Saturday, June 18, 2011
مش طايق روحي ولا طايق نفسي
مش طايق بـكره ويومي وأمسي
مش طايق قلمي وأوراقي وبطاقتي وإسمي
مش طايق فرشاتي ولوحاتي ورسمي
مش طايق صوتي وصمتي وصراخي وهمسي
مش طايق جوايا وبرايا وهدوم على جسمي
كل ما اتلفت حواليا
والقاكي مش جنبي
اشوف الدنيا تضيق في عنيا
والصدر ضلوعه تخنق قلبي
والقاني هاتجنن وبكلم نفسي
والقاني مش طايق روحي ولا طايق نفسي
كل ماشتاقلك أقول هارسمك
وأشوفك وأقابلك جوه لوحاتي
وأقولك قد ايه بحبك وبحنلك
وأتفاجئ إن مفيش ألوان في حياتي
والقاني هاتجنن وبكلم نفسي
والقاني مش طايق روحي ولا طايق نفسي
كل ما أشوف العمر فاضي
اصرخ واندهلك فينك
إتعودت عليكي معايا وقصادي
والدنيا لو جنة وحشة من غيرك
والقاني هاتجنن وبكلم نفسي
والقاني مش طايق روحي ولا طايق نفسي
كل ما أصحى وأقابل يومي
والقاني على سريري وحدي
أاقول دي حقيقة ولا كابوس في نومي
وأنتي فوق سبع سموات سبتيني وروحتي
والقاني هاتجنن وبكلم نفسي
والقاني مش طايق روحي ولا طايق نفسي
كل ما أحب أمشي وأروح لأماكن
القى البيوت واقفين في حداد مصفوفين
وشبابيكها عيون متكحلة بسواد داكن
تبص لي تعزيني وتقولي كلنا رايحين
والقاني هاتجنن وبكلم نفسي
والقاني مش طايق روحي ولا طايق نفسي
مش طايق بكره ويومي وامسي
مش طايق قلمي وأوراقي وبطاقتي واسمي
مش طايق فرشاتي ولوحاتي ورسمي
مش طايق صوتي وصمتي وصراخي وهمسي
مش طايق جوايا وبرايا وهدوم على جسمي
حسن أرابيسك
13 دورك في الفضفضة:
ازيك يا حسن مبسوطة انى قرأت لك حاجة جديدة ولو ان الطهقان الىى حسيته فى كلامك وصل لى ومبقتش انا كمان مش طايقة روحى زيك وده معناه ان كلامك واحساسك وصل يا فنان ... كلنا كتير بنتجنن ونكلم نفسنا اما بنحس بالوحشة والغربة والوحدة والغربة والوحدة مش شرط ان اللى بتحبهم يكونوا راحوا لسابع سما بالعكس ده اهون كتير اننا نكون عارفين انهم راحوا والجنان اللى بجد انهم موجودين وبرضه حاسين بالوحدة فى وجودهم ... عجبنى تعبيرك .. البيوت واقفين فى حداد مصفوف وشبابيكها عيون متكحلة تبص وتعزينى وتقولى كلنا رايحين ..... ايه الجمال ده يا حسن بجد احساسك هنا عالى اوى اكتر من رائع ... كلماتك رسالة مصدقاها اوى بس يارب نقنع نفسنا بها عشان الحزن مايخليناش مش طايقين روحنا ... سلامتك و تحياتى
والله يا عم حسن كفى هذا النص جمالا انى كنت بادور على كبريت بعد ما خلصته عشان أولع فى روحى !!
اقصد انك عرفت توصل حالة الفقد لعزيز بشكل قلب علينا الذكريات يا راجل يا طيب والقلب ما عادش فيه مكان لحتة فضفضة حتى !!
الناس لنا بتفقد عزيز يا أستاذ غالبا بتتمنى تلحقه على طول وكل يوم بيعدى وانت مش وياه بيبقى كابوس مضطر تعيشه بارادتك الحرة أو غصب عنك سيان . وكل يوم بيعدى م العمر بيقرب المسافة فالواحد مش بيحزن عليه اوى باعتبار انه خد من كابوسه عشان يوديه لحلمه اللى بيتمناه
يبقى ان الحياة لازم تستمر زى ما كان العزيز ده نفسه انها تستمر وبيبقى فى تحقيق رسالته اللى ما قدرش يكملها نوع من أنواع الوفاء والتعزية للنفس حتى لو وقفت قدام صورته بالليل لوحدك وقلتله ادينى عملت اللى كان نفسك تعمله .
الله يسامحك يا غالى .. سلام
انا ايضا مريت بنفس الحالة كثيرا
لكن لاني راجع لمصر الخميس القادم ان شاء الله
فانا في حالة معنوية عالية
الله يرفقك و كل انسان الي ما يحبه و يرضاه
هي الحياة فجأة تسرق الضيااء وتعلن عن
ظلام دامس ما إن لامس الفؤاد يقتله
سيل من ألم ورفات من حنين وبحور من دمع
سلمت حسن وبعد الله عنك الضيق والحزن
والغربة
ماعهدت حرفك بهذا الحزن
كن بخير دائماً صديقي الغالــي
والقاني على سريري وحدي
بجد حقيقى أوى
للأسف لكن يبقى دائما بصيص نور نتعلق فيه.
كل ما أحب أمشي وأروح لأماكن
القى البيوت واقفين في حداد مصفوفين
وشبابيكها عيون متكحلة بسواد داكن
تبص لي تعزيني وتقولي كلنا رايحين
حسيتها قوي و شفت حطان البيوت القديمة الصفرا و صفارها زايد و قت الغروب
حسيت كل كلمة في البوست ده ورغم الايقاع السريع اللي فيه لكن الالم وهجه عالي قوي طول ما بقرا حرف ورا حرف
ارابيسك
بشتااااااااااق لمدرنتك و حالتها و خصوصيتها
تحياتي
إزيك يا حسن
انت مش متخيل انا بفضل مستنية قد ايه بين التدوينة والتانية بجد تسلم ايدك وقلمك
اخى وعزيزى وصديقى حسن ابوعلى/القلوب والامزجة واضح انه فيه فيروس فى الجو مهيمن عليها..كل الاشياء فقدت معانيها و فى انتظار غد مجهول بما هو ات..الحقيقة فيه حالة خمول وكسل وعدم رغبة لاى شىء..وزى ماقلت فى كلامك
مش طايق قلمي وأوراقي وبطاقتي واسميمش طايق فرشاتي ولوحاتي ورسمي..انا ناصب حامل الرسم والالون جنبهم من اكتر من 3 شهور ..للاسف ولا حياة تشدك الى اى منهم..حتى الكلام ضايع يمكن سطر واحد وانسى الكلام..اه ايام ولكن الامل لسه باقى ولعل الغد تاتى بما هو افضل..........اشكر لك سؤالك
حواء
العزيزة حواء
اشكرك على إسهابك الجميل في تفصيل المعاني ووصولك لبواطن العمل ومعناه كما أشكرك على سؤالك عني
تحياتي
هاني زينهم
صديقي العزيز
اشكرك على زيارتك الجميلة التي لاتنقطع ولا تستغنى عنها مدونتي كما اشكرك على تحليلك الرائع لكل عمل اقدمه هنا ودائما لك رأي يحمل من واقع وخبرة الحياة الكثير والكثير
تحياتي
ذو النون المصري
صديقي العزيز والمهتم بالفن التشكيلي بشكل يثير الإعجاب في النفوس لما تقدمه على صفحات مدونتك واتمنى لك العودة سالما ان شاءالله
تحياتي
هنا
الرقيقة في ذاتها وفي ادواتها وتدويناتها وشعرها
اشكرك ياهنا على ودك الدائم هنا لمدونتي المتواضعة فتشجيعك ومجاملتك نهر متدفق من كرمك الزائد كما اشكرك على دعائك الجميل
تحياتي
انجي
ابنة بورسعيد الناعمة
اشكرك على الايجاز الجميل واستخلاص المعنى بشكل مباشر ومنطقي
تحياتي
هنوده
صديقة التدوين الغالية
هكذ حالك منذ زمن بعيد لاتجيدي القراءة بعينيكي ولكن بإحساسك العالي إحساس يرى باطن الشيئ لا ظاهرة وهي ملكة لاتوجد عند كثيرون.. كما أشكرك على مجاملتك الرقيقة
تحياتي
شيرو
صديقتي الجميلة في جمال تدويناتها اعتز دائماً بأنك من زوار مدونتي المتواضعة وفي هذا شرف لي وشيئ واللهي اعتز به
تحياتي
حسني سليمان
فنانا واستاذنا الجميل
أشكرك من كل قلبي على زيارتك التي تحمل لي معنى جميل وشرف لي من فنان مثلك
وماتذكره ياسيدي بخصوص حالتك لاتقلق فهذا لايقلق انها سنة الحياة فالحياة لاتسير على وتيرة وحدة فدائما هناك صعود وهبوط نشاط وخمول انها دورة الحياة الطبيعية وان شاء الله نرى لك اعمال مميزة قريبا
تحياتي
حسن أرابيسك
العزيز حسن ازيك ياجميل فينك غايب ليه ان شاء الله تطمنا عليك قريب وبلاش الغيبة الطويلة دى .. تحياتى
حلوة قوي الكلمات
فعلا حسيت اني مش طايقة نفسي أنا كمان :))
نجحت في نقل إحساسك على الأوراق
تحياتي لك
تمتلك قدرة متميزة على التوصيف ونقل احساسك لمن حولك ...أنت متميز ياصديقي فعلا ..دمت بخير دائما ..
العزيزة/ حواء
أنا موجود مسافرتش بعد سفرية سيوة الأخيرة..متشكر على سؤالك الجميل
تحياتي
Carol
صديقة التدوين الرائعة
ده يمكن عشان كونك شاعرة جميلة ورائعة الإحساس
تحياتي
صديقي الجديد/ موسى السوري
أشكرك على مجاملتك ومتابعتك لكل ما هو قديم وجديد
تحياتي
حسن أرابيسك
Post a Comment