Friday, April 9, 2010
طبعاً لسه فاكرك
فينك وفين أيامك
قرص خشب كبير متلمع متسمر متهذب بالفاره والمنشار
كل اللي كان يشوفك عندنا يقول تسلم ايدين الأسطى النجار
طول عمرك عايشة وسطنا في كل مطرح وجهاز عروسة ودار
ناكل عليكي ونكوي هدومنا ونذاكر دروسنا ونطلع من الشطار
وحشانا ياأم الخير ياطبلية الأكل
طبعاً لسه فاكرك
فينك وفين أيامك
أوقات قاعدين حواليكي واخدين راحتنا ومرحرحين
وأوقات قاعدين حواليكي الكتاف في الكتاف متزنقين
لا حد بينا يضايق ولا حد ينفخ كنا بلمتنا مبسوطين
نشمر الدراعين ونسمي بسم الله ونمد الإيدين
وحشانا ياأم الخير ياطبلية الأكل
طبعاً لسه فاكرك
فينك وفين أيامك
ايام العز ولمتنا عليكي كل يوم وكل ساعة أكل
أختي واخويا وامي وابويا وخلان وأعمام وأهل
ومحمر يتحط ومشمر يترص ومن كل صنف وشكل
ده الخير كان كتير وربنا كان مبارك في شرب وأكل
وحشانا ياأم الخير ياطبلية الأكل
طبعاً لسه فاكرك
فينك وفين أيامك
كان كل واحد بره بيته يرجع جري ملهوف مشتاق
يلقى مرصوص عليكي إيشي صواني وطواجن واطباق
ولو صفصفت حتى على حتة جبنة وكسرة خبز أورقاق
الكل يقوم شبعان ومرضي ساكن في شارع أو في زقاق
وحشانا ياأم الخير ياطبلية الأكل
طبعاً لسه فاكرك
فينك وفين أيامك
خيرك اللي كان من ربنا، كان مش بس لنا
ده كان لجيرانا وجيران جيران اللي جنبنا
أطباقنا يوم عندهم وأطباقهم يوم عندنا
وده كان حال بيوت مصر وحال كل حينا
وحشانا ياأم الخير ياطبلية الأكل
طبعاً لسة فاكرك
وحزين على أيامك
أيام كل حاجه كان فيها بركه دلوقتي حل مكانها الفقر واتحقق
وشمل العيلة الحلو راح إتشتت ما بين التيك أواي واتفرق
والناس الطيبة لما راحت زِعل وحِزن الخشب فيكي واتشقق
وكل مسمار فيكي شاخ وانحنى ضهره ولا ينفع تاني يدقدق
ألف رحمة ونور عليكي ياطبلية الأكلحسن أرابيسك
قرص خشب كبير متلمع متسمر متهذب بالفاره والمنشار
كل اللي كان يشوفك عندنا يقول تسلم ايدين الأسطى النجار
طول عمرك عايشة وسطنا في كل مطرح وجهاز عروسة ودار
ناكل عليكي ونكوي هدومنا ونذاكر دروسنا ونطلع من الشطار
وحشانا ياأم الخير ياطبلية الأكل
طبعاً لسه فاكرك
فينك وفين أيامك
أوقات قاعدين حواليكي واخدين راحتنا ومرحرحين
وأوقات قاعدين حواليكي الكتاف في الكتاف متزنقين
لا حد بينا يضايق ولا حد ينفخ كنا بلمتنا مبسوطين
نشمر الدراعين ونسمي بسم الله ونمد الإيدين
وحشانا ياأم الخير ياطبلية الأكل
طبعاً لسه فاكرك
فينك وفين أيامك
ايام العز ولمتنا عليكي كل يوم وكل ساعة أكل
أختي واخويا وامي وابويا وخلان وأعمام وأهل
ومحمر يتحط ومشمر يترص ومن كل صنف وشكل
ده الخير كان كتير وربنا كان مبارك في شرب وأكل
وحشانا ياأم الخير ياطبلية الأكل
طبعاً لسه فاكرك
فينك وفين أيامك
كان كل واحد بره بيته يرجع جري ملهوف مشتاق
يلقى مرصوص عليكي إيشي صواني وطواجن واطباق
ولو صفصفت حتى على حتة جبنة وكسرة خبز أورقاق
الكل يقوم شبعان ومرضي ساكن في شارع أو في زقاق
وحشانا ياأم الخير ياطبلية الأكل
طبعاً لسه فاكرك
فينك وفين أيامك
خيرك اللي كان من ربنا، كان مش بس لنا
ده كان لجيرانا وجيران جيران اللي جنبنا
أطباقنا يوم عندهم وأطباقهم يوم عندنا
وده كان حال بيوت مصر وحال كل حينا
وحشانا ياأم الخير ياطبلية الأكل
طبعاً لسة فاكرك
وحزين على أيامك
أيام كل حاجه كان فيها بركه دلوقتي حل مكانها الفقر واتحقق
وشمل العيلة الحلو راح إتشتت ما بين التيك أواي واتفرق
والناس الطيبة لما راحت زِعل وحِزن الخشب فيكي واتشقق
وكل مسمار فيكي شاخ وانحنى ضهره ولا ينفع تاني يدقدق
ألف رحمة ونور عليكي ياطبلية الأكلحسن أرابيسك
32 دورك في الفضفضة:
صحيح من فات قديمه تاه
احيك يا فنان وفينك من زمان؟
الله الله الله
وهفضل اقول الله للصبح
تسلم يدك ويعيش للتاريخ قلمك
فنانا المبدع الجميل حسن ارابيسك
انا بقولك انت
طبعاً لسه فاكرك
فينك وفين أيامك
بس انا موافق انك تغيب مادمت سوف تخرج علينا بتحفه ابداعيه تثرى بها الادب العربى
اللى يحس بكلامك ياعمنا اللى قعد ذينا على طبلة الاكل
والى حط عليها لمبه جاز ولم ورقه وكراريسه وذاكر
ماتفكرنيش كبير بس الطبليه لسه عندنا فى الدار
لكن ياصاحبى غريبه ووحيده فى ركن من اركان الدار
فاكر لما تقعد على المشمر والمعمر والمحمر وتمد ايدك فى لحظه واحده انت واخوك لقطعه واحده تضحك ويضحك وتتعازموا عليها وفى الاخر بترسى فى بق ست الحبايب
فاكر لما كنا نقعد ناكل ومن طعامة الاكل جسمنا كله يعرق ذى مانكون فى السونا النهارده ياصاحبى اول ماتقول بسم الله تلاقى انتفاخ على الفاضى
وحشانا ياأم الخير ياطبلية الاكل
ياترى دى بس الى وحشانا ؟
كتير وكتير بنحس انهم وحشونا يافنان يامبدع
انا متشكر لكلماتك ولاحساسك
واخاف ياصاحبى احسد قلمك او اسرقه منك
دمت لنا مبدع
تحياتى
جميله الطبليه وعليها خريطة مصر
الله يا ارابيسك
لو مكنش الكلام ده
يطلع من ارابيسك
ميبقاش أرابيسك
فعلا الطبلية ايقونة
جميلة أووي المفردة دي أرابيسك
تحياتي
يااااااااااااه !!
الطبلية !! ربنا يكرمك يا راجل يا طيب . فكرتنا بالذى ما مضاش ولسة عايش فى قلوبنا . على غير العادة انا مش هاهتم بالشكل الادبى يا فنان انا هاهتم بالجانب الانسانى الجميل اللى فى الموضوع واول حاجة فيه العنوان . أم الخير .. صح هى ام الخير اللى كانت بتخلى الرغيف يساع 10 وتخلينا نبص لبعض ونتكلم ونضحك وندلق المية وننشف ونقوم كأننا كنا بنتفسح مش بناكل !!
الطبلية بتاعتنا كانت خضرة يا عمنا ولسة موجود والله فى بيت ابويا وامى ولسة بياكلوا عليها رغم انهم عجزوا بس حاسين انها هى ام الخير عليهم وعلى عيالهم . مسلسل 7 وربع وفوازير نيللى هى دى ذكريات الطبلية يا ابو الخير . والله العظيم انت فنان بجد يا عم حسن . وانسان كمان . اللى يفتكر حاجة جميلة زى دى يبقى اكيد انسااااااااااااان جميل كمان . ربنا يديم عليك نعمة الاحساس يا استاذ اللى حرم منها ناس غيرك كتييير !!
الاصيل اصيل يا سلطان
تعيش وتفتكر
فينك وفين أيامك
كل حاجة بركتها قلت
هى وحشانا كل حاجة ليه علاقة بالماضى وحلاوته
جميلة جدا يااستاذ حسن تسلم ايديك
الطبلية لسه عايشه
بدليل انها لسه موجوده فى بيتنا وبيوت كتير اعرفها
ولسه بنستعملها
بس للأسف افتقدت عنصر اللمة زى زمان
ظروف الحياه ما بقتش بتخلى الناس تتلم زى الاول وكله ماعندهوش وقت يهرش أصلا فما بالك بنشاط بياخد وقت زى الاكل؟؟
عجبتنى قوى قوى قوى التدوينة دى
حسستنى بالحنين لبيت جدتى الله يرحمها
المكان اللى كانت العيلة كلها بتتجمع فيه :)
للاسف مش موجوده بابا بيحكيي عيها كتير وكان بيقولي انه بيزاكر كمان عليها
ايام بئا
ابو علي الفنان
الطبلية ولمبة الجاز والطربوش وغيرهم من رموز مصريتنا كل يوم بيضاف ليهم جديد في المتحف، وكل وقت ولية اذان
صراع كبير بين طريقة معيشتنا زمان ودلوقتى اه التطوير حلو بس عيبة انه بيلغي حاجات حلوة بنحبها
كون بخير صديقي
ملحوظة:
الصفحةالرئيسية للمدونة خلف عنوان "حسن اربيسك" في كلمة اربيسك تانية مكتوبة تقريبا ناقصة حرف (ر)
السلام عليكم
والله خليت الدموع تفر من عينى ياابوعلى على اللى كان ايامهم بركة الله يرحم دى ايام ويرحم أصحابها
اعذرنى يا فنان على التأخير خلال عام مر على عام كامل من الاحزان مابين فقدان الاخ وعدد من الاقارب والاحباب لكن هذه هى سُنة الحياة لذلك تكاسلت كثيرا عن عالم التدوين فكنت اعود قليلا وانذوى كثيرا فهذا ما أخرنى عنك لعدم صفاء الذهن ليس أكثر
ديما متألق يا فنان وأحييك على استضافتك للأستاذ راجى حاليا اتابع مدونته
كما أرجو ان تشاركنا على صفحات الفيس بوك لدينا هناك جولة للفنون حقا رائعة نحتاج الى عالم التدوين لمشاركة عالم الفنون نريد ان نزيل الفجوة بين المتلقى من عامة الشعب و ابداعات الفنانين وفلسفته الغائبة عن الكثيرين ياريت ياابوعلى تشاركنا
http://www.facebook.com/home.php?#!/profile.php?ref=profile&id=1246236126
مع خالص تحياتى
أنا حاسة أنه الطبلية يمكن بترمز لأبعد من وجودها ومعناه
مش عارفة ليه حستها قلوب كانت متجمعة وإيد كانت واحدة
وحب كبير مكنش ليه حد
مع مرور الأيام اتبدل والناس مبقتش هي هي
ولا القلوب هي هي
بقت أرواح بعيدة حتى وهم قريبيين مبقاش حد بيفكر في حد
ولا حد قلبه بيحس بحــد
بجد أصعب حاجة في الدنيا أنه القلوب الدافية تتغير
مش عارفة بس إحسآآس
عارف إحنا محتاجين في أيامنا دي الدفا اللي كانوا بيحكو عنو ويقولوالنا عليه محتاجين نكون قلب واحد وإيد واحدة مش بس
كوجودنا سوا عيلة او أهل وجيران
لا يمكن يكون إحتياجنا ابعد من كدة
محتاجين الوطن العربي كله يكون قلب واحد
وإيد واحدة بجــد
حاسة الطبلية ديت ذي القلب الكبير اللي بيه وفيه بتتجمع كل القلوب ويملاها الدفا و تطلع الحب بكل صوره
مبدع دايماً يا فنان في قلمــكـ وفي ريشتــك وفـ إحساسكـ اللي بيروح لأبعد دايماً من حدود الكلمات
تسلم بجــد ويسلم قلبك وقلمـك وحروفه الرقيقة الراقية المبدعة
هنآآآآآآآآ
روعة
سلم قلمك وكلماتك المبدعة
تحياتي
اعزرنى يابو على المره دى مش عايز اعلق على رائعتك لكن انا عايز اعلق على رائعة هنااااا
فراشة التدوين الرقيقه
انا معاكى فى المعنى اللى انت عبرتى عنه رغم اننا جميعا حاسين بافتقاد للتوحد للتجمع واللمه حول الطبليه الرمز او اى شئ يقدر يجمعنا دايمامحتاجين نرجع تانى نتجمع حولين الراديو وابله فضيله والف ليله وليه والاشكيف ومسلسل الساعه سابعه ونص
وراكية النار فى ليلة الشتا ولمبة الجاز لما الكهربا بتقطع والست ام عصام وهى بتخبز العيش الفلاحى وانا قاعد اتفرج على المهاره والاتقان واشم روايح الخير
اااااااااااااااه
زمان وعدى
شكرا ياعمنا ارابيسك وللفراشه هنا
اه و الله
:)
فعلا كانت ايام
جدتي زمان ماكانتش تخلينا ناكل الا على الطبلية ..
و انا كنت احب قعدة الطبلية اوي :)
و كنا بنعمل كحك العيد برضه على الطبلية ..
و الفطير المشلتت و كل الحاجات دي :)
الله يرحم ايام زمان
اخي وصديقي الفنان الجميل حسن ارابيسك
كان من الواجب ان استأذن اولا قبل نشر تعليقك البديع والذي اعتبره كشهادة ميلاد لي كموضوع في مدونتي لهذا الاسبوع لما ادخله علي نفسي من سرور واني لك شاكر وممتن .فجزاك الله عني خيرا
وفي مدونتك قرأت موضوع "وحشانا ياام الخير"
فهمت من العنوان انها مصر العفية وانت بالكرم رسمتها طلعت لنا طبلية
منها وعليها كبر البدن ولما عليها مال الزمن
خيرها اتسرق بايد خفية
سلم قلمك ايها الفنان الجميل
ملحوظة: سبق ان كتبت رد وتعليق وبالصدفة اكتشفت اني نشرته في مدونة اخري بالخطأ
فارجو قبول اعتذاري عن هذا الخطأ الغير مقصود
تحياتي والسلام ولا سلام مع بني اسرائيل
اخي وصديقي العزيز جدااااااااا الشاعر الفنان حسن ارابيسك
في جميع الاحوال انا لك شاكر وممتن واني حريص علي صداقتك ومودتك وادبك الجم وتواضع الفنان في شخصك الكريم واني امل ان احقق توجيهك لي بنشر اعمالي ان شاء الله
ولك كل الشكر والتقدير
وفي مدونتك فوجئت بنشر اعلانك عن قصيدة عم عبدو وقد فرحت جدا عندما رايتها فشكرا لك لادخالك السرور علي قلبي بحق
:)
:D
تحياتي والسلام ولاسلام مع بني اسرائيل
السلام عليكم
كيف حالك اخي الكريم الفاضل حسن بك
لقد سعدت ايما سعادة بتعليقك وزيارتك والتي اعادتني لفتح المدونة بعدما فارقتها منذ فترة شغلت فيها عن التدوين والكتابة وزيارة اناس اكن لهم كل عتزاز وحب ومودة لله وفي الله .. ومن قبل ايضا كنت انقطعت عدة اشهر وعدت وكتبت بعض التدوينات التي ذكرتها في تعليقك ولكني للاسف كنت انا المقصر معك ولم ازرك ..
وها انا ارد زيارتك مع العلم اني لم ازر احد آخر منذ اخر تدوينةلي عن الاصمعي ..
وبالطبع أسري بي حنيني وعرج بي خلال تدويناتك وابداعاتك التي لم اقرأها منذ واستعصت عليه فض بكارتها .. واولها بالطبع ام الخير .. ولم أرى منها الا الخريطة المرسومة على الطبلية واظنك تقصدها .. فان لم يقصدها مبدع مثلم فمن يقصدها اذن .. وطبليتك بعدما نحينا عنها مرغمين فقد التف حولها اللئام من حثالة البشر ونهبوا خيرها ..وستعود لنا يوما بخيراتها عندما يوجد رجال بصدق يلتفون حولها ..
اما ابداعك والذي رسمته ريشة فنان كعادتك حاول تفتكرني .. فقد سرت بنا في عبق التاريخ وكأنما اشم راوائح الخان واسمع اصوات الدراويش المتيمين بولي النعم الحسين رضي الله عنه وارضاه ..
واني لاشكرك بعدما انتشيت لنفحاتك التدوينية واظنها الاحق من جامع المطر لمناقشتها في ال بي بي سي ..
احييك اخي الكريم واشكرك على تعليقك الذي اسعدني جدا جدا ولا تحرمنا من زيارتك وتعليقك ..
سلامي وتحيتي
حلو أوي تسمية الطبلية بأم الخير
:-)
عارف أكتر حاجة عجبتني في البوست ده ايه؟ يمكن حاجة صغيرة قوي .. ومش في النص نفسه .. اللي عجبني رسم خريطة مصر على الطبلية .. رابط خفي جدا ومعبر جدا بيربط بين مصر وبين معنى كلمة أم الخير
السلام عليكم حسن بك
تحياتى
طبعا فاكر الطبليه
ولسه عندى وموجوده ومنوره
بس يا ارابيسك
اللى كان عليها زمان مش اللى عليها الوقت
كانت زمان عمرانه بكل انواع الاكل والفواكه والناس
الان حتى الفول مش عايز يقعد عليها
ولا حتى نفرين تلاته يتلموا علها
الوقت كله تيك اواى
والناس كمان بقت تيك اواى
والوطن كمان بقى تيك اواى
واتفضت اللمه عليها
وبقت فى البيت رمز من رموز الاتحاد بدون اتحاد
تحياتى
ددلوقتى بقي كل واحد ياخد طبقه ويقعد بعيد علشان كده ماعدش فيه بركة وبقينا عايشين اغراب تحت سقف واحد
تحياتى لك وللقصيدة الجميلة
بونجوور
إزيك يا فنان
واحشني أوي والله
فين البوستات الجديدة:)
مستنيييييين
اسمح لي يا فنان اعلق على
الرائــع عصام
إحناعلى فكرة مفتقدين الاتنين مفتقدين الطبلية ديت كرمز وانه نتجمع ناكول سوا نتابع تلفزيون سوا أو اي حاجة
في يومياتنا العادية ممكن نعملها بس محتاجين تكون فيها نون الجماعة بمعناها وبروحها
ذي ما محتاجينها بمعناها الكبير
كلامك في منتهى المنطقية وفعلاً محتاجينه
تحياتي لك يا فنان وللرائع عصام
فشكول اتعلم من ارابيسك انه يعمل بوست كل شهر
تحياتى
بونجور
إزيك يا أرق فنان
اخي وحبيبي االشاعر الفنان حسن ارابيسك
جيئت لاطمئن فهل انت بخير كما اتمني
ارجو افادتي
ولك الصحة والسلامة
اخوك بيرم المصري
أولا أشكر من كل قلبي كل أصدقاء تلك المدونة والذين لهم الفضل الكبير في استمرارها بفضل مشاركتهم وتشجيعهم ودعمهم
كما أشكر أيضا كل العابرين ولم يشرفوني بتوقيعهم
أشكركم جميعا من كل قلبي
حسن أرابيسك
ودلوقتي لازم أرد على كل أصدقائي وأحبائي الذين لم يبخلوا على أم الخير بتعليقاتهم وتحليلاتهم الرائعة
باشمهندس/ راجي
اشكرك ولك كل التحية على متابعتك
لكن ي استفسار عند حضرتك اني مش عارف اعلق عندك نهائي التعليق يروحوله منين عند حضرتك
تحياتي
عصام الدين
الاخ العزيز عصام وكما قال مهندس راجي من فات قديمة تاه كماوالحقيقة انت جبت مفردات كتيرة وحلوة توازي نفس المعنى بس مش ممكن يتعمل عليها فيلم ثري دي عنها خصوصا بعد وصفك الرائع والحزين وهي وحيدة في ركن من اركان البيت
تحياتي
عارفة مش عارف ليه
الصديق العزيز والكاتب الجميل اشكرك على متابعتك وذوقك
تحياتي
هاني زينهم
كلامك امتداد لكلام ولاد البلد البسطاء أصحاب المعدن النفيس والأصيل والذين لاينسلخون من جذورهم الجميلة والاصيلة
المهم طمنا عليك ياراجل ياطيب
وتحياتي
سمير مصباح
امير الشعر
اشكرك ذوقك ومدحك وكل هذا الدعم الذي تقدمه لي دائماً
تحياتي
أحاسيس أيوشة
اشكرك ياأيوشة على روعة كلامة وعلاقة الأشياء الحلوة بالماضي صحيحة
تحياتي
وينكي
الرقيقة وينكي
بالفعل أصاب تحليلك جزء كبير من وراء كتابتي لتلك التدوينة
وينكي النحلة الدؤوبة فين نشاط بتاع زمان خارج التدوين وحفلاتك الرائعة ايه جرالك؟
تحياتي
كيارا
الجميلة كيارا
والدك ده راجل معدن أصيل وجميل بدليل كلامه ليكي سلميلي عليه
تحياتي
SAYED SAAD
صديقي العزيز أنا معك بالطبع في كل ما تقوله وتعليقك جميل جداً وموضوع وهو مايحدث على أرض الواقع وبخصوص حرف الراء اللي ناقص أشكرك ولكنه مختفي في الزحمة دقق وهتلاقيه
تحياتي
أمل فتحي
الصديقة العزيزو التي لها وحشة كبيرة ولكل ماتدونة وما تختزله داخلها من روائع الفكر
كما أقدم عزائ لكي ولكل العائلة الكريمة وأدعو الله بالرحمة للفقيد كما أدعو لكي بالصير والاحتمال ونحن نعرفك جيداً انسانة مؤمنة جداً تؤمن بقضاء الله وقدره نتمنى نسمع عنكي كل خير ونشوف تاني كل ماهو رائع وجميل منكي
تحياتي
Hana
اذيك ياهنا
يارقيقة التدوين الحقيقة لايسعني قول شئ عن تحليلك القيم والرائع والجميل ولقد واللهي أصبتي جوانب كثيرة في تلك تحليلك لتلك التدوينة لأن الموضوع مش طبلية وبس الموضوع اكبر من كده بكثير
تحياتي
أريج السمر
فينك ياست الكل وحشاني من زمان جداً وحفيت على مدونتك لأتابع كل جديد لكي فأنت ممن خرج علينا بمدونة رائعة في كل تحمله لكي من فكر وتحليل ونقد
ياريت ترجعي تكتبي من تاني عازين نقرأ لكي جديد عن قريب
تحياتي
قهوة بالفانيليا شيماء علي
الحقيقة انتي رسمتي بقلمك لوحة جميلة جداً وهي لوحة الطبلية ونساء العائلة ملتفو حولها وبينهم الصبية والبنات يحاولون تقليدهم بالتاكيد لوحة رائعة لأيام جميلة
تحياتي
بيرم المصري
عمنا بيرم المصري
الحقيقة لايسعني قول شئ بعد تحليلك الرائع
فهمت من العنوان انها مصر العفية وانت بالكرم رسمتها طلعت لنا طبلية
منها وعليها كبر البدن ولما عليها مال الزمن
خيرها اتسرق بايد خفية
بصراحة مش قادر اقول حاجه
غير ربنا يخليك لنا وتمتعنا بكل حبك الجمل لهذا الوطن
تحياتي
جني
صديقي الأصيل والقلب الطيب والروح الشفيفة التي نستشعرها في كل تدويناتك والحقيقة تحليلك يحمل غورك الصدق في الموضوع والمعنى الذي في بطن الشاعر كما يقولون ولقد أصبت أيضاً ياصديقي العزيز فيما رميت اليه كما أشكرك من كل قلبي على إطراءك كما ولابد لي أن أشهد بأنك مدون له مايميزة من أعمال رائعة
تحياتي
مراكبي
باشمهندس التدوين
صحيح كما قلت هو المعني الخفي الذي يتحدث ويعلق عليه كل أصدقائنا هنا سواء بشكل مباشر او غير مباشر
تحياتي
فشكوول
عمنا فشكووول
صديقي وحبيبي عمنا فشكووول واللهي تلك الأسطر الأخيرة في منتهى الروعة منك في موضوع التيك واي ده ودائماً سهمك لايخطئ القلب
تحياتي
mostafa rayan
صديقي الرائع مصطفى ريان وحشني واللهي من زمان ومش عارف اقول حاجه جنب تعليقك المدهش فلقد اختزلت كل الجوانب في صورتك الدرامية التي صورتها في تعليقك كل واحد ياخد طبقه وعلى جنب اتها ياصديقي تحمل معاني ودلالات كثيرة وعميقة
تحياتي
تحياتي للجميع
طبعا انا شوفت الطبليه وقلت نفسي فى فتة وملوخية وفراخ محمرة وصنية بطاطس بالريش الضاني كانت جدتي ساكنة فى الهرم وكنا كل اسبوعين نروح لها نلعب ونهيص واول ما تقول السفرة ولا الطبيله نصرخ كلنا ونقول الطبلية يا تيتا وكانت ايام جميله اوي اوي فكرتي بيها يا حسن وكانت ايام فعلا خير وكانت تيتا ياسمين تبعت دايما لجيرانها وهما كمان يبعتوا لها من نفس الاكل بتاع اليوم كانت ايام جميله وتواصل جميل مع الجيران ربنا يبارك فيك يا رب ويبارك فى مصر وايام مصر
نجوى الخولي
بالطبع انتي محقة تلك ايام جميلة لاتعوض من مصر حينما كان بين اهلها تراحم ومودة
تحياتي
نجوى الخولي
بالطبع انتي محقة تلك ايام جميلة لاتعوض من مصر حينما كان بين اهلها تراحم ومودة
تحياتي
Post a Comment