت لما لقيت ان خيالي سبقني للمكان
وحسيت اني جوة المكان
واتوجعت عليه و على الشجر اللي اتقلع و السواقي اللي خربت و الخضار اللي اتطفى و الطير اللي عفن من غير ما يلاقي اللي يدفنه

البلد حزّت في نفسي و حزّ في نفسي ست البيت الجامدة الل بميت راجل لما اتكسرت و انحنى ظهرها ودبلت عنيها من البكا من ابنها و عليه.. شفت عمرها كله و شفت صباها و شبابها و أيامها مع عيالها و هم صغار

ماله كلامك بيدخل جواي يفتتحلي باب على حتة مابكونش عارفة انها موجودة جواي ولا أعرفلها شكل والاقيني مندهشة من عمق الكلام و من مساحة جواي مابعرفش اشوفها ولا اتعرف عليها غير هنا بس


بوست يتعب و يريح في نفس الوقت

عن اذنك
أنا رايحة اقرى البوست تاني

حمادة زيدان said...

عم حسن

أوجعتني كلماتك ولا أدري رأيت الأمة العربية بعد أن طغى أبنائها عليها , رأيت غزة بعد أن تركها أبنائها لتدك دون أى شعور بالذنب , أبدعت كعادتك وأوصلت ما تريد في كلمات سهلة وجميلة

تحياتي لأدبك الجميل

Ana said...

كلما غبت عن مدونتك أعود لها وأنا أعرف أن هناك جديدا جميلا بانتظارى .. كلماتك كالمعتاد بسيطة تلك البساطة الساحرة وصادقة صدقا أخاذا .. خالص حبى .

فشكووول said...

قلت اشوف حسن ارابيسك شكله ايه .. وجيت ولقيت .. كلام موزون .. على الوجيعه ما يهون .. كل الولاد كده .. كل العيال كده .. الكل عمل زى الكل .. دول كانوا زى الفل .. والورد ع الصفين .. والعين تقول للعين .. راح فين نن العين .. يا خساره يا اولاد .. راحوا العيال فين .. نسيوا التعب والكد .. ولا حد عارف حد .. ولا حتى ابنى نن العين .. راحو العيال فين ..
تحياتى

إيمان قنديل said...

ست الدار هي مصر الحزينه الموجوعه من غدر الأبن الذي نسى كل مافعلته الأم وارتدي عباءة السلطه ، وبدلا من رد الجميل للأم التي حملت وشالت وولدت وأرضعت وربت، أنقلب عليها واصبح عاقا، وامتد جحوده الى الأرض والوطن الذي أصبح خرابا لا خضرة ولا زرع، واثقله بالديون

دائما تحيرني في أسقاطاتك يا أرابيسك

وأعترف أنني عندما أقرأ لك أعيد البوست أكثر من مره، بل أتي وأقرأ ثم اذهب وأعود ثانية كي أقرأ ثانيةوثالثة ورابعة ، وفي كل مرة اشعر وكأنني أقرأ للمرة الأولى وان مفرداتك رغم بساطتها في بعض الأحيان إلا أنها توحي بدلالات ومضامين مختلفه تثير لدي التساؤلات

============
نسيت أن أقول لك لقد تفوقت على نفسك في إختيار المفردات والعبارات التي وصفت المعني بإختصار ودخلت القلب مباشرة

فشكووول said...

حسن باشا ارابيسك : لا يخفى عليك اننى عندما قرأت البوست للمره الثانيه اكتشفت اشياء لم اكتشفها فى المره الاولى واكتشفت ان القصيد كلها رمز فات على فى المره الاولى .. ما علهش بتحصل لاجدع شنب
اشكرك على كلماتك الطيبه واللى انا مش قدها .. اصل يا عمنا انا حافض شوية كلام صغيرين وباضحك بيهم على الناس والناس هى اللى فاهمه ان انا فاهم .. بس انا مش فاهم ولا حاجه .. دول شوية قراءات متواضعه بحاول ان اعمل من الحبه قبه واقولهم وخلاص وما تتخمش فى يا عم حسن .. انا غلبان .. بس انت اللى كبير .. وكتاباتك كبيره زيك .. ويشرفنى ان اكون ضمن من تحبهم وتضعهم فى مدونتك وانا ساعاملك بالمثل .. وتحياتى

م/ الحسيني لزومي said...

لا تستطيع ان تجاهد
لاتستطيع ان تتظاهر
لا تستطيع ان تتبرع بالمال
اذن قاطع وادعو غيرك للمقاطعه
منتجات كل من يدعم العدو
**** هل تعلم أن:-
1- شركه ستار بوكس(للكافيهات والقهوة) تدعم العدو ب 2 مليار سنويا من ارباحها
2- شركة فليب موريس (مارلبورو & مريت ) تدعم العدو وتدفع بصفة يومية ما مقدارة 12% من ارباحها.وعليه فإن مدخني العالم الإسلامي فقط يدفعون كل صباح 12 مليون دولار اي ما قيمته طائرة اف-16 كل اربعة ايام .

*** قائمة المقاطعة
ستار بوكس
ماكدونالدز
برجر كينج
كنتاكي
بيترا كينج
كوكاكولا
بيبسي
فردركرز
شيليز

لنوقف شراء البضائع الأمريكية والبريطانية لشهر واحد فقط

سوف تكون تكلفة هذا الشهر عليهم خسائر مقدارها
37 بليون دولار

***

Unknown said...

اللقاء يوم الجمعه 16/1
عدد الجرحى فى الاسماعيلية 19 حالة
بعد ان توفيت شابه هذا الصباح
منهم سيدة تبلغ من العمر 58 عام
وشابة فى العناية المركزة عندها 17 سنة
والباقى رجال من سن 17 عام الى الاربيعنيات
ومازالت المستشفى تستقبل المزيد
محتاجين تبرعات مالية
وبعض الملابس
رقم تلفونى هو 0188047779
*&*&*&*&*

beroo said...

نزلت دموعي بجد وانا بقرأ اخر سطر والام بتعدي علي ابنها
ايه الالم والفن ده
هايل بجد والكلمات بسيطة وسهلة ومعبرة ومؤلمة
تحياتي بجد بجد مش كلام
بيروو

mostafa rayan said...

حلوة قوي يا حسن
فعلا في ناس كتير بعد ربنا ما بيديها بتتحول لوحوش وبتدوس على الكل
تعيش وتكتب وتمتعنا
تحياتي ليك يا جميل

MKSARAT - SAYED SAAD said...

الصديق العزيز حسن ارابيسك
اولا ابدي لك اعجابي الشديد بهذا البوست
التحليل:
اولا :
دعنا نتحدث عن الريف المصري
وما اصابة من زحف عمراني مرعب استطاع ان يطمس هويته .
اغلبنا في مرحلة الطفوله ذهب الي الريف وكان كما تفضلت له طابع مختلف يجذبنا له بدرجة كبيرة تريح النفس وكأنه مشفى لنا يرحنا من صخب المدينة وملوثاتها المختلفة .
ثانيا:
اهل الريف : تخلل اليهم ضخب المدنية والعصرية المبالغ فيها فاصبحوا عمله لا تقبل التداول اعلم انه ليس الكل لكن في الماضي كان الجميع شئ واحد ومع مرور الوقت اصبح كل شئ قابل للتغير
ثالثا:
العلاقات الاجتماعية اصابها ما اصابها هي الاخري وتشوهت بفعل غياب كثير من القيم والتقاليد واصبحت الافكار والعادات المعلبة والمستورده تتخل الشخصيات مثل النار في الهشيم
خاتمة :
اخي الكريم قصة قصيرة اشبه بشعر منثور تميز بمجموعة من القوافي والسجع اضاف للقصة مزاق جميل من وجهة نظري المتواضعى لم يضعف بل اضاف ترابط بين حالة القراءة والاستمتاع للوصول لنهايتها لهذا احيك عليها .
اما عن الاجتماعيات الغائبة عنا والتي بدأت تحزو حزو الاساطير واصبحت كلمت كان هي البداية لأي موضوع منها فتأكد ان هذا اصبح مصيرها فالزمن تغير والاشخاص تغيروا وتأكد ما نعترض عليه اليوم سيتمنى من بعدنا ان يعشوا ولو نصفة وما نتحدث عنه نحن فسوف يمحي او يكون فين سجلات التاريخ
بالمناسبة شممت رائحة الريف وانتابني احاسيس طفوله كادت ان تغيب واستنفرتها كلاماتك
كل الود
صاحب المكسرات

Esraa Hamed said...

القصيدة بجد رااائعة

علي اد ما شايلة بين كلامها وجع
و علي اد ما سابت في القلب الوجع

بس بجد تححححححححفة
و تشبيهاتك بجد تتحس و تتشاف

دمت متألق أرابيسك
:)
تحياتي

نبضات said...

جميله وعميقه وكتير معبره

صور مصر القديمه فى هامش مدونتك قد ايه جميله وكمان اللوحات المرسومه


تحياتى
دائما مبدع

أميرة جمال مصرية الديانة والجنسية said...

ارابيسك


لمحاتك عنها وحياتنا فيها تدفعنا الي جنون كبير به رجاء خافت ان يتبدل الحال .

كل التحيه لتدوينك
اتيت ايضا لاهديك
نسيج جديد في مدونتي ليتك تراه

خالص مودتي

أميره جمال

!!! عارفة ... مش عارف ليه said...

قرأت

وتأملت

وفقدت النطق

عذراً ...

Hannoda said...

جيت اشوف ردك لما ملقتهوش قريتها تاني

جميل قوي البوست ده يا حسن

جسر الى الحياة said...

ست الدار هى كل ام هى كل وطن انا حسيتها وطن وام هيا اللى ياما اديتنا واحنا جحودنا قهرها

بوستاتك دايما فى المليان دمت بحب ومودة

Beram ElMasry said...

اخى الفنان ، حسن ارابيسك
السلام عليكم ورحة الله
طريق مدق
والقلب دق
بعد غيبة و شوق وضيق
الله عليك يا اسطى حسن ، كلام ناعم ودافئ ورقيق
( أشوف فيه يوم ) اشوف فيك انت يوم ليه التطويل
شكرا على تعليقك وقد علا كعبه فوق ماكتبت انا بما فى قولك من حماس وغضب وصدق
والسلام عليكم

فشكووول said...

ماشى ياارابيسك .. يعنى هى زياره وخلاص وان شالله ما عن حد حوش .. برضه انا مصمم ازورك ورزقى على الله

فشكووول said...

ارابيسك .. تحياتى
اطمئن يا اخى .. هذه ليست وجهة نظر .. انما هى كتابات من مؤرخين ثقات .. والله مش عارف فعلا الدكتور اسمه عبد الله ايه .. هو كان كاتب موضوع عن اليهود فى مقارنة الاديان وأنا ملخصه عندى وهو استاذ مقارنة الاديان بجامعة الازهر بالقاهره .. واصل كمان الملخص اللى عندى كنت كاتب فيه اسمه بالكامل والعيال الله يسامحهم قطعوا الجلد وبعض الاوراق الاولى فى الملخص لكن صلب ومتن الملخص اللى انا عامله موجود .. وانا لا اكتب حاجه ابدا من عندياتى ودائما كتاباتى موثقه .. ويؤكد ذلك معلوماتك القديمه عن هذا الموضوع ..
انت مختلف معى ان كل شيئ يمكن تأجيله وتأتى عندك مصر فى المقام الاول .. ما فيش مشكله الاختلاف فى الرأى لا يفسد للود قضيه .. لكن انا ليست هذه مصر التى يكون دورها عندى فى المقام الاول .. مصر التى نعرفها ليست مصر هذه الايام .. لو اتكلمنا عن هذا الموضوع حنتكلم كتير وحنختلف كتير .. لكن خلينا فى نقاط الاتفاق احسن
تحياتى يا ارابيسك

هانى زينهم said...

عم حسن :
فرحتنى وزعلتنى يا راجل يا طيب .
فاروق جويدة ونزار مرة واحدة وبعدين تقولى لو ده شغلك ؟
الله يسامحك يا عمنا . هو شغلى يا عم حسن وانت عارف انى ما اقدرش ولا افكر يبقى شغل غيرى وانسبه لنفسى بالشكل ده . نورتنى يا استاذى وبعدين احنا هنروح فيك فين بس .

فشكووول said...

عزيزى الفنان
تحياتى
لسه يا عزيزى احنا فى مرحلة السرد التاريخى عشان اما نتناقش فى الاخر يبقى كل الناس عارفه ايه الموضوع
رأيى سيأتى فى نهاية هذه السلسله وسوف نتناقش كلنا ونتحاور ونتجادل وكل يدلوا بدلوه .. من وجهة نظرى ومن البدايه ان اليهود ليس لهم حق فى فلسطين .. ومن وجهة النظر الشرعيه .. ولكن الموضوع له جوانب متعددفه حنتكلم عنها فى النهايه .. تحياتى لحضرتك يا فنان

عاشقه الرومانسيه said...

حسيت بين سطورك ان مصر هى اللى بتئن من بعد ولادها عنها
حسيت كمان انك مصرى صميم
شفت بين كلماتك ابن بلد طيب
شفت روح صلاح جاهين اللى باعشقه
شفت بين كلامك هدوء النيل
وجنان البحر
حسيت بيك لانك مصرى
لان بينا عامل مشترك
هو حب مصر
تحيــــــــاتـى

فشكووول said...

عزيزى حسن بك ارابيسك .. تحياتى
يا صديقى انا قريت التعليق بتاعى عندك اكثر من مره عشان اشوف انا قولتك ايه .. وما لقيتش حاجه ؟؟ كل اللى لاقيته انا قلت احنا لسه فى مرحلة السرد التاريخى وفى الآخر حنقول رأيآ ورأيك ورأينا كلنا بعد انتهاء مرحلة السرد التاريخى وبرضه قريت التعليق السابق بتاعى عندك وكنا مختلفين عن مصر لها الاولويه من عدمه
لكن اذا كنت تقصد كلامى عشان انا قلت الكلام من كتاب مؤرخين ثقات فدا عشان اطمنك
وفى النهاية اعتذر لك يا أخى اذا كنت قولتك كلام من غير ما اقصد
تحياتى

Dr.Ahmed said...

كلام جميل وراقي استاذ حسن ..تصوراتك بديعة وخيال خصب ماشاء الله عليك . يدوم هذا القلم المليء بالشجن والامل
دمت بكل ود

dodda said...

منه لله
ربنا على كل حاكم ظالم...

فاتيما said...

ست الدار ...
الوجع يا حسن
الوجع
وصفك رهيب للحظة احالية من عمر البلد دى
حسيته كدا
قريت عند سهى زكى إنك مسافر و فى ترحال الأيام دى
حبيت بس آجى أسلم عليك و أقولك ترجع بالسلامة
و منتظرين حكاياتك عند الرجوع
تحياتى و خالص ودى

حسن ارابيسك said...

تحياتي
لكل المدونين الأعزاء الذين قرأوا هذا العمل المتواضع ولم يبخلوا عليه بشئ من تشجيعهم وذوقهم وعقيباتهم الجميلة

وتحياتي أيضا لكل من قرأ ست الدار وبخل عليه وضن وأستعلى وأستكبر أن
تنزل أيقونته على تلك المدونة
شكراً للجميع من قلبي

حسن أرابيسك

حسن ارابيسك said...

مدينة من النساء
مدونة لها مني شديد الإعجاب والتقدير
بالطبع أشعر الوجع والألم الذي خرج منكي ألسنا نعاني منه جميعاً مثلك ياصديقتي الجميلة
تحياتي وتقديري


سمراء
صحيح ما تقولينه وفكرة الأبن البكر فيه كل العوض عن الصغير جميلة وتبعث بالفعل على الأمل من جديد وأن هناك من فيه خير
تسلمي لي بكل حب وود


صفاء
رحم الله جدتك وجدتي وأجدادنا جميعا أجداد رحلوا ومعهم كل الأصالة والأيام الجميلة شكراً على إطراءك وتحياتي


سلوى
نورتي المدونة المتواضعة واحمد الله على أن الصورة وصلت
تحياتي


هاني زينهم
لاأدري ليس بغريب عليك دائماً قراءة كل تدويناتي بعقل المبدع الذي يدرك ويقدر الصغيرة قبل الكبيرة داخل العمل وبالطبع أنا لم أقصد منها المباشر وإلا صاع العنى والهدف من وراءها تقديري الدائم على كل تحليلاتك الرائعة... وعلى فكرة لم أقصد أن أزعلك بل هو ليس استفسار لدي ولكنه تأكيد لكونك كاتب تلك الجماليات من الشعر وأناأعرف انت على ذلك قادر فاستغفر الله أن أكون اتهمتك انك تنسب عمل الغير لك حاشى لله دائماً ان شاء الله متألق في إبداعاتك
. تحياتي


مها زين
لا تدرين سعادتي حينما وصلك إحساس دعاءها بجد وبالطبع القصة رمزية ليست مباشرة بشكلها المكتوبه به
تحياتي


باشمهندس راجي
صحيح وربما يتمخض حلم اليقظة بشئ حقيقي نافع ومغير لكثير من الحال
تحياتي

هنودا
دايماً تعليقك بيحسسني كل مرة برهافة احساسك ومشاعرك ورؤية عميقة لديكي لكل عمل ورؤيتك الواضحة للصورة بكل حذافيرها وتأثيرها الطاغي عليكي المشكلة أنني أيضا دائماً اتأثر بأسلوبك في وصف احساسك وصعودك وهبوطك مع كل مشهد داخل العمل انتي دايما بتخلي الواحد يخاف عليكي وأخاف أن دمعة تنزل تجري على خدك وأكون السبب..هنوده كل الشكر والحب والتقدير على مودتك وقراءاتك المستمرة للمدونة
تحياتي


حمادة زيدان
ماتحرمش منك يارب ومن إطراءك المستمر ولك حق كل الحق في جملة
رأيت غزة بعد ان تركها أبنائها لتدُك
صحيح فهناك لديهم حكام هان عليهم شعبهم..ليس لنا ذنب في ذلك
تحياتي

إيهاب رضوان
لن أوفيك حقك في كل هذا المدح والإطراء من كاتب جميل يعرف معنى الحرف قبل الكلمة
لايفوتني أن أعزيك في صديق عمرك رحمه الله وأسكنه فسيح جناته
تحياتي


عمنا فشكول
يارب يكون شكلي طلع عند حسن ظنك عندما أحببت أن تشوف حسن ارابيسك شكله أيه
وتحليلك للتدوينة في محله بالطبع وبالأمانة أنا سعيد بالتواصل معك وبالطبع رابط مدونتك لدي هو شرف لي وبحر من المعرفة لذلك يسعدني تواصلنا الدائم والمثمر يا أبن بلدي الجميل والأصيل
تحياتي


م/ الحسيني لزومي
أشكرك على التنويه وعلى جهدك المتواصل الذي لايكل ولايمل في شكل جهاد لاتملك العين والأيد والنفس غيره في الوقت الحالي دمت بكل خير وتحياتي


نهر الحب
شكل أخر من الجهاد والمشاركة بما نملكه الأن في أيدينا من تقديم العون لآخواننا في الإسلام أخوان مسلمين هانوا على قادتهم الذين لايعرفون غلاوة وقيمة دماء شعبهم فهان عليهم بتلك الطريقة المخجلة
تحياتي


beroo
سلامة دموعك
وأشكرك من كل قلبى على إطراءك وتعقيبك الرقيق المُعبر
تحياتي



mostafa rayan
يسعدني توجدك الدائم الذي لايخلو من متابعتك الصادقة لكل عمل وبالطبع لك الحق في إضافتك القيمة
تحياتي


SAYED SAAD
دائما وأبداً تعليقاتك ثرية دسمة لاتخلو من إلتقاط كل صغيرة وكبيرة في العمل لايفلت منك شئ على الإطلاق أو يعبر سهواً عنك دائماً أنت متربص جميل بابعاد العمل وزواياه يسعدني دائماً أن تديوناتي تخلق لديك تلك الروح من تعقيبات موازية وقيمة لكل تدوينة تحليلك رأيته كمشرط جراح يعمل ببراعة فائقة في جسد تلك الأمة وإخراج كل العلل بها بشكل جرئ دون خوف من معرفة سبب العلة والأفة التي تصيبنا وتتغلل في كل جسدنا المهترئ لذلك صديقي العزيزي أنا تعنيني تعقيباتك بشكل خاص لما تلقاه تدوينتي من إهتمام حقيقي منك وصادق بعيد عن أي زيف انت ممن أعتز بتعقيبهم بكل حب سواء في شكل إيجابي أو سلبي لأنه في النهاية في صالح العمل
تحياتي


Esraa Hamed
سلامة قلبك ياجميل من كل وجع
وأسعدني تعليقك أن تشبيهاتي تتشاف يعني لدي اقتراب اللغة من مضمون العمل فانتي ممن أعتز بمتابعتهم لما أعرفه عن تدويناتك الرائعة ومستقبلك المشرق في عالم الأدب
تحياتي


نبضات
أشكرك على الجمال الساكن داخلك في اكتشاف جماليات وعبق مصر القديمة من خلال الصور الجانبية وأيضا على إطراءك للتدوينة اتمنى تواصلنا الدائم بكل خير
تحياتي



واحدة من أصحاب القمر
أميرة جمال
حينما تدفعكم لمحاتي الي جنون كبير
سلامتك من الجنون ياقمر المدونات وصوت عالي على رجاءك الخافت أن يتبدل الحال وصلاح الأحوال
وأشكرك من كل قلبي على إهداءك تدوينتك الرائعة نشوة العالية كقمراً في سماء القصص الرفيعة فأصبحت من أصحاب القمر
تحياتي


!!! عارفة ... مش عارف ليه
كل المحبة والتقدير وحينما تقرأ وتتأمل وتفقد النطق
دلالة على أن هناك شئ هام وخطير ولاينبغي السكوت عليه
تحياتي


جسر إلى الحياة
تعقيبك جميل جداً وموجع أيضا هي كل أم كل وطن
الجملة علقت معايا تنفع مدخل لقصيدة أخرى شكراً ملهمتي الرائعة
تحياتي


بيرم المصري
أصريت وأنا أكتب ردي أن أكتبه باللغة العربية لابالانجليزية فكيف لي بالانجليزيةوأنا أخاطب بيرم المصري
أشكرك على اهتمامك بزيارتي وتعقيبك الجميل ومصطلح الأسطى حسن عجبني جداً فهو ينم عن كثير من الحرفة والصنعة الجميلة أشكرك من كل قلبي ياعمنا كلنا بيرم المصري
تحياتي



Dr.Ahmed
بارك الله فيك وأخلجتم تواضعنا بكلامكم الجميل المنمق ،زرت مدونتك الرائعة ولم اتشرف بالتعقيب فيها للأن لمواصلتي القراءة ومطالعة كل تدويناتك اتمنى دوام التواصل الأدبي
تحياتي


dodda
صحيح خير الكلام ما قل ودل انتي جبتي النهاية من غير وجع دماغ
صحيح منه لله وربنا على المفتري، مازلت إطالع مدونتك وقراءة الكثير منها حتى يأتي تعقيبي أتم
تحياتي


فاتيماااااااا تاااااااا
حبيبة قلبي التي غاب قمرها هنا فأظلمت المدونة بعض من الوقت ولكن حمدالله على سلامتك ظننتك غاضبة من شئ ما أجهلة لذلك لم أثقل عليكي حتى في زيارتي لمدونتك الجميلة والمتميزة والتي تحمل كل معاني الحب والنقاء والأمومة الجريحة والتي أدعو لقلبها بإلتئام جرحه وذهاب وجعه وجمع شمله..يارب
وست الدار كما أشرتي ببلاغة رائعة يافاتيما....الوجع وكما أشرتي بأنها وصف للحظة ولكنها لحظة ياعزيزتي الجميلة لحظة ثقيلة جداً لاتتحرك ولاتعبر وطننا هذا ولاترحل منه
وأشكرك من كل قلبي على سلامك وإطمئنانك علي ودعاءك لي بالرجوع سالم ان شاء الله وبالطبع كتبت شئ من الشعر عن الارتحال ولو مؤقتا خارج الحبيبة مصر تلك هي عادتي
حينما يصادفني تعقيبك في بعض المدونات أسعد بلاشك بالإطمئنان عليكي والحقيقة العزيزة سهى انسانة بمعنى الكلمة وروائية متميزة تحب الناس وتتمنى كثيراً الخير لهم وتفرح لفرحهم وتحزن أيضا لحزنهم شديد الحزن
الجميلة فاتيماااتاااا بكل الحب والود أتركك في رعاية الله
تحياتي

عصـــــــــــام الــــديــن said...

لاشايف غيطان شمال ويمين
ولاسواقي دوارة بتسقي طين
لاشايف شجر ولاشايف زرع
ولاشايف جذع شايل فرع
لاشايف وشوش مصحصحة
ولا شامم ريحة خبيز مفحفحة
ولا برج حمام شب ولاح
ولاحتى طير في السما

مااجمل كلماتك لكن ياسيدى مازل لدينا غيطان وسواقى وشجر وزرع وخبيز بس عيش فينو لانهم قضوا على القمح والحمام مات من المبيدات لكن ياصديقى كيف يستطيع الفلاح ان يزوج ابناءه ؟ هل يتركهم بلا زواج ام يرسلهم الى المدينه للعيش والعمل ؟ ياسيدى فلاحنا مظلوم قوانين الدوله جعلت منه سجين يعيش وهو ابناءه فى علبة سردين .... الفلاح حين يبنى بيت لابناءه على ارضه فهو اقرب مايكون بمن تبرع بقلبه لينقذ ابنه ولكن لابديل لديه, يجب ان يعاد النظر فى القوانين المنظمه للبناء فى الريف كيف يعقل ان يسمح بالبناء على الاراضى الزراعيه لمن يمتلك خمسة أفدنه او اكثر فقط ولا يسمح لغيره ممن يمتلكون ارض اقل؟ , بالله عليك كم نسبة الفلاحين الذين يمتلكون هذا القدر من الارض ؟؟.... هذا القانون هو قانون تميز عنصرى بين فقراء الفلاحين وهم نسبه تزيد عن 80% من الفلاحين وبين اغنائهم , الفلاحين غلابه يابو على ومغلوبين على أمرهم
تحياتى

عصـــــــــــام الــــديــن said...

لاشايف غيطان شمال ويمين
ولاسواقي دوارة بتسقي طين
لاشايف شجر ولاشايف زرع
ولاشايف جذع شايل فرع
لاشايف وشوش مصحصحة
ولا شامم ريحة خبيز مفحفحة
ولا برج حمام شب ولاح
ولاحتى طير في السما

مااجمل كلماتك لكن ياسيدى مازل لدينا غيطان وسواقى وشجر وزرع وخبيز بس عيش فينو لانهم قضوا على القمح والحمام مات من المبيدات لكن ياصديقى كيف يستطيع الفلاح ان يزوج ابناءه ؟ هل يتركهم بلا زواج ام يرسلهم الى المدينه للعيش والعمل ؟ ياسيدى فلاحنا مظلوم قوانين الدوله جعلت منه سجين يعيش وهو ابناءه فى علبة سردين .... الفلاح حين يبنى بيت لابناءه على ارضه فهو اقرب مايكون بمن تبرع بقلبه لينقذ ابنه ولكن لابديل لديه, يجب ان يعاد النظر فى القوانين المنظمه للبناء فى الريف كيف يعقل ان يسمح بالبناء على الاراضى الزراعيه لمن يمتلك خمسة أفدنه او اكثر فقط ولا يسمح لغيره ممن يمتلكون ارض اقل؟ , بالله عليك كم نسبة الفلاحين الذين يمتلكون هذا القدر من الارض ؟؟.... هذا القانون هو قانون تميز عنصرى بين فقراء الفلاحين وهم نسبه تزيد عن 80% من الفلاحين وبين اغنائهم , الفلاحين غلابه يابو على ومغلوبين على أمرهم
تحياتى

حسن ارابيسك said...

الحقيقة مفيش كلام اقوله بعد اللي قلته القلب فيه غصه وطعم الكلام مالح على لساني
كما أشكر لك سعيك الدؤوب في قراءة تدوينات سابقة
تحياتي